სად ხედავთ ფაშისტურ სიმბოლიკას?! უეფას გადაწყვეტილებამ დინამოს გულშემატკივრები გააოცა

ცნობილია, რომ უეფას სადისციპლინო კომიტეტის გადაწყვეტილებით, 15 აგვისტოს თბილისის "დინამომ" "ფეიენოორდს" უმაყურებლო "დინამო არენაზე" უნდა უმასპინძლოს. მიზეზი - აზერბაიჯანულ "გაბალასთან" ევროპალიგის თბილისური მატჩისას "დინამოს" ფანების სექტორში გამოფენილი ბანერი გახდა, რომელზეც უეფამ... ფაშისტური სიმბოლიკა დაინახა.

თბილისის "დინამოს" ფანებმა სოციალურ ქსელში თავიანთ ოფიციალურ გვერდზე - "ლეგენდა უკვდავია - დინამო თბილისი" - გაავრცელეს განცხადება, რომელშიც კატეგორიულად უარყოფენ, რომ ხსენებულ ბანერზე ფაშისტური სიმბოლიკაა გამოსახული და ამის დასტურად ავრცელებენ ფოტოს, რომელიც 3 წლის წინაა გადაღებული და ზუსტად ეს ბანერია გამოკიდებული, რაზეც უეფას, ცხადია, მაშინ რეაგირება არ მოუხდენია.

"ნუ ავრცელებთ არასწორ ინფორმაციას! ეს ფოტო გადაღებულია 2016 წლის 18 აგვისტოს. მატჩი: დინამო-პაოკ, ევროპალიგის საკვალიფიკაციო ეტაპი", - ასეთი მინაწერია ფოტოზე.

რაც შეეხება განცხადებას, მასში ვკითხულობთ: "უეფა "დინამოს" აჯარიმებს 50 000 ევროთი და სტადიონის დაკეტვით მომდევნო მატჩზე. მიზეზი ის ბანერია, რომელიც ფოტოზე მოვნიშნეთ. უეფას განმარტებით რიცხვი "88" "დინამოს" ფანებმა, როგორც ნაცისტური სიმბოლიკა ისე გამოიყენეს. რამდენად ტვინგარეცხილი უნდა იყო, რომ ბანერზე წარწერა OLD SCHOOL (ძველი სკოლა), ამასთანავე ციფრები "1" და "9", რომლებიც "8" და "8" ციფრებს ქვემოთ აწერია, ვერ შენიშნო. 1988 წელს "დინამოს" ფანების პირველი ორგანიზებული გასვლა შედგა, ტრიბუნაზე კი დგას ფანი, რომელიც იმ გასვლით მატჩზე იმყოფებოდა.

კარგად მოგეხსენებათ, ჩვენ, ქართველები, ხშირად ვამბობთ გასულ წლებზე ასე: "81-ში მოვიგეთ თასების თასი" და სხვა მსგავსი... ანუ ჩვენ თუ ვამბობთ, რომ 88-ში პირველი ორგანიზებული გასვლა შედგა "ფაშისტები" ვართ? უეფა ყველაფერს აკეთებს, რომ ფეხბურთი ჩაკლას ჩვენში და "დინამოსგან" მიიღოს ფული!", - წერია თბილისის "დინამოს" გულშემატკივართა განცხადებაში.

შეგახსენებთ, რომ უეფას სადისციპლინო კომიტეტის გადაწყვეტილებით, "დინამო" ვალდებულია, ტრიბუნებზე გამოფინოს ბანერი - #equalgame. ცნობილია, რომ თბილისური ვერდიქტის გასაჩივრებას აპირებს და ამისთვის 5-დღიანი ვადა აქვს.

3303
მკითხველის კომენტარები / 0 /
მსგავსი ამბები
რუბრიკის სხვა სიახლეები
;