საინტერესო სტატისტიკა. 2017 წელი და რეკორდები

თქვენ წინაშეა გასული წლის ყველაზე საინტერესო ფაქტები. მართალია, ფეხბურთი მარტო სტატისტიკა არ არის, მაგრამ ესეც ყოველთვის საინტერესოა. მაშ ასე, 2017 წელი ციფრების სარკეში...

0  ევროპალიგაზე გამართული "ლაციოსა" და "ნიცას" შეხვედრა, ალბათ, არასოდეს არავის დაავიწყდება. ამ მატჩში, არც ერთი გუნდის ფეხბურთელს, კარში არ დაურტყამს.

რა თქმა უნდა, მთელი შეხვედრის განმავლობაში უსაქმოდ იდგნენ მეკარეები - თომას სტრაკოშა და იონ კარდინალი. "ლაციომ" 1:0 მოიგო და ისიც... ავტოგოლის წყალობით.

2  ზინედინ ზიდანი გახდა პირველი მწვრთნელი "რეალის" ისტორიაში, ვინც ზედიზედ წააგო ორი საშინაო "ელ კლასიკო". პირველ შეხვედრაში ლიონელ მესიმ გაიბრწყინა და "რეალმა" 2:3 დათმო, დეკემბრის ბოლო ამბები კი ყველას კარგად გვახსოვს, როცა "ბარსელონამ" საძულველი მოწინააღმდეგისგან ქვა ქვაზე არ დატოვა.

11 ამდენი თერთმეტმეტრიანი დარტყმა დაინიშნა ევროპის ყველა ეროვნული ჩემპიონატის მონაწილე გუნდის კარში. ამ შემთხვევაში მხოლოდ ერთადერთი გამონაკლისი გვაქვს და ეს "ბარსელონაა".

14 ამდენი "სეივი" განახორციელა "არსენალთან" შეხვედრაში "მანჩესტერის" მეკარე დავიდ დე ხეამ. მან გაიმეორა ტიმ კრულისა და ვიტო მანონეს რეკორდები. სხვა არც ერთ მეკარეს არ მოუგერიებია ამდენი ბურთი პრემიერლიგის არც ერთ შეხვედრაში. შეიძლება ითქვას, ის თამაში ესპანელმა გოლკიპერმა პირადად მოიგო.

17 ამდენი გოლი მიიღო პრემიერლიგის სტარტზე "კრისტალ პალასმა" და თავად ერთიც ვერ გაიტანა. ეს ზოგადად ლიგის რეკორდია. სწორედ ამას შეეწირა "არწივების" მთავარი მწვრთნელი ფრანკ დე ბური.

21 ამდენი გოლი გაიტანეს 2017/18 წლების სეზონში "ჩელსის" ესპანელმა ფეხბურთელებმა.

48 ამდენჯერ ჩააწოდეს ბურთი "ინტერის" ფეხბურთელებმა "სასუოლოს" საჯარიმო მოედანში. ეს, შეიძლება, უფრო ინგლისის ქვედა დივიზიონის მაჩვენებელი იყოს, ვიდრე იტალიის პირველობის, მაგრამ ციფრებს ვერაფერს მოუხერხებ. საინტერესოა, რომ "ინტერმა" ის თამაში 0:1 წააგო.

55 ამდენი გატანილი გოლით დაასრულა კალენდარული წელი "ტოტენჰემის" ფორვარდმა ჰარი კეინმა. მან ერთბაშად რამდენიმე რეკორდი დაამხო.

56 ამდენი ქულა დააგროვა 60 შესაძლებლიდან "ნაპოლიმ" გასვლით შეხვედრებში.

102 ამდენი გოლი გაიტანა "სიტიმ" პრემიერლიგაში კალენდარული წლის განმავლობაში. ეს ლიგის ისტორიაში საუკეთესო შედეგია.

811 ამდენი შეხვედრა ჩაატარა არსენ ვენგერმა პრემიერლიგაში და დაამხო სერ ალექს ფერგიუსონის რეკორდი (810 მატჩი).

ყოველდღიური სპორტული გაზეთი "ლელო"
1576
მკითხველის კომენტარები / 1 /
გივი
0
11 უაზროდაა დაწერილი
მსგავსი ამბები
რუბრიკის სხვა სიახლეები
;