'საბურთალომ' პირველი შეკრება მარცხით დაასრულა

„საბურთალომ“ თურქულ შეკრებაზე ორი საკონტროლო შეხვედრა გამართა. საქართველოს ჩემპიონი მაკედონიის ორ გუნდს დაუპირისპირდა - ერთს დაუზავდა, ხოლო შემდეგ დამარცხდა.

გიორგი ჭიაბრიშვილის გუნდი დილით მაკედონიის ჩემპიონატის მესამეადგილოსან „პანდევის აკადემიას“ გაეჯიბრა. მე-8 წუთზე გიორგი თევზაძის ფლანგური გარღვევის შემდეგ ახლოდან ლაშა შინდაგორიძემ ზუსტად დაარტყა. მეტოქემ ანგარიში პირველივე ნახევარში გაათანაბრა და საბოლოოდ - 1:1.
„საბურთალო“: შელიხოვი, მალი, მარგველაშვილი, კაკუბავა, თევზაძე, ტერა, გი, ვაგნერი, გვარაძე, შინდაგორიძე, როლოვიჩი; შეცვლაზე შევიდნენ: მეგრელიშვილი, გულიაშვილი, ბ. ხარაიშვილი.

საღამოს „საბურთალო“ ასევე მაკედონიურ „რაბოტნიჩკის“ შეხვდა, რომელიც თავისი ქვეყნის ჩემპიონატში მე-4 ადგილზეა. სამივე გოლი საწყის წუთებზე გავიდა. ჯერ გიორგი კოხრეიძემ ითამაშა დამატებაზე კარგად, ხოლო მომდევნო შვიდ წუთში ბალკანელებმა ორი გოლი გაიტანეს. ჯერ მაკედონიის ნაკრების თავდამსხმელი ბლაჟე ილიოსკი მეკარესთან პირისპირ დარჩა და შანსი გოლად აქცია, მე-13 წუთზე კი მანვე, კუთხურის გათამაშების შემდეგ, ბურთი საჯარიმოს სიახლოვესთან მიიღო და „საბურთალოს“ მეკარე ომარ მიგინეიშვილს დაბალი დარტყმით გაუტანა - 1:2.

მეორე ნახევარში ორივე გუნდს ჰქონდა გატანის შანსი. ანგარიშის გათანაბრების შესაძლებლობა ორჯერ ჰქონდა გურამ გოშთელიანს, მაგრამ მეკარემ არ გაატანინა. ერთ-ერთ ეპიზოდში კი უკვე მიგინეიშვილმა მოახერხა თერთმეტმეტრიანის მოგერიება.

მეტოქეთა მცდელობის მიუხედავად, ანგარიში აღარ შეცვლილა და „საბურთალო“ შეკრებაზე პირველად დამარცხდა.

საბურთალო-რაბოტნიჩკი 1:2
1:0 კოხრეიძე (5), ილიოსკი 1:1 (6), 1:2 ილიოსკი (13)
საბურთალო: მიგინეიშვილი, ჩაბრაძე, ცნობილაძე, ლაკვეხელიანი, გორგიაშვილი, ალთუნაშვილი, დიასამიძე, გოშთელიანი, კოხრეიძე, დვალიშვილი; შეცვლაზე შევიდნენ: მეგრელიშვილი, ბ. ხარაიშვილი, გულიაშვილი.

ამ მატჩით საქართველოს ჩემპიონმა პირველი თურქული შეკრება დაასრულა და თბილისში გამოემგზავრა. მეორე შეკრებას „საბურთალო“ 6-19 თებერვალს კვლავ სიდეში გაივლის.

ყოველდღიური სპორტული გაზეთი "ლელო"
705
მკითხველის კომენტარები / 0 /
მსგავსი ამბები
რუბრიკის სხვა სიახლეები
;