ეროვნული ლიგა. საბურთალოს მორიგი გამარჯვება

დედაქალაქურმა "საბურთალომ" მეცხრე ტურის შეხვედრაში "სამტრედიას" უმასპინძლა და შეხვედრის 69-ე წუთზე, გეგა დიასამიძის მიერ გატანილი გოლის წყალობით მეტოქე მინიმალური სხვაობით დაამარცხა, 1:0. 

რაც შეხება დღევანდელ შეხვედრას, თბილისური კლუბისათვის რთული გამოდგა - მეტოქეს ძირითადად აქცენტი კარის უსაფრთხოებაზე ჰქონდა გადატანილი და კონტრშეტევებით ცდილობდა ფონს გასვლას. საწყის წუთებზე "საბურთალოს" ორი მომენტი შეექმნა - ჯერ დიმიტრი ტატანაშვილი ურტყამდა შორი მანძილიდან და ბურთი ძელს მოხვდა. მალევე კი ბექა გვარაძემ გაისროლა საჯარიმოს გარედან და სამტრედიელთა მეკარე ომარ მიგინეიშვილმა კუთხურზე მოიგერია ბურთი. ამ სტანდარტულს კი გიორგი რეხვიაშვილის თავური მოჰყვა, ბურთი კი მცირედით ასცდა მოწინააღმდეგის კარს.

მეორე ტაიმში მოედანზე ვითარება არ შეცვლილა - იმერლები პერიოდულად სახიფათო კონტრშეტევებს ახორციელებდნენ, თბილისელები კი გოლის გატანას ცდილობდნენ. 69-ე წუთზე კი შეხვედრაში ერთადერთი გოლი გავიდა - გეგა დიასამიძემ საჯარიმოს გარედან მეკარისგან მარჯვენა დაბალ კუთხეში დაარტყა და გახსნა ანგარიში. დარჩენილ დროში "სამტრედია" ცდილობდა შეხვედრის გადარჩენას, მაგრამ კარის აღების რეალური საგოლე მომენტი არ შექმნია. საბოლოოდ, "საბურთალომ" მატჩი გამარჯვებამდე მიიყვანა და მიმდინარე სეზონში მეშვიდე მოგებას მოუყარა თავი.

1 მაისი. "მიხეილ მესხი". 350 მაყურებელი

საბურთალო - სამტრედია 1:0 (0:0)

საბურთალო: კუპატაძე, იაშვილი, მარგველაშვილი, რეხვიაშვილი, ნადარაია (ლაკვეხელიანი 62), გორგიაშვილი, თარხნიშვილი (ალთუნაშვილი 65), ვაგნერი, გვარაძე, დიასამიძე, ტატანაშვილი (გოშთელიანი 80).

სამტრედია: მიგინეიშვილი, დაუშვილი, კირკიტაძე, გი, ბაჩიაშვილი, ჩაჩუა, კერძევაძე, სანია, ქარქუზაშვილი, მესიაჩენკო (ერისთავი 73), ხაბეიშვილი (ქაშიბაძე 76).

გოლი: 1:0 დიასამიძე (69)

გაფრთხილება: ნადარაია (57), თარხნიშვილი (61).

"საბურთალოს" პრესსამსახური

820
მკითხველის კომენტარები / 0 /
მსგავსი ამბები
რუბრიკის სხვა სიახლეები
;