საგანგებო მდგომარეობა  ბაიერნში!.. როცა გამოსავალი არც სანეს ტრანსფერშია და უკვე კრიტიკის ქარცეცხლში ხარ

გერმანიის სუპერთასი „დორტმუნდმა” მოიგო. მოიგო ისე, რომ განსაკუთრებულად არც არაფრით გამოუჩენია თავი.

ჩვენ, პრაქტიკულად, ვერაფერი შევიტყვეთ ახალი ლუსიენ ფავრის გუნდის შესახებ. მიუხედავად იმისა, რომ „დორტმუნდმა” ზაფხულში კარგი სატრანსფერო კამპანია ჩაატარა, სასტარტო შემადგენლობაში მხოლოდ ერთი ახალწვეული ვიხილეთ - ნიკო შულცი. 

გასული სეზონის შემადგენლობამ ითამაშა „ბაიერნშიც”. შეიქმნა ისეთი შთაბეჭდილება, რომ „ბაიერნის” ყველა ქმედება წინასწარ იყო გაშიფრული მოწინააღმდეგის მიერ. 

შესაძლოა, „რეკორდმაისტერს” არსებობის ისტორიაში საუკეთესო შემადგენლობა არ ჰყავს, მაგრამ იმ დონის ფეხბურთელები კი არიან გუნდში, რომ რაღაც არაორდინარული გააკეთონ. სწორედ ეს არის ნიკო კოვაჩის მინუსი. 

შეიძლება, არ იყო „ბაიერნის” გულშემატკივარი, მაგრამ არ შეიძლება, ამ დიდი კლუბის უსუსურობამ გული არ გატკინოს...

ჩაკეტეთ ტიაგო  და ბაიერნი დამთავრებულია!

„ბაიერნი” თავისი ხანგრძლივი ისტორიის განმავლობაში არასოდეს ყოფილა დამოკიდებული ერთ კონკრეტულ ფეხბურთელზე. ეს იმის მიუხედავად, რომ გუნდში ყოველთვის თამაშობდნენ კაშკაშა ვარსკვლავები. ახლა კი საქმე სხვაგვარადაა - საკმარისია, მოწინააღმდეგემ მოახერხოს ტიაგო ალკანტარას ჩაკეტვა, რომ „ბაიერნისგან” პრაქტიკულად აღარაფერი რჩება.

ცოტა ხნის წინ ნიკო კოვაჩმა ტიაგოს როლი ასე შეაფასა: „ჩვენთვის ის ნამდვილი ლიდერია. ტიაგო განსაკუთრებული ფეხბურთელია. ის მინდორზე ისე ფიქრობს, როგორც მწვრთნელი იფიქრებდა. ამდენად, მე პირდაპირ უნდა ვთქვა, რომ ნებისმიერი მწვრთნელისთვის ძალიან დიდი ფუფუნებაა გუნდში ისეთი ფეხბურთელის ყოფნა, როგორიც არის ტიაგო ალკანტარა”.

გასაგებია, რომ ალკანტარა მართლაც შესანიშნავი ფეხბურთელია, ერთ-ერთი საუკეთესოც - თანამედროვე ფეხბურთში, მაგრამ ზემოთაც ვთქვით - „ბაიერნი” არასოდეს ყოფილა დამოკიდებული ერთ კონკრეტულ ფეხბურთელზე ისე, როგორც არის ახლა და ამდენად, ძალიან ცუდია ის, რაც ახლა ხდება.

„დორტმუნდის” ნახევარდაცვამ ძალიან მაგრად გაანეიტრალა ტიაგო. ამდენად, „რეკორდმაისტერისგან” ფაქტობრივად აღარაფერი დარჩა. თავისთავად ცხადია, რომ გუნდს უნდა ჰქონოდა რაღაც დამატებითი იარაღი, მაგრამ... მათ არსენალში ეს იარაღი არ აღმოჩნდა, რაც ასევე ძალიან ცუდია.

ხამესი, როგორც  უდიდესი დანაკლისი

ხამეს როდრიგესს ბოლო წლებში ძალიან ბევრს აკრიტიკებდნენ. მართლაც, კოლუმბიელი ვარსკვლავი ვერ აჩვენებდა ისეთ ფეხბურთს, როგორსაც ამ ფენომენალური ნიჭის მქონე ფეხბურთელისაგან ელიან, მაგრამ ჩვენ დავრწმუნდით, რამხელა ძალა ყოფილა „ბაიერნისთვის” არცთუ კარგ ფორმაში მყოფი ხამესიც კი!

შეიძლება თამამად დაიწეროს, რომ მის გარეშე „ბაიერნის” თამაშში, პრაქტიკულად, არ იყო კრეატივი. შექმნას ვერავინ ახერხებდა და დაკარგული იყო ის შედარებითი სინატიფეც კი, რომელიც მინდორზე მისი ყოფნის დროს შეიმჩნეოდა „რეკორდმაისტერის” თამაშში. 

ამის თაობაზე ჯერ არაფერი ისმის, მაგრამ თუ წარმატებაზე ფიქრობენ, „ბაიერნის” ხელმძღვანელებს აუცილებლად მოუწევთ ხამესის შემცვლელზე ფიქრი. წინააღმდეგ შემთხვევაში, გუნდს ძალიან გაუჭირდება.

სხვა საქმეა, რომ დღევანდელ ფეხბურთში არცთუ ბევრია ხამესის დარი შესაძლებლობებისა და ამპლუის ფეხბურთელი, მაგრამ „ბაიერნი” გრანდია და გრანდებს სხვანაირად მოეთხოვებათ. არ შეიძლება, მათთვის თამასამ ძალიან დაბლა დაიწიოს. არის ზღვარი, რომელსაც „ბაიერნი” არავითარ შემთხვევაში არ უნდა ჩამოსცდეს. 

სანეს ტრანსფერი საშველი არ არის

ლეროი სანემ „ბაიერნთან” პირადი კონტრაქტის დეტალები შეათანხმა - ამ ინფორმაციამ უკვე მოიარა წამყვანი საინფორმაციო საშუალებები. რა თქმა უნდა, ეს ტრანსფერი, რომელიც სარეკორდო უნდა გახდეს კლუბის ისტორიაში, მდგომარეობას შედარებით გააუმჯობესებს, მაგრამ ეს არ არის გამოსავალი.
ყველა ვთანხმდებით იმაზე, რომ სანე ძალიან კარგი ფეხბურთელია. „მანჩესტერ სიტიში” მას ჰქონდა შესანიშნავი მატჩები, მაგრამ, მეორე მხრივ, ის ჯერ ძალიან ახალგაზრდაა და, გვინდა თუ არა, უნდა ვაღიაროთ - ამ დროისთვის მაინც ეპიზოდის ფეხბურთელად რჩება, თუმცა - მართლა ძალიან კარგ და ხარისხიან მოთამაშედ.

ნუ დაგვავიწყდება, რომ გასული სეზონის შემდეგ გუნდი ორმა მეგავარსკვლავმა და ნამდვილმა ლიდერმა დატოვა - ფრანკ რიბერიმ და არიენ რობენმა. მათი დანაკლისი იმდენად დიდია, რომ ზოგიერთი ექსპერტი ღიად წინასწარმეტყველებს კრიზისს „ბაიერნში”, თუმცა გულშემატკივრებს ამის გაგონება არ სურთ. მათ უნდათ, რომ უმაღლესი მიზნებისთვის მებრძოლი „ბაიერნი” იხილონ და ეს სავსებით ბუნებრივია.

მთავარი  დამნაშავე კოვაჩია?

გასულ სეზონში დადგა მომენტი, როცა ნიკო კოვაჩის გათავისუფლებას წინ პრაქტიკულად აღარაფერი ედგა. მერე თითქოს რაღაც შეიცვალა. გუნდმა ასე თუ ისე იპოვა საკუთარი თამაში და შედეგებიც გაუმჯობესდა. კლუბის ხელმძღვანელობამ აღარ გარისკა და კოვაჩი თანამდებობაზე დატოვა. 
ისე ჩანს, რომ მის მიუნხენურ კარიერაში კვლავ დაიწყო კრიზისის ხანა და თუ ასე გაგრძელდა, ის ამ ჩავარდნას ნამდვილად ვეღარ გადაიტანს.

სპეციალისტთა და გულშემატკივართა აბსოლუტური უმრავლესობა მიუნხენური გრანდის ჩავარდნაში დამნაშავედ სწორედ კოვაჩს მიიჩნევს და ეს არცთუ უსაფუძვლოა მიუხედავად იმისა, რომ კოვაჩის დაბალი კვალიფიკაციის გარდა, კიდევ არის ფაქტორები, რაც „ბაიერნის” სუსტ თამაშს განაპირობებს...

რატომ რჩება  რეკორდმაისტერი  მთავარ ფავორიტად?

და მაინც, ამ გადასახედიდან „რეკორდმაისტერი” გერმანიის ჩემპიონატის მთავარ ფავორიტად რჩება. რა გვაძლევს ასეთი ვარაუდის საფუძველს? გასულ სეზონში ბუნდესლიგის საჩემპიონო ინტრიგა ბოლომდე შენარჩუნდა, მაგრამ ამას ჰქონდა თავისი ლოგიკური მიზეზი. საქმე ისაა, რომ „დორტმუნდს” არაერთხელ გაუმართლა. გუნდი ხშირად იგებდა შეხვედრებს, რომლებშიც მოწინააღმდეგეს პრაქტიკულად არაფრით სჯობდა, მათ დიდ ნაწილში კი მხოლოდ უკანასკნელ წუთებზე გაჰქონდა გამარჯვების გოლი.

ამას უნდა დავამატოთ ისიც, რომ ცუდ ფორმაში იყო „ბაიერნის” ორი მთავარი ვარსკვლავი - მანუელ ნოიერი და რობერტ ლევანდოვსკი. უნდა ვივარაუდოთ, რომ ეს ორი ფეხბურთელი კარსმომდგარ სეზონს გაცილებით უკეთესად ჩაატარებს, ვიდრე გასულს. ეს უკვე რაღაცას ნიშნავს. მით უმეტეს, თუ ამას დაემატება „რეკორდმაისტერში” გაცილებით კვალიფიციური მწვრთნელის გამოჩენა...

„დორტმუნდი” კი ახალი სეზონის განმავლობაში ბოლომდე სტაბილური ვერაფრით იქნება. ამის გარანტიას ვერც „ბაიერნთან” შესანიშნავ სტილში მოგებული მატჩი იძლევა. ლუსიენ ფავრის მართლაც რომ ძალიან სიმპათიურ გუნდს აუცილებლად დაუდგება ჩავარდნის დრო. ამის წინასწარმეტყველება აქედანვე შესაძლებელია...

ყოველდღიური სპორტული გაზეთი "ლელო"
858
მკითხველის კომენტარები / 0 /
მსგავსი ამბები
რუბრიკის სხვა სიახლეები
;