საბურთალოს ჩემპიონობის შანსი. ლაშა ნოზაძე: 26 ნოემბრის მატჩის მნიშვნელობას ყველა აცნობიერებს!

წლებია, ლაშა ნოზაძე "საბურთალოში" მუშაობს. მან ყველა საფეხური გაიარა - ბავშვების ჯგუფიდან საბურთალოელთა მთავარი მწვრთნელის თანაშემწეობამდე. ახალგაზრდა სპეციალისტი დარწმუნებულია, რომ გუნდი საჩემპიონო შანსს ხელიდან არ გაუშვებს...

"ჩემპიონატის ბოლოსკენ კლუბებს 3 ქულის მოპოვება სულ უფრო უჭირთ. რითია ეს განპირობებული? არიან გუნდები, რომლებიც სამეულისთვის იბრძვიან, ზოგი კი - გასავარდნ ზონაშია. აქედან გამომდინარე, ქულები ყველას ესაჭიროება. მარტივი თამაში არსად გველის, არც საკუთარ კედლებში და, მით უფრო, არც მეტოქის მოედანზე. ამიტომაა, ბოლო დროს მოპოვებულ სამ ქულას განსაკუთრებული ფასი რომ დაედო. თბილისის "ლოკომოტივთან" მთელი მატჩის განმავლობაში

ვფლობდით სათამაშო და ტერიტორიულ უპირატესობას და ანგარიშიც მიგვყავდა, თუმცა საბოლოოდ მატჩი ფრედ დასრულდა. ვერ მივიყვანეთ თამაში ლოგიკურ დასასრულამდე. თუმცა, ფეხბურთში ხშირია მსგავსი ფაქტები. ამ გუნდთან ყოველთვის რთული და დაძაბული მატჩები გვაქვს, არც ბოლო შეხვედრა იყო გამონაკლისი", - ვკითხულობთ ლაშა ნოზაძის სიტყვებს "საბურთალოს" ოფიციალურ ფეისბუქ-გვერდზე.

მისი აზრით, "გრძელი სკამია" საჭირო იმისთვის, რომ ხანგრძლივი მარათონი გუნდმა მაღალ დონეზე ჩაატაროს: "უნდა გყავდეს ორი შემადგენლობა, რომ ხანდახან ფეხბურთელებს ამოსუნთქვის საშუალება მივცეთ. როცა ჩემპიონატს ვიწყებდით, "საბურთალოს" ორი თანაბარი ძალის შემადგენლობა ჰყავდა.

ახლაც ასეა, თუმცა, ტრავმებისა და სხვადასხვა მიზეზის გამო, რამდენიმე ფეხბურთელი სულ გვაკლდა. ჩემპიონატის დაწყებამდე კლუბის მიზანი სამეულში მოხვედრა და ევროტურნირებზე თამაში იყო, თუმცა რეალურად ახლა სხვა სურათია. ჩემპიონატის მსვლელობამ დაგვანახა, რომ კიდევ უფრო მაღალი მიზნებისთვის ბრძოლა შეიძლებოდა. ამ წუთამდე ჩემპიონატის მთავარი ფავორიტები ვართ. ვეცდებით, პირველობა კარგ განწყობაზე დავასრულოთ. ამის შესაძლებლობა და რესურსი "საბურთალოს" ნამდვილად აქვს".

ეროვნულ ლიგაში "დინამოსთან" მომდევნო ტურის მატჩი, შესაძლოა, "საბურთალოს" ისტორიაში ყველაზე მნიშვნელოვანი გამოდგეს. "26 ნოემბრის მატჩის მნიშვნელობას ყველა აცნობიერებს. თუმცა ზედმეტ ეიფორიაში არ უნდა ჩავვარდეთ. გავალთ მოედანზე და ვეცდებით, ჩვენი ფეხბურთი ვითამაშოთ.

ყველაფერს გავაკეთებთ სამი ქულის მოსაპოვებლად. "საბურთალო" წლევანდელ სეზონს სტაბილურად ატარებს. ეს იმიტომ, რომ ჩვენი ახალგაზრდა ფეხბურთელები დიდი ხანია ერთად თამაშობენ, ბავშვობიდან ერთად მოდიან. ამავდროულად, უკვე სამი წელია, კლუბი უმაღლეს ლიგაში ასპარეზობს. ახალგაზრდა ფეხბურთელებს წლეულს რამდენიმე გამოცდილი მოთამაშეც შეემატა და ყველაფერმა ერთად მოიტანა სტაბილურობა".

ნოზაძე სხვა გუნდებზეც ლაპარაკობს. მაგალითად, ის ფიქრობს, რომ წლევანდელ ჩემპიონატში ქუთაისის "ტორპედოს" მეტი შეეძლო: "ცხრილში გუნდები ლოგიკურად არიან გადანაწილებულნი, განსაკუთრებით პირველი სამეული. თბილისის "ლოკომოტივისგან" უფრო მეტი იყო მოსალოდნელი. ამ გუნდს უფრო მაღალი მიზნებისთვის ბრძოლაც შეუძლია. რაც შეეხება "ტორპედოს", პირველ და მეორე წრეში ის სათანადოდ ვერ გამოიყურებოდა, მაგრამ ამას, შესაძლოა, ჰქონდეს თავისი მიზეზები. მათ ახლა გაცილებით ძლიერი შემადგენლობა ჰყავთ და ეს დაამტკიცეს კიდეც".

ყოველდღიური სპორტული გაზეთი "ლელო"
1161
მკითხველის კომენტარები / 0 /
მსგავსი ამბები
რუბრიკის სხვა სიახლეები
;