საინტერესო ტრანსფერი. ლუკა სილაგაძე ლატვიაში, თამაზ პერტიასთან!..

  • ცენტრში ლუკა სილაგაძე

საბოლოოდ გადაწყდა, რომ "რუსთავის" აწ უკვე ყოფილი კაპიტნი და გუნდის ერთ-ერთი ლიდერი, 20 წლის უნივერსალი ლუკა სილაგაძე კარიერას ლატვიის უმაღლეს ლიგაში, კერძოდ, "ვალმიერაში" გააგრძელებს. შეგახსენებთ, რომ "ვალმიერას" ქართველი სპეციალისტი, ბოლო წლების ლატვიური საკლუბო ფეხბურთის ერთ-ერთი გამორჩეული მწვრთნელი - თამაზ პერტია ავარჯიშებს...

...სწორედ მისი ხელმძღვანელობით მოახერხა ამ მოკრძალებულმა კლუბმა ლატვიის შარშანდელ ჩემპიონატში თავის ისტორიაში საუკეთესო შედეგის (IV ადგილი) მიღწევა. აღსანიშნავია, რომ "ვალმიერა" მხოლოდ 1 ქულით ჩამორჩა III ადგილზე გასულ "ვენტსპილსს", ხოლო არანაკლებ ცნობილი ლატვიური გუნდები ("დაუგავპილსი", "სპარტაკსი იურმალა", "ელგავა" და "ლიეპაია") სულაც უკან ჩამოიტოვა.

აი, ასეთი წარმატებული აღმოჩნდა თამაზ პერტიასთვის "ვალმიერაში" გატარებული სადებიუტო სეზონი; აქვე შეგახსენებთ, რომ მან სამწვრთნელო მოღვაწეობა სწორედ ლატვიაში დაიწყო, სადაც 2007 წლიდან სხვადასხვა გუნდში ("დინაბურგი", "დაუგავა", "სკონტო", "ლიეპაია") საკმაოდ წარმატებით მუშაობდა.

 ახლა კი, "ვალმიერას" ქართველ ახალწვეულზეც ვთქვათ: საქართველოს ახალგაზრდული ნაკრების წევრის, ლუკა სილაგაძისთვის შარშანდელი სეზონი აშკარად არაერთგვაროვანი გამოდგა: ნამდვილად არ იყო პატარა ამბავი, როცა 19 წლის ფეხბურთელს "რუსთავის" კაპიტნის სამკლავური გადასცეს და ლუკა სილაგაძემაც მთელი  შარშანდელი სეზონის განმავლობაში, ფაქტობრივად, ყველა მატჩი ჩაატარა ეროვნულ ლიგაში, სადაც ყველაზე ახალგაზრდა კაპიტანი გახლდათ!

ისიც უნდა აღვნიშნოთ, რომ ამ სწრაფ და დაუღალავ ფლანგის ფეხბურთელს საქართველოს ახალგაზრდული ნაკრების აწ უკვე ყოფილი მთავარი მწვრთნელი გია ცეცაძე სისტემატურად იწვევდა 21-წლამდელებში.

თუმცა, ეს ფაქტი გასაკვირი არავისთვის უნდა ყოფილიყო, რადგანაც სილაგაძე ხომ ერთნაირი წარმატებით თამაშობდა რამდენიმე პოზიციაზე - მარჯვენა მცველადაც ხშირად უასპარეზია და მარცხენა მცველადაც, მარჯვენა ნახევარმცველადაც არაერთხელ მოგვევლინა და მარცხენა ნახევარმცველადაც. ამას გარდა, ძალიან ხშირად შეუსრულებია მარჯვენა თუ მარცხენა გარემარბის ფუნქციებიც და საკმაოდ წარმატებითაც.

სხვათა შორის, შარშანდელ სეზონში "რუსთავის" ახალგაზრდა კაპიტანი მშვენიერი შედეგიანობითაც გამოირჩა: 5 გოლი (ყველა - გასვლით მატჩში) გაიტანა და 3 საგოლე პასიც შეასრულა. განსაკუთრებით ეფექტური კი ბათუმის "დინამოსა" და "ჩიხურას" კარში გატანილი გოლები იყო. თუმცა, როგორც უკვე აღვნიშნეთ, "რუსთავის" ახალგაზრდა კაპიტანს (რეგულარულად რომ ხვდებოდა "ლელოს" ვერსიით შედგენილ ტურის სიმბოლურ ნაკრებში) აშკარად არაერთგვაროვანი სეზონი გამოუვიდა: "რუსთავი" ხომ უმაღლესი ლიგიდან გავარდა...

იმედი დავიტოვოთ, რომ "ვალმიერას" ქართველ ახალწვეულს კარიერაში პირველი უცხოური კლუბი ტრამპლინად გამოადგება, ისეთივე ტრამპლიდან, როგორც ეს ამ საფეხბურთო გვარის კიდევ ერთი წარმომადგენლისთვის იყო...

შეგახსენებთ, რომ სწორედ ლატვიიდან დაიწყო რუსთავის საფეხბურთო სკოლის კიდევ ერთი აღზრდილისა და შემდგომში საქართველოს ეროვნული ნაკრების მცველის, ლევან სილაგაძის საერთაშორისო კარიერაც. 1997-99 წლებში ის იმდროინდელი ლატვიური გრანდის, რიგის "სკონტოს" ერთ-ერთი წამყვანი ფეხბურთელი გახლდათ ალექსანდრე რეხვიაშვილთან, დავით ჩალაძე და კიდევ სხვა ჩვენებურებთან (მამუკა წერეთელი, დავით გვარამაძე) ერთად.

ლევან სილაგაძემ ლატვიაში ყველა იქაური ტიტული მოიგო, რასაც შემდგომ რუსეთის პრემიერლიგაში ("ალანია", "რუბინი"), ისრაელისა და უკრაინის მთავარ ლიგებში თამაშიც მოჰყვა. კარიერის დასრულებამდე, ლევან სილაგაძე სამშობლოში დაბრუნდა და ქუთაისის "ტორპედოსა" და თბილისის "დინამოს" მაისურით ყველა ქართული ტიტულიც მოიგო...

მოკლედ, თითქმის 11-წლიანი პაუზის შემდეგ, ლატვიურ საკლუბო ფეხბურთში კიდევ ერთი სილაგაძე გამოჩნდა - ლუკა სილაგაძემ 3-წლიანი კონტრაქტი გააფორმა "ვალმიერასთან" და ჩვენც ისღა დაგვრჩენია, ამ ახალგაზრდა და იმედისმომცემ ფეხბურთელს ისეთივე კარიერა ვუსურვოთ, როგორიც მის ტიტულოვან ბიძას, ლევან სილაგაძეს ჰქონდა!..

1947
მკითხველის კომენტარები / 0 /
მსგავსი ამბები
რუბრიკის სხვა სიახლეები
;