საბა კვირკველია: ...ჩავიდეთ ასტანაში და მოვუგოთ ყაზახებს!-საბა წლის ფეხბურთელია

საბა კვირკველია ქართული მედიის რჩეულია - "სარბიელმა" ის წლის საუკეთესო ფეხბურთელად დაასახელა.

ეს პოპულარული გამოცემა იყო პირველი, რომელმაც დამოუკიდებელ საქართველოში წლის ფეხბურთელის გამოვლენა ითავა და ამ საქმეს 1992-2008 წლებში მშვენივრად ართმევდა თავს. ეს იმ დროს ყველაზე პრესტიჟული პრიზი გახლდათ. მერე გამოცემა დაიხურა და გამოკითხვაც შეწყდა.

10-წლიანი პაუზის შემდეგ "სარბიელმა" ტრადიცია აღადგინა და გამოკითხვა კომპანია "ლიდერბეთთან" ერთად ჩაატარა. 2017/18 წლების სეზონის საუკეთესო ფეხბურთელის გამოვლენაში 80-მა (რეკორდული რაოდენობა) სპორტულმა ჟურნალისტმა მიიღო მონაწილეობა.

წამყვანმა კონვერტი გახსნა და... ისე, სხვას რას ველოდით - ცხადია, კვირკველია! 80-დან 64-მა ჟურნალისტმა პირველ ადგილზე საქართველოს ნაკრებისა და მოსკოვის "ლოკომოტივის" მცველი დაასახელა, რომელიც ხმების უდიდესი უმრავლესობით (სულ 211 ქულა) პირველ ადგილზე გავიდა. მეორე - "ვიტესის" ყოფილი კაპიტანი გურამ კაშია აღმოჩნდა (85 ქულა), ხოლო მესამეზე ბელგიური "გენტის" შემტევი ნახევარმცველი გიორგი ჩაკვეტაძე (43) გავიდა.

1993-2008 წლებში "სარბიელის" რეფერენდუმში სულ 8 ფეხბურთელმა გაიმარჯვა: 4-ჯერ (2001, 2002, 2003, 2006) საუკეთესო კახა კალაძე გახდა, სამჯერ (1994, 1998, 2007) - შოთა არველაძე, ორ-ორჯერ გიორგი ქინქლაძე (1993, 1996), ლევან კობიაშვილი (2000, 2005) და ალექსანდრე იაშვილი (2004, 2008), თითოჯერ გამარჯვებულები გახდნენ აკაკი დევაძე (1995), თემურ ქეცბაია (1997) და ზაზა ჯანაშია (1999).

ამგვარად, 26 წლის კვირკველია "სარბიელის" მე-9 საუკეთესოა. შეგახსენებთ, რომ საბა წლის საუკეთესო ფეხბურთელად ფეხბურთის ფედერაციამ ორჯერ დაასახელა - 2015 და 2017 წლების შემაჯამებელ ღონისძიებაზე.

პრიზებთან ერთად, ქართული ფეხბურთის ქომაგმა, ზურაბ ბურჭულაძემ, საბას საჩუქრად ექსკლუზივი გადასცა - მისი დიზაინით დამზადებული ორი მაისურა კვირკველიას გამოსახულებით.

ირაკლი გვილავა, თბილისის სპორტის საქალაქო სამსახურის უფროსი: "მიხარია, რომ "სარბიელის" დაჯილდოება აღდგა. ამისთვის მადლობა ორგანიზატორებს".
ზურაბ ხიზანიშვილი: "ათწლიანი პაუზის შემდეგ ამ მშვენიერი ტრადიციის აღდგენა სასიხარულოცაა და მნიშვნელოვანი მოვლენაც. წარმატება საბას, ორგანიზატორებს კი მადლობა".

გია ხიზანიშვილი, კვირკველიას ბავშვობის მწვრთნელი: "ვულოცავ საბას ამ დიდ წარმატებას. კარგად მახსოვს, ის სამტრედიიდან თბილისში 13 წლის ასაკში ჩამოვიდა. დღეს კი საქართველოს წლის საუკეთესო ფეხბურთელია. ვულოცავ მის ოჯახს, რომელიც ახლა უზომოდ ბედნიერია".

ალექსანდრე ჩივაძე: "მოულოდნელი არჩევანი არ ყოფილა. საბა ღირსეული გამარჯვებულია და ამ წარმატებას ვულოცავ. მასთან ახალგაზრდულ ნაკრებში ვიმუშავე, გავიცანი და მისი პოტენციალიდან გამომდინარე, მიმაჩნია, რომ ძლიერ ჩემპიონატში ითამაშებს".

"ძალიან ემოციური მომენტია. ყველაზე დიდი ბედნიერებაა, როდესაც შენს ქვეყანაში საუკეთესო ფეხბურთელი ხდები. მით უფრო სასიხარულოა, ეს "სარბიელის" გამოკითხვის შედეგად რომ მოხდა, რომელიც ყოველთვის პრესტიჟული პრიზი იყო. დიდი მადლობა მედიას ამ დაფასებისა და მხარდაჭერისთვის", - ამბობს კვირკველია.


რას ნიშნავს მისთვის წლის საუკეთესო ფეხბურთელობა, აპირებს თუ არა ინგლისის პრემიერლიგაში გადასვლას, როგორ აფასებს ერთა ლიგაში საქართველოს შანსებს?

გუშინვე, საბა კვირკველიამ "ლელოსთან" ინტერვიუში ამ და სხვა მნიშვნელოვან საკითხებზე ილაპარაკა.

- უპირველეს ყოვლისა, წლის საუკეთესო ფეხბურთელად აღიარებას გილოცავთ!

- ნებისმიერი სფეროს წარმომადგენლისთვის ჟურნალისტების დაფასება სასიამოვნოა. მადლობა ყველა იმ ადამიანს, ვინც მხარი დამიჭირა. ეს სამომავლოდ ჩემთვის დიდი სტიმულიც იქნება.

- რამდენად მართალია ცნობა, თითქოს ინგლისის პრემიერლიგის კლუბი "ლესტერი" გიწვევთ?

- ამ ეტაპზე პასუხის გაცემა მიჭირს. მაგრამ დაინტერესება არის.

- ძალიან საინტერესო გამოწვევაა...

- რა თქმა უნდა! ყველაფერს ძალიან მალე გაიგებთ...

- გასაგებია, რომ "ლოკომოტივის" მადლიერი ხართ, მაგრამ კარიერული წინსვლა ყველა ფეხბურთელის ოცნებაა...

- ორი აზრი არ არის. ფეხბურთს ამისთვის ვთამაშობთ.

- რუსეთის შემდეგ ინგლისში დამკვიდრება ბევრს გაუჭირდა. თქვენი აზრით, ამ დონეზე სათამაშოდ მზად ხართ?

- მზად რომ არ ვიყო, ფეხბურთს არ ვითამაშებდი და დღეს საუკეთესო ქართველი ფეხბურთელის პრიზსაც არ ავიღებდი.

- ამ შესაძლო ტრანსფერზე ცნობილია, რომ "ლოკომოტივის" ხელმძღვანელობა წინადადებას განიხილავს, მთავარი მწვრთნელი იური სიომინი კი წინააღმდეგია. თქვენი პოზიცია როგორია?

- ინგლისის პრემიერლიგაში თამაში ჩემი ბავშვობის ოცნება იყო. თუკი შემოთავაზება იქნება, რატომაც არა?!

- ერთი მხრივ, არის ჩემპიონთა ლიგაში გასული მოსკოვის "ლოკომოტივი", ხოლო მეორეს მხრივ, ინგლისის პრემიერლიგის კლუბი. ეს თანაბარი არჩევანია?

- ვეცდები, ისეთ გუნდში გადავიდე, რომელიც ჩემპიონთა ლიგაში ითამაშებს.

- ასეთი გუნდიც გიწვევთ?

- კი, არის ასეთი გუნდიც.

- სანაკრებო თემაზეც ვილაპარაკოთ. ლუქსემბურგთან რატომ არ ითამაშეთ?

- მწვრთნელმა დასვენების საშუალება მომცა.

- სულ რაღაც სამ თვეში ნაკრებისთვის უმნიშვნელოვანესი ტურნირი, ერთა ლიგის გათამაშება იწყება. ამ კუთხით ბოლო ორი საკონტროლო მატჩი მნიშვნელოვანი იყო...

- თავადაც ნახეთ, რომ მალტასა და ლუქსემბურგთან გადახალისებული შემადგენლობა იყო. 7 წამყვანი ფეხბურთელი არ თამაშობდა.

- ერთა ლიგაში წარმატების იმედი თუ გაქვთ?

- ცხადია, მაქვს, რადგან ძალიან მაგარი ფეხბურთელები გვყავს. თანაც, ბიჭებს მშვენივრად გვესმის, რომ ასეთი შანსი, შესაძლოა, მეორედ აღარც იყოს. ყველაფერს გავაკეთებთ, ქართველი გულშემატკივარი რომ გავახაროთ. ამის პოტენციალი რომ არსებობს, ნაკრებმა ლიტვა-ესტონეთთან ჩატარებული შეხვედრებში აჩვენა, სადაც მეტ-ნაკლებად ოპტიმალური შემადგენლობა გვყავდა.

- ჯგუფში ჩვენს მთავარ მეტოქედ ყველას ყაზახეთი მიაჩნია, რომელთანაც პირველ შეხვედრას გასვლაზე ჩავატარებთ...

- ჩემი აზრით, საქართველოს ნაკრებს აქვს იმის პოტენციალი, რომ ჩავიდეთ ასტანაში და ყაზახებს მოვუგოთ.

- ყაზახები ახალი მწვრთნელის ხელში აშკარად მოღონიერდნენ და გადაჭარბებულ ოპტიმიზმსაც ავლენენ. ჩვენ გულშემატკივარს კი ეიმედება, რომ საქართველოს ნაკრებს ყაზახებზე ბევრად უკეთესი ფეხბურთელები ჰყავს...

- ...და ასეცაა. საკლუბო ასპარეზზე ჩვენი ფეხბურთელები უკეთეს დონეზე თამაშობენ და, ალბათ, ყველა დამეთანხმება, რომ ჩვენ უფრო კვალიფიცირებული ნაკრები გვყავს.

ყოველდღიური სპორტული გაზეთი "ლელო"
1005
მკითხველის კომენტარები / 0 /
მსგავსი ამბები
რუბრიკის სხვა სიახლეები