საბურთალომ ბულგარელებს წაუგებელი სერია შეუწყვიტა

"საბურთალომ" თურქულ შეკრებაზე ბოლო საკონტროლო შეხვედრა გამართა - გიორგი ჭიაბრიშვილის გუნდი ბულგარეთის მთავარი ლიგის მეხუთეადგილოსან პლოვდივის "ბოტევს" შეხვდა, რომელმაც გასულ წელს ქვეყნის თასი და სუპერთასი მოიგო.

ბულგარული კლუბის ვებგვერდის ცნობით, მატჩს ჩაშლა ემუქრებოდა, რადგან თავდაპირველად შერჩეულ სტადიონზე მოედნის საფარი არ ვარგოდა და შემდეგ გუნდებმა სიდეში სხვა მოედანზე გადაინაცვლეს.

ამ შეხვედრამდე "ბოტევმა" რეკორდი დაამყარა - 2017 წლის 18 სექტემბერს გასვლაზე რაზგრადის "ლუდოგორეცთან" 1:2 რომ წააგო, მას მერე ნიკოლაი კიროვის გაწვრთნილებს ოფიციალურ შეხვედრებში 17-მატჩიანი წაუგებელი სერია ჰქონდათ. პლუს, თურქულ შეკრებაზე ნიშის (სერბეთი) "რადნიჩკისთან" 2:2 ითამაშეს, ხოლო უკრაინულ "ოლექსანდრიას" 1:0 მოუგეს.

მართალია, არაოფიციალურ მატჩში, მაგრამ ბულგარელთა წაუგებელი სერია ქართულმა გუნდმა შეაჩერა. მე-14 და 32-ე წუთებზე "საბურთალოს" ანგარიშის გახსნის რეალური შანსები ჰქონდა, მაგრამ ვაგნერ გონსალვეშმა და ელვინ ტერამ ამ შესაძლებლობებით ვერ ისარგებლეს.

მოგვიანებით, თბილისელთა შეტევებმა მაინც გამოიღო შედეგი: 27-ე წუთზე დავით ვოლკოვი საჯარიმოსთან ორ მცველს გასცდა და მეკარესთან პირისპირ გაიყვანა დიმიტრი ტატანაშვილი, რომელმაც მეკარეს შორეულ კუთხეში ზუსტად დაურტყა - 1:0.

36-ე წუთზე გატანილ გოლშიც ვოლკოვის წვლილი იყო. თბილისელთა თავდამსხმელი კარის წინ თავით პასს ისევ ტატანაშვილს უკეთებდა, მაგრამ მცველმა ბურთი ჩაჭრა და მოიგერია, თუმცა ეს უხეიროდ გამოუვიდა და კარის წინ თავისუფლად დარჩენილმა ვოლკოვმა შანსი გოლად აქცია - 2:0.

მე-40 წუთზე ბულგარელმა რადოსლავ ტერზიევმა ქართველი ფეხბურთელის წინააღმდეგ ძალიან იუხეშა და არბიტრისგან პირდაპირ წითელი ბარათი დაიმსახურა.

ბულგარელები მეორე ნახევარშიც უხეშობდნენ, რამდენჯერმე საბურთალოელები წყობიდან გამოვიდნენ და ჭიაბრიშვილს შეგირდების დაწყნარებაც უწევდა. ისმოდა "საბურთალოს" მწვრთნელის შეძახილები - "შეეშვით! მაგათ თამაში არ იციან და ეტყობა ჩხუბი უნდათ. თავი დაანებეთ"!

მეორე ტაიმში ბულგარელები სხვაობის შემცირებას ცდილობდნენ. შანსები თბილისელებსაც ჰქონდათ, თან უფრო რეალურიც - დიმიტრი ტატანაშვილმა მცველი მოატყუა და მეკარესთან დასარტყმელ პოზიციაზე დარჩენილმა ახლო მანძილიდან მიზანს ააცილა. მერე კი ნოდარ იაშვილმა ფლანგური გადაცემით კარის წინ გიორგი კოხრეიძე დატოვა მარტო, მაგრამ სიზუსტემ ამ უკანასკნელსაც უმტყუნა.

ამ შეხვედრაში "საბურთალოს" მაისურა პირველად მოირგეს გიორგი რეხვიაშვილმა და გეგა დიასამიძემ, რომლებმაც ბოლო 20-20 წუთი ითამაშეს.

საბურთალო: კუპატაძე, მალი, გრიგალაშვილი, ცნობილაძე, ლაკვეხელიანი, ელვინ ტერა, გვარაძე, გორგიაშვილი, ვაგნერი, ტატანაშვილი, ვოლკოვი; მეორე ტაიმი: კუპატაძე, იაშვილი, მარგველაშვილი, გრიგალაშვილი (70. რეხვიაშვილი), ჩაბრაძე, მამუჩაშვილი, თარხნიშვილი, ალთუნაშვილი, ჯინჯოლავა, კოხრეიძე, ტატანაშვილი (70. დიასამიძე).

მოკლედ, "საბურთალომ" პირველი შეკრება ორი გამარჯვებითა და ერთი ფრით დაასრულა. 31 იანვარს თბილისელები სამშობლოში დაბრუნდებიან და მალევე გაემგზავრებიან მეორე თურქულ (ისევ - სიდეში) შეკრებაზე, სადაც 3-დან 18 თებერვლამდე მოემზადება.

"საბურთალოს" ახალგაზრდა ფეხბურთელი ბექა გვარაძე დარწმუნებულია, რომ ამ გუნდს ეროვნულ ლიგაში წარმატების მიღწევა შეუძლია.

"პირველი შეკრებისას ბევრს ვვარჯიშობდით "ფიზიკაზე", დიდი დატვირთვები გვქონდა, მაგრამ შეკრებაც სწორედ ამისთვისაა - ძალების აღდგენას ვარჯიშიდან ვარჯიშამდე ვასწრებდით. "საბურთალო" რამდენიმე ფეხბურთელით გაძლიერდა, ყველა პოზიციაზე დიდი კონკურენციაა და ამ შემადგენლობით ევროტურნირებზე გასვლა შეგვიძლია", - ამბობს გვარაძე.

ყოველდღიური სპორტული გაზეთი "ლელო"
280
მკითხველის კომენტარები / 0 /
მსგავსი ამბები
რუბრიკის სხვა სიახლეები