სად ითამაშებს სამტრედია ახალ სეზონში?

ფეხბურთის ფედერაციის გადაწყვეტილებით, 2018 წლიდან ეროვნული ლიგის თამაშები ხელოვნურ საფარზე აღარ ჩატარდება. ის ჩანაფიქრიც ცნობილია, ახალი მოედნების დაგების პროგრამის განხორციელებას რომ გულისხმობს.

მაგრამ ჯერაც უცნობია, რომელი გუნდი სად ითამაშებს, მათ შორის - "სამტრედიაც". ეს უახლოეს პერიოდში გაირკვევა. ერონული ლიგის მესამეადგილოსნის სტადიონ "ეროსი მანჯგალაძეზე" რეკონსტრუქცია უნდა დაიწყოს, მაგრამ გულშემატკივრისთვის უცნობია, როდის დაიწყება მშენებლობა, რა სამუშაოები ჩატარდება, როდის დაუბრუნდება გუნდი მშობლიურ არენას და ასე შემდეგ.

კიდევ ერთი თემა: ახლახან, გაჩნდა ოფიციალური ცნობა, რომ სამტრედიაში ახალი 10-ათასიანი სტადიონის მშენებლობა გადაწყდა, რომლის პროექტის ტენდერი უნდა ჩატარებულიყო.

თუმცა, ასევე უცნობია, როდის აშენდება ეს არენა, რომელზეც გასული წლის შემდეგ ბევრი მითქმა-მოთქმა, მაგრამ ნაკლები ოფიციალური კომენტარია.

"ლელო" სამტრედიის მუნიციპალიტეტის მერს, ვალერიან ფოცხვერიას დაუკავშირდა და სტადიონთან დაკავშირებით სიახლეებზე ელაპარაკა...

- გავიგეთ, რომ სამტრედიაში ახალი 10-ათასიანი სტადიონისა და სპორტის სასახლის აშენება იგეგმება...

- დიახ, ასეთი ჩანაფიქრი არსებობს და ჩემი და ყველა სამტრედიელის დიდი სურვილიცაა, რომ ჩვენს ქალაქს თანამედროვე სტადიონი ჰქონდეს.

- რა ტიპის სტადიონზეა ლაპარაკი?

- მყარი ნაგებობა რკინაბეტონის კონსტრუქციებით და არა - მსუბუქი მასალებით აშენებული, ნახევრად გადახურული, უეფას სტანდარტები რომ დააკმაყოფილოს.

- ჩვენი ინფორმაციით, ჩანაფიქრის მიხედვით, ახალი სტადიონი კულაშში, ზოოვეტის ტერიტორიაზე უნდა აშენდეს...

- დიახ, სწორედ ასეა. ეს ახალი სტადიონი იქნება და ამ პროექტში "ეროსი მანჯგალაძე" არ იგულისხმება. მაგრამ ახალი სტადიონის აშენება 2018 წელს ვერ მოხერხდება. ეს სამომავლო გეგმაა.

- რატომ?

- იმიტომ, რომ იაფი პროექტი არ არის.

- დაახლოებით რა თანხაზეა ლაპარაკი?

- ახალი სტადიონის პროექტი 5 მილიონ ევროს ფარგლებშია.

- თუმცა ევროპული ფასების გათვალისწინებით, ძვირიც არ ეთქმის...

- კი ბატონო, მაგრამ, როგორც გითხარით, წელს ვერ მოხერხდება. მომავალ წელს კი ვნახოთ. იმედი გვაქვს, ახალი, თანამედროვე არენა სამტრედიაში უახლოეს პერიოდში გვექნება.

- მართალია, რომ კულაშში სტადიონის აშენება ემირგანტ ქართველებს სურთ?

- დაინტერესება არის, მაგრამ ეს ჯერ იდეის დონეზეა. მოგეხსენებათ, კულაშიდან საბჭოთა პერიოდში ბევრი წავიდა ისრაელში. მათ საქართველოსთან დღემდე კარგი ურთიერთობა აქვთ.

მარტო სპორტზე არ არის ლაპარაკი. ვნახოთ, აქედან რა გამოვა. ახლა გაცილებით რეალური "ეროსი მანჯგალაძის" განახლება და რეკონსტრუქციაა. ასეც მოხდება.

- და როდის დაიწყება რეკონსტრუქცია?

- მალე დაიწყება და იმედი გვაქვს, წლეულსვე დასრულდება. "ეროსი მანჯგალაძეზე" დასავლეთ მხარეს ტრიბუნები არ არის და ახლის აშენების შემდეგ იქ დაახლოებით 1 500 მაყურებელი დაეტევა.

ანუ სტადიონი 3000-მდე ქომაგს დაიტევს. იქვე მოეწყობა ახალი ადმინისტრაციული შენობა გასახდელებით, საშხაპეებითა და მატჩის მომსახურე პერსონალის ოთახებით. ამის გამო, "სამტრედიას" ახლომდებარე რაიონში მოუწევს თამაში.

- რომელ სტადიონზე?

- რამდენიმე ვარიანტი განიხილება. მთავარია, ჩვენი გუნდის საშინაო შეხვედრები სამტრედიიდან ახლოს ჩატარდეს, რათა გულშემატკივარს სტადიონზე მისვლა არ გაუჭირდეს.

ყოველდღიური სპორტული გაზეთი "ლელო"
1748
მკითხველის კომენტარები / 3 /
შესწორება.
0
80% უეფას სტანდარტის სტადიონები გადაუხურავია,მათგან 50% კი რკინა-ბეტონის კი არა თანამედროვე კონსტრუქციული მატერიალებითაა აგებული, იაფი, გამძლე და მობილური.
სტადიონი ეს სისტემაა და ის უნდა იყოს მორგებული სიტუაციას და ადგილობრივ თავისებურებებს.
სჯობს იმავე სტადიონს მისცენ წესიერი სახე, დაატრიბუნონ 10 000 მდე, ბოლომდე გააკეთონ სამტრედიაში რეკონსტრუქცია,უფრო იაფიც იქნება, ვიდრე ოცნებებით წლები გალიონ და საბოლოდ არაფერი გამოვიდეს.2012 წლიდან გვესმის ეს დაპირებები ხან სპორტული ქალაქის, ხან სტადიონების და სპორტის სასახლეეების. ყველაფერს ზღვარი აქვს, დაპირებებსაც.
vai
0
rogor sul gaurkvevloba samtredias irgvliv sad itamahebt jer ar icit vin mogyavt gundhi egac ar icit saertod icit cels ras izavs es gundi mitumets sxva stadionze gulhematkivaris garehe bevri yofilatamahebi maxsovs gulhematkivars mougia titkmis samtrediahi exla gundi satuo gvyavs sxva stadioni tu ar gavardit cels sagmiro sakme ikneba
მსგავსი ამბები
რუბრიკის სხვა სიახლეები
;