'საბურთალო' გაძლიერებას იწყებს პირველი ლეგიონერი: მცველი, რომელსაც სერია A-ში უთამაშია და თავდამსხმელი ისრაელიდან

სეზონის დასრულების შემდეგ სატრანსფერო “ფანჯარა” გაიხსნა და მეტ-ნაკლებად აქტიური კლუბებიც გამოიკვეთნენ. თავიდან, თითქოს, ჩრდილში მოექცა “საბურთალო”. გაჩნდა აზრი, რომ ჩემპიონი არათუ ძლიერდებოდა, არამედ პირიქით - სუსტდებოდა.

შეგახსენებთ, “საბურთალო” სამმა მოთამაშემ (დიმიტრი ტატანაშვილი, დავით თარგამაძე და ნოდარ იაშვილი) დატოვა. გუშინ ამ სიას დავით ვოლკოვიც (მას ქვემოთ ცალკე თავს დავუთმობთ) შეუერთდა.

ცნობილი გახდა, რომ ორი მათგანი “საბურთალოს” კონკურენტ გუნდებში გადავიდა: იაშვილი თბილისის “დინამოში”, ხოლო ვოლკოვი, დიდი ალბათობით, ქუთაისის “ტორპედოში” ითამაშებს.

არადა, გულშემატივარი “საბურთალოსგან” ყველაზე მეტ აქტიურობას ელოდა, იმიტომ, რომ ევროსარბიელზე გასული კლუბი უკვე საქართველოს წარმოადგენს და მოთხოვნებიც იზრდება. 

“საბურთალო” კი ამტკიცებს, არათუ სუსტდება, სწორედაც რომ ძლიერდება. აღმოჩნდა, რომ იაშვილის ნაცვლად გუნდში მარჯვენა მცველის ადგილზე რუმინეთის ნაკრებსა და სერია A-ში ნათამაშები კონსტანტინ ნიკა ითამაშებს.

კონსტანტინ ნიკა

დაიბადა 1993 წლის 18 მარტს, აფუმანში (რუმინეთი)

სიმაღლე: 185 სმ

პოზიცია: მცველი

ახალგაზრდული კარიერა

1999-12          დინამო ბუქ

პროფესიული კარიერა

2012-13          დინამო ბუქ  22(2)

2013-18          ატალანტა     7(0)

2014-15          ჩეზენა (იჯარა)        8(0)

2015-16          აველინო (იჯარა)    22(0)

2016-17          ლატინა (იჯარა)      13(0)

2017-18          დინამო ბუქ (იჯარა)          3(0)

სანაკრებო კარიერა

რუმინეთი    U19     6(0)

რუმინეთი    U21     7(0)

რუმინეთი    (ერ)    1(0)

ატალანტა და იჯარები

კონსტანტინ ნიკა მარჯვენა მცველია. ბუქარესტის “დინამოში” გაზრდილმა პირველად რუმინეთის ჩემპიონატში 2012 წლის 5 მაისს ითამაშა.

2013 წლის 11 ივლისს “ატალანტამ” ბუქარესტის “დინამოსგან” მოთამაშის უფლებათა 85% 1,6 მილიონ ევროდ შეიძინა. გუნდში სადებიუტო შეხვედრა 2013 წლის 18 აგვისტოს იტალიის თასზე ჩაატარა, რომელშიც “ატალანტამ” “ბარი” 3:0 დაამარცხა. სერია A-ში კი პირველად კრისტიან დელ გროსოს შემცვლელად გამოჩნდა.

2014 წლის 11 ივლისს “ჩეზენამ” ნიკა სრული სეზონით დაიმატა. რუმინელ ფეხბურთელს დებიუტი “იუვენტუსთან” შეხვედრაში ჰქონდა. 2016-17 სეზონში ის უკვე “ლატინას” შეუერთდა. ბოლო ორი წელი კი ასევე იჯარით ბუქარესტის “დინამოში” გაატარა.

საერთაშორისო კარიერა

ნიკამ რუმინეთის ეროვნულ ნაკრებში 2013 წელს აგვისტოში, 20 წლისამ სლოვაკეთთან ითამაშა. 2012 წლის აგვისტოში კი მას დებიუტი ჰქონდა რუმინეთის 21-წლამდელთა ნაკრებში შვედეთის წინააღმდეგ გამართულ ამხანაგურ მატჩში.

ბუქარესტის “დინამოში” მოიპოვა ორივე ტიტული: 2012 წელს რუმინეთის თასს დაუფლა, ხოლო 2012 წელს - სუპერთასს.

ლეანდროზე უკეთესი?

“საბურთალო” თავდასხმაში გაძლიერებასაც აპირებს. კლუბში ელიან თავდამსხმელს ისრაელიდან და დარწმუნებულები არიან, რომ ის უკეთესია, ვიდრე ლეანდრო რიბეირო, რომელმაც ისრაელში თავის გამოჩენა ვერ მოახერხა.

მას და კიდევ რამდენიმე საინტერესო მოთამაშეს უახლოეს პერიოდში წარადგენენ. პირველ შეკრებამდე გადაწყდება, “საბურთალო” კიდევ ვის დაიმატებს. ფაქტია, რომ გუნდმა სატრანსფერო პრიორიტეტი შეიცვალა და ქართულის მაგიერ, უცხოურ ბაზარზე გასვლა ამჯობინა, რადგან ევროსარბიელისთვის გაძლიერება სურს. ამ საქმეში კი ისეთი ფეხბურთელების მიწვევა სურთ, რომელთაც საერთაშორისო გამოცდილება აქვთ და გუნდს გააძლიერებენ.

ყოველდღიური სპორტული გაზეთი "ლელო"
2969
მკითხველის კომენტარები / 0 /
მსგავსი ამბები
რუბრიკის სხვა სიახლეები
;