[საკითხავი] სამეფო უიმბლდონი

 „დიდი სლემის“ რიგით მესამე ტურნირი ლონდონში იმართება - პლანეტის ყველაზე ძველი და ყველაზე პრესტიჟული უიმბლდონი. მისი ასეთი პოპულარობისა და მის მიმართ უზარმაზარი ინტერესის მიზეზი მხოლოდ სპორტული მხარე და ჩოგბურთის ვარსკვლავები არ არიან. ყოველთვის დიდ ყურადღებას იქცევს ტრიბუნა, სადაც სხვადასხვა ცნობილ ადამიანთან ერთად საპატიო ადგილს ბრიტანეთის სამეფო ოჯახის წარმომადგენლები იკავებენ.

უიმბლდონის საჩოგბურთო ტურნირი 1877 წლიდან ტარდება. მისი ურთიერთობა სამეფო ოჯახთან 100 წელზე მეტს ითვლის. პირველად შეჯიბრებაზე დასწრება 1907 წელს ელისაბედ მეორეს ბებიამ და ბაბუამ, პრინცმა ჯორჯმა და პრინცესა მერიმ გადაწყვიტეს. ამის მიზეზი მათი შვილი ალბერტი, მომავალში მეფე ჯორჯ მეექვსე გახდა, რომელიც უიმბლდონზე წყვილთა თანრიგში ასპარეზობდა. ტურნირს ის პირველივე წრიდან გამოეთიშა. ამის შემდეგ სამეფო ოჯახის არც ერთ წევრს აღარ გაურისკავს კორტზე გასვლა. 

ჯორჯ მეექვსეს შვილის, ამჟამად დიდი ბრიტანეთის დედოფლის ელისაბედ მეორის 80-წლიანი სიყვარულის ამბავი სწორედ ჩოგბურთს უკავშირდება. 1939 წელს ყბაყურას ეპიდემიის გამო პრინცესებს ხალხმრავალ დახურულ სივრცეებში ყოფნა ეკრძალებოდათ, ამიტომ თავს ღია სივრცეში,  ჩოგბურთის ტურნირით ირთობდნენ. ამბობენ, რომ სწორედ აქ შეუყვარდა ელისაბედს პრინცი ფილიპი, რომელიც მაშინ კადეტად მსახურობდა და პრინცესის ყურადღების მიქცევას კორტზე გაჭიმულ ბადეზე მოხდენილად გადახტომით ცდილობდა.

ამის შემდეგ ელისაბედ მეორემ კიდევ არაერთხელ გამოავლინა ჩოგბურთისადმი ინტერესი. უიმბლდონზე მისი ვიზიტებიდან ყველაზე მნიშვნელოვანი, ალბათ, 1957 წლის ფინალი იყო. მაშინ ისტორიაში პირველად ჩემპიონი ფერადკანიანი ჩოგბურთელი ალთეა გიბსონი გახდა. დედოფალმა გადაწყვიტა, პირადად მიელოცა გამარჯვება სპორტსმენისთვის და ამ ჟესტით კიდევ ერთხელ შეეხსენებინა მსოფლიოსთვის, რომ თანამედროვე საზოგადოებაში რასიზმი მიუღებელია.

ელისაბედ მეორეზე მეტად ჩოგბურთი მის ქმარს პრინც ფილიპს უყვარს. კორტებზეც დედოფალზე ხშირად დადის და დაჯილდოების ცერემონიებშიც იღებს მონაწილეობას.

n n n

უიმბლდონის ყველაზე დიდი სკანდალი პრინცესა დაიანას სახელს უკავშირდება. 2016 წელს სერბმა ჩოგბურთელმა სლობოდან ჟივოინოვიჩმა ერთ-ერთი ინტერვიუს დროს განაცხადა, რომ 1987 წლის უიმბლდონზე დაიანა გაიცნო და მისი ჩოგბურთის ინსტრუქტორი გახდა. მათი ურთიერთობა კი საბოლოოდ რომანში გადაიზარდა. ამ ინტერვიუს დიდი გამოხმაურება მოჰყვა.

ლედი დის ყოფილ ქმარს, პრინც ჩარლზს ჩოგბურთი დიდად არ უყვარს, თუმცა უიმბლდონს თითქმის ყოველთვის ესწრება. კორტზე ის ჯერ დაიანასთან ერთად დადიოდა, ახლა კი კამილა პარკერ ბოულზთან ერთად, რომელიც სპორტის ამ სახეობითა და ჩოგბურთელებით ძალიან არის გატაცებული.

ჩოგბურთის სიყვარული პრინც უილიამს დედისგან გამოჰყვა. ლედი დის ის ხშირად დაჰყავდა ტურნირებზე. უილიამის სიყვარულს კეიტ მიდლტონიც იზიარებს. ამ წყვილის ყველაზე დასამახსოვრებელი ვიზიტი უიმბლდონზე 2016 წელს შედგა, როცა ისინი კორტზე ენდი მარეის მხარდასაჭერად მივიდნენ. ბრიტანელმა ჩოგბურთელმა მათ იმედი არ გაუცრუა და ფინალური მატჩი დამაჯერებლად მოიგო.

n n n

პრინცი ჰარის მეუღლე მეგან მარკლი ჩოგბურთის გულშემატკივარი სერენა უილიამსის წყალობით გახდა. მათ ერთმანეთი 2010 წელს გაიცნეს და უკვე მეცხრე წელია უახლოესი მეგობრები არიან. შესაბამისად, იქ სადაც სერენა თამაშობს, მეგანის გამოჩენა არავის უკვირს. შარშან სასექსის ჰერცოგინიამ მეგობარს უიმბლდონზე უგულშემატკივრა. მეგობრის მხარდაჭერა საკმარისი არ ღმოჩნდა. უილიამსმა ფინალი ანჟელიკა კერბერთან წააგო.

584
მკითხველის კომენტარები / 0 /
მსგავსი ამბები
რუბრიკის სხვა სიახლეები
;