საბა ლობჟანიძე: ქართველები თანამედროვე ფეხბურთის მოთხოვნებს ნელ-ნელა ვეგუებით

"რანდერსის" შემტევმა ნახევარმცველმა საბა ლობჟანიძემ დანიის სუპერლიგაში პირველი გოლი (მანამდე, თასზე დუბლი ჰქონდა შესრულებული) გაიტანა. ეს XII ტურში მოხდა, როცა ქართველი ლეგიონერის გუნდი ლიდერ "ნორდსიელანდს" ესტუმრა და დაძაბულ შეხვედრაში 2:3 დამარცხდა. საბა ლობჟანიძემ თავი 44-ე წუთზე გამოიჩინა, როცა მისი ზუსტი დარტყმის შემდეგ ანგარიში გათანაბრდა...

ლობჟანიძეს დანიაში დავუკავშირდით. მან "ლელოსთან" ახალ კლუბზე, პირველ გოლსა და სხვა საინტერესო ამბებზე ილაპარაკა...

- პირველი გოლი ახალ გუნდსა და ახალ ჩემპიონატში მნიშვნელოვანია. იმედია, ამის მერე უფრო თავდაჯერებული გახდებით...
- ...თან "რანდერსში" პირველი გოლი ძალიან მნიშვნელოვან შეხვედრაში გავიტანე - ეს გუნდი დანიის სუპერლიგაში პირველ ადგილზეა. ცუდი ის არის, რომ წავაგეთ. რა თქმა უნდა, ეს გოლი ჩემთვის ძალიან ბევრს ნიშნავდა. მართალი ხართ, შემდეგ თამაშებში უფრო თავდაჯერებული ვიქნები.

- დანიურ ფეხბურთს და, ზოგადად, სისტემას როგორ შეეგუეთ?
- ერთი კვირის წინ მწვრთნელი შეგვეცვალა. გუნდში ჰოლანდიელი რიკარდო მუნიზი მოვიდა, ახალი ენერგია და ახალი მუხტი მოიტანა. მართლა კარგი მატჩი ჩავატარეთ, ვიგებდით კიდეც, თუმცა... შემდეგ არ გაგვიმართლა - კაცი გაგვიგდეს და "ნორდსიელანდმა" ეს ძალიან კარგად გამოიყენა. დარწმუნებული ვარ, "რანდერსის" დღევანდელ შემადგენლობას კარგი პოტენციალი აქვს და წინ გამარჯვებები გველის.

- რა არის დანიური ფეხბურთის მთავარი სირთულე, რასაც საქართველოდან წასული ფეხბურთელები აწყდებით?
- დანიური ფეხბურთი ძალიან ბევრ ენერგიას მოითხოვს. ბურთით რომ ხარ, ერთი წამით არ უნდა მოდუნდე, თორემ მცველი აუცილებლად ფეხზე "დაგაჯდება" და დაკარგავ. ვფიქრობ, ეს ჩემთვის კარგი სკოლაა, რადგან დღევანდელი ფეხბურთი სწორედ ასეთია - წამით არ უნდა მოდუნდე.

- საერთოდ, ქართველების უმრავლესობას დანიურ ფეხბურთთან შეგუება უჭირს...
- ვერ დაგეთანხმებით. თუ უყურებთ, "სილკებორგში" ძალიან კარგად თამაშობენ სხირტლაძე და ვაწაძე - ლიგაში ერთ-ერთი უძლიერესი შემტევი დუეტია. დარწმუნებული ვარ, ზივზივაძე და პარუნაშვილი იტყვიან თავიანთ სიტყვას. ასე რომ, ყველაფერი წინ არის.

- ნაკრებზეც უნდა გკითხოთ. თქვენი აზრით, უახლოვდებით სანაკრებო კონდიციებს? პირველ რიგში, ფიზიკურ გამძლეობას ვგულისხმობ?
- ფიზიკურადაც და გამძლეობითაც დღეს ძალიან კარგად ვგრძნობ თავს და სასურველ კონდიციებსაც მივაღწიე. თუ ნაკრების მწვრთნელი ჩემს გამოძახებას გადაწყვეტს, მე მზად ვარ.

- ნაკრებში სათამაშოდ, ერთ-ერთი მთავარი ფაქტორი ფსიქოლოგიური სიძლიერეა. აქ კონკურენციაა დასაძლევი, იქ ვარსკვლავის წინააღმდეგ მუხლი არ უნდა აგიკანკალდეს და ათასი რამ...
- გეთანხმებით. ნაკრებში პირველი მატჩი რომ ვითამაშე, ამხანაგური შეხვედრა იყო, მაგრამ ჩემთვის მაინც ძალიან ბევრს ნიშნავდა. საბედნიეროდ, გოლიც გავიტანე.

- ბოლოს შესარჩევ ციკლში საქართველოს ნაკრების თამაშზე რას იტყვით?
- მიმაჩნია, რომ მთლიანობაში გუნდი შეიკრა და ბოლო მატჩებში ბიჭები ძალიან კარგად გამოიყურებოდნენ. რაც ყველაზე მთავარია, ჩემი აზრით, უკეთესი მომავლის იმედი გაჩნდა.

- უკეთესი მომავლის იმედი საიდან გაგიჩნდათ? გულშემატკივრები ფიქრობენ, რომ ნაკრებმა ციკლი ჩააგდო. მეორე საკითხია, რამდენად რეალური მიზნების გადაწყვეტას ითხოვს ხალხი...
- ქართველი გულშემატკივარი ძალიან მომთხოვნია და ჩემი აზრით, ეს ძალიან კარგია. მართალია, ნაკრებმა ამ ციკლში შესაფერისი და გულშემატკივრისთვის მისაღები სატურნირო ადგილი ვერ დაიკავა, მაგრამ ვიმეორებ, მომავლის იმედი ნამდვილად არის.

- რა გაიმედებთ?
- ვნახე მონაცემები - "დინამოს", "ლოკომოტივის", "სამტრედიას" და სხვა გუნდების ფეხბურთელებმა რამდენი კილომეტრი დაფარეს...

- "პოლარის" სისტემით დაფიქსირებულ შედეგებს გულისხმობთ?
- დიახ. გამიკვირდა, ისეთი შედეგები იყო.

- გასაკვირი რა იყო?
- ეს ევროპული დონის მაჩვენებლები იყო. აქაურ მაჩვენებლებს ბევრით არ ჩამორჩებოდა. მეორე ფაქტორი აქედან გამომდინარეობს: ეს აჩვენებს, რომ ქართველი ფეხბურთელებიც ნელ-ნელა ეწყობიან დღევანდელ ფეხბურთს.

- ვითომ?
- კი, ეს ფაქტია სწორედ "პოლარის" სისტემის მიერ დაფიქსირებული შედეგებით. ამიტომაც ვამბობ, რომ იმედი მაქვს, მომავალში ჩვენ მეტი პროგრესი გვექნება და კარგი მომავალიც გველოდება.

ყოველდღიური სპორტული გაზეთი "ლელო"

1386
მკითხველის კომენტარები / 0 /
მსგავსი ამბები
რუბრიკის სხვა სიახლეები