საკალათბურთო ჩემპიონთა ლიგაზე 'დინამოს' მეტოქეს დღეს გავიგებთ

11 ივლისს 13 საათზე შვეიცარიაში საკალათბურთო ჩემპიონთა ლიგის წილისყრა გაიმართება.

გავიგებთ საქართველოს ჩემპიონის თბილისის "დინამოს" მეტოქეების ვინაობას. ჩვენი ჩემპიონი შეჯიბრებაში პირველი საკვალიფიკაციო ეტაპიდან ერთვება, წარუმატებლობის შემთხვევაში კი ფიბაევროპის თასზე გადავა.

დღეს
14-წლიანი შესვენების შემდეგ ყველაზე ტიტულოვანი ქართული კლუბი, "დინამო" ევროსარბიელს შარშან დაუბრუნდა. ითამაშა ჯერ ჩემპიონთა თასის პირველ საკვალიფიკაციო ეტაპზე, შემდეგ ევროპალიგის თასზე.

ლიგის საკვალიფიკაციოზე დინამოელთა მეტოქე ესპანური "ხუვენტუდი" იყო და ქართველებმა ეს ბარიერი ვერ გადალახეს. შესაბამისად, გადავიდნენ ევროპალიგის თასის ჯგუფურ ეტაპზე, სადაც მათი მეტოქეები იყვნენ ბულგარეთის "აკადემიკი", რუმინეთის "კლუჟი" და თურქეთის "ისტანბული".

დინამოელებმა ყველა მატჩი დათმეს, თუმცა მიიღეს დიდი გამოცდილება, რაც წლევანდელ სეზონში აუცილებლად უნდა გამოადგეთ. პირველ რიგში, უნდა ვისურვოთ, რომ გაცილებით მაღალი დონის უცხოელები გვეყოლება, ვიდრე შარშან. თუმცა ყველაფერი მაინც ფინანსებზეა დამოკიდებული.

უფრო ადრე, 2002-03 წლებში დინამოელებმა ითამაშეს ევროპის თასზე და მეოთხედფინალშიც გავიდნენ. მას მერე ქართული კალათბურთის ყოფილმა ფლაგმანმა პოზიციები დათმო და მხოლოდ ბოლო წლებში დაიბრუნა.

2018-19 წლების სეზონში ჩემპიონთა თასის ჯგუფურ ეტაპზე 32 გუნდი ითამაშებს, რომელთაგან 6 საკვალიფიკაციო ეტაპის გავლით გავა. მათ შორის მოხვედრას ეცდება "დინამოც", რომელიც შეჯიბრებაში პირველი საკვალიფიკაციოდან ერთვება. მასთან ერთად D კალათში მოხვდნენ: აეკ (კვიპროსი), ფრაიბურგი (შვეიცარია), კარხუ (ფინეთი), ლესტერი (ბრიტანეთი), ნორჩოპინგი (შვედეთი).

ამ ექვსეულს მოუწევს A კალათის ექვსეულთან დაპირისპირება: არისი (საბერძნეთი), ავტოდორი (რუსეთი), ბაკენი (დანია), ორადეა (რუმინეთი), ესტუდიანტესი (ესპანეთი), ანტვერპენი (ბელგია). ვინ ვის შეხვდება წილისყრის დასრულების შემდეგ გვეცოდინება.

მშრალი ხანა

2017-ს 2012 რომ გამოვაკლოთ, რამდენი იქნება? - 5. ვიდრე "დინამო" გადაწყვეტდა გასვლას, ხუთმა წელმა ისე განვლო, ევროსარბიელზე ერთი ქართული გუნდიც არ გასულა, სრულ ევროწყვდიადში ვიყავით.

რატომ? იმიტომ, რომ სათანადო ფული არ გამოინახა. ევროთასებზე გუნდის გაყვანას სათანადო ბაზა, კარგი ადგილობრივი კალათბურთელები და 4-5 ლეგიონერი სჭირდება. საამისოდ კი ვერც ერთი ქართული კლუბი პოულობდა თანხას.

არადა, რამდენიმე წლის წინანდელი "ტარტუ როკის" მაგალითი წინ გვაქვს - 1.5-მილიონიანი ბიუჯეტის შემთხვევაშიც კი შეიძლება ისეთი გუნდის შერჩევა, ევროჩელენჯზე ფინალურ ოთხეულში რომ მოხვდება. ამას სწორი გათვლები სჭირდება... ქართული კლუბებისგან ოთხეულს არავინ ითხოვს, პირველი საკვალიფიკაციო ეტაპის დაძლევაც საოცნებოდ გაგვხდომია.

სწორედ ამიტომ დაწერა ფორუმში ერთ-ერთმა ლატვიელმა ქომაგმა 2012 წელს: აინარს ბაგაცკისის საქართველოში წასვლას, ეთიოპიაში გამგზავრება ერჩივნაო... რეალობას რომ შევხედოთ, ევროპელებისთვის საქართველოსა და ეთიოპიის საკლუბო კალათბურთს შორის დიდი სხვაობა არ უნდა იყოს - არც ერთს იცნობენ და არც მეორეს, არც ეთიოპიური კლუბები გამოდიან ევროსარბიელზე და არც ქართული.

ეს მაშინ, როცა საქართველოს ნაკრები ევრობასკეტზე სოლიდურ კალათბურთს უჩვენებს. ზაზა ფაჩულიასაც არაერთხელ უთქვამს: ქართულ კლუბებს მიხედვა სჭირდებათ, სწორედ იქ უნდა გაიზარდონ ის კალათბურთელები, რომლებიც ახლო მომავალში ნაკრებში ჩვენს გვერდზე დადგებიან, შემდეგ კი შეგვცვლიანო. უფულო, შესაბამისად უსტიმულო ჩემპიონატში სათანადო პროგრესი წარმოუდგენელია. ნიჭიერი ახალგაზრდა გამოცდილი ლეგიონერების გვერდით ევროტურნირებზე თამაშით ათმაგად მეტს ისწავლის და ნაკრებსაც უფრო გამოადგებაო.

ძველი დიდება

იყო დრო, ევროპას ვაზანზარებდით. საკლუბო ევროპას...

ყველაზე გამორჩეული კი 1961-62 წლები იყო, როცა თბილისის "დინამომ" ჩემპიონთა თასი თვით მადრიდის "რეალს" აართვა ფინალში 90:83 დაამარცხა.

დინამოელებს 1959-60 წლებშიც შეეძლოთ ამავე თასის დაუფლება, მაგრამ ჩემპიონთა თასის ფინალში რიგელებთან დამარცხდნენ. 1968-69 წლების სეზონში ზურაბ საკანდელიძის წინამძღოლობით თბილისელებს მეორე ტიტულის მოგების შანსი ჰქონდათ, მაგრამ საპორტას თასზე ჩეხეთის "პრაღასთან" ფინალში 6 ქულის სხვაობით დამარცხდნენ.

მას მერე ჩვენებს ევროსარბიელზე ღირებული წარმატებისთვის აღარ მიუღწევიათ. თუმცა იყო გამონათებები, ისეთი, როგორიც "ვითა"-"კიორმენდის" მატჩში...
ბოლოს ქართველებმა ჯგუფური ეტაპი 2002-03 წლების სეზონში გადალახეს - თბილისის "დინამომ" (ლევან მოსეშვილი წვრთნიდა) ჯგუფში აზერბაიჯანის "ნტდ-დევონს" აჯობა და იუჟნის "ხიმიკთან" ერთად მეოთხედფინალში გავიდა, სადაც უკრაინულ "აზოვმაშთან" დამარცხდა.

თანამედროვე "დინამოს" მაშინდელი გუნდის კაპიტანი ირაკლი ხოშტარია წვრთნის, საქართველოს ნაკრების ყოფილი კაპიტანი ვახტანგ ნაცვლიშვილი პრეზიდენტობს და შემადგენლობაშიც არიან ეროვნული გუნდის წევრები.

საერთო სტატისტიკა

ა. გუნდი მონ. ტიტ. თ მ ფ წ
1 დინამო, თბილისი 10 1 48 21 0 27
2 არმია, თბილისი 2 0 12 3 0 9
3 ვითა, თბილისი 3 0 14 2 0 12
4 კაქტუსი, თბილისი 1 0 2 1 0 1
5 აზოტი/ენერჯი, რუსთავი 5 0 10 1 0 9
6 სოხუმი 1 0 2 1 0 1
7 შევარდენი, თბილისი 1 0 2 0 0 2
8 მერანი, თბილისი 2 0 4 0 0 4
9 მაქაბი, თბილისი 3 0 6 0 0 6
შენიშვნა: ა - ადგილი, მონ - მონაწილეობა, ტიტ - ტიტული, თ - თამაში, მ - მოგება, ფ - ფრე, წ - წაგება

ყველა მატჩი
გუნდი წელი ტურნირი ეტაპი მეტოქე/შედეგი

არმია 2012-13 ევროჩელენჯი H ჯგუფი ჰოლონი (ისრაელი), 69:84, 72:79

H ჯგუფი ანტვერპენი (ბელგია), 71:80, 54:87
H ჯგუფი ბონი (გერმანია), 71:75, 77:102
2011-12 ევროჩელენჯი B ჯგუფი გოტინგენი (გერმანია), 82:76, 69:61

B ჯგუფი ბეშიქთაში (თურქეთი), 82:103, 75:77
B ჯგუფი ლეიდენი (ჰოლანდია), 74:71, 59:76
სოხუმი 2011-12 ევროჩელენჯი I საკვალიფ მინსკი (ბელარუსი), 94:78, 63:97
აზოტი/ენერჯი 2008-09 ევროჩელენჯი I საკვალ. სუმიხიმპრომი (უკრაინა), 81:110, 79:90

2007-08 ფიბას თასი I საკვალ. ამსტერდამი (ჰოლანდია), 77:87, 63:101
1999/00 კორაჩის თასი I საკვალ. კიევი (უკრაინა), 74:100, 72:90
1998/99 კორაჩის თასი I საკვალ. შახტარი (უკრაინა), 92:93, 87:110
1997/98 კორაჩის თასი I საკვალ. ფეარსი ტალინი (ესტონეთი), 81:75, 67:90

დინამო 2017/18 ჩემპიონთა ლიგა I საკვალ. ხუვენტუდი (ესპ.), 60:72, 66:86
2017/18 ფიბაევროპის თასი G ჯგუფი. აკადემიკი (ბულგ.), 70:73, 63:72
2017/18 ფიბაევროპის თასი G ჯგუფი. კლუჟი (რუმინ.), 73:87, 74:97
2017/18 ფიბაევროპის თასი G ჯგუფი. ისტანბული (თურქ.), 52:72, 70:97
2002/03 ჩელენჯ თასი A ჯგუფი ნტდ-დევონი(აზერბ.), 101:67, 131:99

A ჯგუფი ხიმიკი (უკრაინა), 79:84, 86:96
1/4 აზოვმაში (უკრაინა), 91:106, 95:111
1996/97 კორაჩის თასი I საკვალ. ოლიმპასი (ლიტვა), 73:80, 60:79
1992/93 სუპროლიგა (ჩემპ. თასი) I საკვალ. ვროცლავი (პოლონეთი), 85:124, 95:113
1988/89 კორაჩის თასი I საკვალ. ოლიმპიაკოსი (საბერძნეთი), 75:96, 113:93
1969/70 საპორტას თასი 1/4 პოლონია (პოლონეთი), 82:77, 92:82
1/2 ნაპოლი (იტალია), 69:86, 83:88
1968/69 საპორტას თასი 1/4 ლევსკი (ბულგარეთი), 88:83, 58:54
1/2 პანათინაიკოსი (საბერძნეთი), 67:81, 103:71
ფინალი პრაღა (ჩეხეთი), 74:80
1962/63 ჩემპიონთა თასი 1/4 მილანი (იტალია), 65:70, 74:68
1/2 ცსკა (რუსეთი), 59:76, 78:79
1961/62 ჩემპიონთა თასი 1/8 სტიაუა (რუმინეთი), 77:76, 82:77
1/4 დარუშაფაკა (თურქეთი), 80:67, 84:49
1/2 ცსკა (რუსეთი), 75:71, 77:66
ფინალი რეალი (ესპანეთი), 90:83
1959/60 ჩემპიონთა თასი 1/8 სტიაუა (რუმინეთი), 83:87, 90:68
1/4 პლოვდივი (ბულგარეთი), 76:64, 72:69
1/2 პოლონია (პოლონეთი), 88:65, 64:61
ფინალი ასკ რიგა (ლატვია), 51:61, 69:69
კაქტუსი 1994/95 კორაჩის თასი I საკვალ. არსენალი ტულა (რუსეთი), 81:62, 89:116
მაქაბი 2001/02 კორაჩის თასი I საკვალ. სარატოვი (რუსეთი), 91:141, 64:145
2000/01 კორაჩის თასი I საკვალ. გროდნო (ბელარუსი), 79:101, 55:71
1994/95 კორაჩის თასი I საკვალ. რიტასი (ლიტვა), 85:110, 92:94
მერანი 1994/95 კორაჩის თასი I საკვალ. ოდესა (უკრაინა), 73:100, 76:94
1992/93 კორაჩის თასი I საკვალ. ფენერბაჰჩე (თურქეთი), 78:108, 68:103
შევარდენი 1992/93 კორაჩის თასი I საკვალ. შოლნოკი (უნგრეთი), 65:118, 65:101
ვითა 1996/97 საპორტას თასი ჯგუფი ვერონა (იტალია), 73:104, 66:92

H ჯგუფი ლონდონ თაუერსი (ინგლისი), 78:87, 60:72
H ჯგუფი ტელეკომი (თურქეთი), 80:92, 62:69
H ჯგუფი ბუდუჩნოსტი (ჩერნოგორია), 104:86, 56:93
H ჯგუფი კიორმენდი (უნგრეთი), 72:71, 78:97

1995/96 სუპროლიგა (ჩემპ. თასი) I საკვალ. ჟალგირისი (ლიტვა), 70:78, 69:100
1994/95 სუპროლიგა (ჩემპ. თასი) I საკვალ. ასკ რიგა (ლატვია), 80:88, 95:100

ყოველდღიური სპორტული გაზეთი "ლელო"
748
მკითხველის კომენტარები / 0 /
რუბრიკის სხვა სიახლეები
;