სად პიკფორდი და სად ჩვენ, არადა... იყო დრო, ქართველები პიკფორდს გვარიანად ამწარებდნენ

მუნდიალი თავის გზით მიდის და, რა გასაკვირია, რომ რუსეთში მიმდინარე დღესასწაულს უკვე ჰყავს თავისი გმირები.

ერთ-ერთი მათგანი უდავოდ ჯორდან პიკფორდია - ინგლისის ნაკრებისა და "ევერტონის" მეკარე, ვინც დიდებული იყო კოლუმბიასთან შეხვედრაში და შვედეთის ნაკრების ფორვარდებსაც მაგრად დაუდგა.

არადა, იყო დრო, ქართველები პიკფორდს გვარიანად ამწარებდნენ. თვალწინ გვიდგას 2010 წელს გამართული თბილისური ევროშესარჩევი მატჩი საქართველოსა და ინგლისს შორის, როცა ბაჩანა არაბულმა ულამაზესი გოლი გაუტანა პიკფორდს - მახვილგონივრული მანევრით ერთი მცველი გააცურა და პირდაპირ "ცხრიანში" გაუჭედა ბურთი ინგლისის ნაკრების მომავალ კიპერს...

დღეს პიკფორდი ნაღდი ვარსკვლავია. ის ბიჭები, მაშინ ინგლისის ნაკრებში რომ თამაშობდნენ, მაღალ დონეზე აგორებენ ბურთს, ჩვენები კი... მაგალითად, იგივე არაბული ახლახან გადავიდა ერთი უნგრული კლუბიდან ("ბალმაზივაროში") მეორეში ("პუშკაშ აკადემია"). ბევრი იმ გუნდიდან სულ შეეშვა ფეხბურთს, ხოლო ვინც თამაშობს, მხოლოდ თითოოროლა თუ ირჯება, ასე თუ ისე, სასურველ დონეზე.

იქნებ, მკითხველს პროფესიონალიზმი და რეჟიმისადმი ერთგულება გაახსენდეს უპირველეს ყოვლისა, მაგრამ არ გვგონია, ყველაფერი ამის ბრალი იყოს. ისევ არაბულის მაგალითი ავიღოთ - პირადად მე იშვიათად მინახავს, ფეხბურთელი ასე ზედმიწევნით იცავდეს რეჟიმს.

გეოგრაფიული მდებარეობა? ალბათ, გარკვეულწილად ესეც არის, მაგრამ გადამწყვეტ მნიშვნელობას ვერც ამას მივანიჭებთ. ალბათ, ჩვენი მთავარი პრობლემა ის არის, რომ არ გვაქვს სისტემა, ერთგვარი კონვეიერი, რომელიც ასაკობრივი ფეხბურთიდან დიდ ფეხბურთში სწორად გადასვლას უზრუნველყოფს.

ნიჭიერ ინგლისელს გამზადებული ხვდება პრემიერლიგური კლუბი, ახალგაზრდა ქართველს კი ბევრი ჩვენი მწვრთნელი იშვიათად ენდობა. მიაჩნიათ, რომ გამოცდილი ფეხბურთელი უფრო მოიტანს შედეგს, ვიდრე - ახალგაზრდა. ესეც არ იყოს, ზოგიერთ ჩვენს მწვრთნელსა და ფეხბურთელს შორის რაღაც უცნაური ჯადო-კავშირია: მეათე წრეზე რომ წავიდეს მწვრთნელი, მეათე შემთხვევაშიც მასთან ერთად იქნება ესა თუ ის მოთამაშე.

არის ვაი-მენეჯერების პრობლემაც. იმავე არაბულმა კარგა ხანი დაკარგა ესპანეთში, სადაც სრულიად უთამაშებელი იყო "ალკორკონში" იმის გამო, რომ კლუბთან კონტრაქტის გაფორმების დროს "ვიღაცას" "რაღაც" გამოეპარა. მოკლედ, პრობლემათა ჯაჭვი დიდია. ჩვენ საკუთარ ქვაბში ვიხარშებით, ამ დროს კი პიკფორდი მუნდიალზე ბრწყინავს...

ყოველდღიური სპორტული გაზეთი "ლელო"
2160
მკითხველის კომენტარები / 0 /