საბურთალო-კოლხეთი 6:3 - დაცვის გარეშე

ვისაც ფეხბურთი უყვარს, გოლებსაც აფასებს. გუშინ "საბურთალომ" და "კოლხეთმა" გოლების ფოიერვერკი გვიჩვენეს, თუმცა ვერ ვიტყვით, რომ ეს იყო სუპერმატჩი.

ზოგადად, დაცვაში ის თამაში, რომელსაც აჩვენებს "კოლხეთი", არანაირად არ შეესაბამება საფეხბურთო სტანდარტებს. შეიძლება ითქვას, რომ ამ გუნდს დაცვა საერთოდ არ ჰყავს.

ვეჭვობთ, თავისი გუნდის უკანა ხაზის მოქმედებით კმაყოფილი არც "საბურთალოს" მთავარი მწვრთნელი გიორგი ჭიაბრიშვილი დარჩებოდა. თბილისელებმა დამაჯერებლად კი მოიგეს, მაგრამ დაცვაში მათი გარჯა ასევე შორს იყო იდეალურისგან.

შეხვედრის საუკეთესო მოთამაშედ ლაშა შინდაგორიძეს დავასახელებდით, თუმცა მისი დუბლის გარდა კიდევ ორი ვიხილეთ - დაჩი ცნობილაძისა და ალექსანდრ დერებჩინსკისგან.

"კოლხეთი" კი გამორჩეული გუნდია საქართველოს ჩემპიონატში - იქმნება შთაბეჭდილება, რომ ფოთელები მხოლოდ საკუთარი სიამოვნებისთვის თამაშობენ. არადა, მათი სატურნირო მდგომარეობა უმძიმესია...

საბურთალო
6
კოლხეთი
3
15.10. თბილისი. დავით პეტრიაშვილი
გოლები: 1:0 ცნობილაძე (21), 2:0 ცნობილაძე (27), 2:1 დერებჩინსკი (46), 3:1 კოხრეიძე (50), 4:1 შინდაგორიძე (57), 4:2 დერებჩინსკი (66), 5:2 შინდაგორიძე (71), 5:3 ნონდი (86), 6:3 ვოლკოვი (87)
საბურთალო (4-2-3-1): კუპატაძე - იაშვილი, მარგველაშვილი, ცნობილაძე, ლაკვეხელიანი (66. თედ. გრიგალაშვილი) - თარხნიშვილი, მამუჩაშვილი - ვოლკოვი, ხარაიშვილი (63. ტერა), შინდაგორიძე - კოხრეიძე (59. მუიეცი).
სათადარიგოები: გოშაძე, მალი, ბიძინაშვილი, გვარაძე
მწვრთნელი: გია ჭიაბრიშვილი
კოლხეთი (4-2-3-1): სეფიაშვილი - გ. კილასონია, გოგონაია, ვ. კილასონია, კაკულია - ნონდი, ბოლქვაძე - ბროვკო (51. მაჩარია), დერებჩინსკი, ჯანელიძე - ბუხაიძე (62. ჟიშკარიანი).
სათადარიგოები: შერმადინი, გურეშიძე, ბახია
მწვრთნელი: ნუგზარ თვარაძე
არბიტრი: გ. კიკაჩეიშვილი

თბილისურ მატჩში გუნდთან ერთად არ იყო მთავარი მწვრთნელი, უკრაინელი ალექსანდრ შტელინი. როგორც შევიტყვეთ, ის რაღაცაზე გაბრაზებულა და გუნდს თბილისში არ გამოყოლია. რა და როგორ იქნება მომავალში, ერთად ვნახავთ. ფაქტია, "კოლხეთი" ამ ეტაპზე გუნდს არ ჰგავს და მას დიდი ბრძოლა მოუწევს უძლიერესთა შორის ადგილის შესანარჩუნებლად.

მატჩის სტენოგრამა
2" - იაშვილის გადაცემის შემდეგ შინდაგორიძის დარტყმას ფოთელთა მცველი გადაეფარა.
5" - ბუხაიძე ხელსაყრელ სიტუაციაში აღმოჩნდა, თუმცა კარში ვერ დაარტყა.
17" - კოხრეიძის მორიგი შანსი. საბურთალოელთა ფორვარდი თავით ბურთს ვერ შესწვდა.
20" - შინდაგორიძის თავური. ბურთი ოდნავ სცდება ფოთელთა კარს.
21" - გოლი! ლაკვეხელიანის კუთხურის შემდეგ ცნობილაძემ "საბურთალო" დააწინაურა - 1:0.
26" - შინდაგორიძის შესანიშნავი დარტყმა და სეფიაშვილი აკრობატულ ნახტომში კუთხურზე იგერიებს ბურთს.
27" - გოლი! არეულობა ფოთელთა დაცვაში. შეტევაში ჩართული ცნობილაძე დუბლს ასრულებს - 2:0.
32" - დერებჩინსკიმ კარგი მდგომარეობიდან ვერ დაარტყა.
46" - გოლი! კუპატაძის უპატიებელი შეცდომა და დერებჩინსკი სხვაობას ამცირებს - 2:1.
50" - გოლი! ვარლამ კილასონიას შეცდომა. კოხრეიძე პირისპირ გადის მეკარე სეფიაშვილთან და გააქვს - 3:1.
57" - გოლი! კოხრეიძის აქტიურობის შემდეგ შინდაგორიძე "საბურთალოს" 3 ბურთით აწინაურებს - 4:1.
66" - გოლი! ჯანელიძის ჩაწოდების შემდეგ დერებჩინსკის თავურით გააქვს - 4:2.
71" - გოლი! შინდაგორიძის შორეული დარტყმა და ლამაზი გოლი - 5:2.
86" - გოლი! ნონდი ძლიერი დარტყმით ორ ბურთამდე ამცირებს სხვაობას - 5:3.
87" - გოლი! ჩაწოდება საჯარიმოში, ფოთელ მცველთა მორიგი შეცდომა და ვოლკოვი საბოლოო ანგარიშს აფიქსირებს - 6:3.

662
მკითხველის კომენტარები / 0 /
მსგავსი ამბები
რუბრიკის სხვა სიახლეები