საკონტროლო მატჩები და გატეხილი ნავსები

თბილისის "ლოკომოტივმა" მორიგი საკონტროლო შეხვედრა გამართა. ლაშა ჭაღიაშვილის გაწვრთნილები საგურამოს ბაზაზე ბოლნისის "სიონს" დაუპირისპირდნენ და 2:0 დაამარცხეს.

ორივე გოლი პირველ ნახევარში გავიდა. ჯერ დავით ჯიქიას გადაცემით ანგარიში "ლოკომოტივის" კაპიტანმა დავით უბილავამ გახსნა, საბოლოო ანგარიში კი იმავე ჯიქიამ დავით სამურკასოვის გადაცემის შემდეგ დააფიქსირა - 2:0.

"ლოკომოტივის" გულშემატკივრებს ამ მოგებაზე არანაკლებ ის გაახარებდათ, რომ ხანგრძლივი პაუზის შემდეგ თბილისელებს ბომბარდირი მამია გავაშელიშვილი დაუბრუნდათ.

23 წლის ფორვარდმა გასული სეზონი კარგად დაიწყო, მაგრამ დაშავდა და სეზონის მეორე ნახევარი გამოტოვა. გავაშელიშვილმა "სიონთან" შეცვლაზე 20 წუთი ითამაშა.

ლოკომოტივი: თევდორაძე (67. შეროზია), უბილავა (46. კომახიძე), ხიდეშელი (70. ძებნიაური), ქურდაძე, გაბაძე (46. კიკალიშვილი), გვალია, სამურკასოვი (80. შეწირული), შონია (80. ოზბეთელაშვილი), კიკნაძე (56. კიკაბიძე), ჯიქია (60. კობახიძე), არველაძე (70. გავაშელიშვილი).

სიონი: ზარქუა, მინდორაშვილი გურეშიძე, თომაშვილი, ლეჟავა, დათუნაიშვილი, მიქაბერიძე, ქიქავა, გიორბელიძე, გაფრინდაშვილი, დვალი; შეცვლაზე: მუჯრიშვილი, გაფრინდაშვილი, ნოზაძე, თომაშვილი, ჯაფარიძე, დათუნაიშვილი, მანაგაძე, სამუშია, სიხარულია, კოშკაძე, უგულავა.

ჩიხურამ ნავსი გატეხა

თურქულ შეკრებაზე ფინანსურად მოღონიერებულ ყაზახურ გუნდებს საქართველოს რამდენიმე წარმომადგენელი შეხვდა, მაგრამ პირველი საჩხერის "ჩიხურა" აღმოჩნდა, რომელმაც მათი დამარცხება მოახერხა.

საჩხერელები "ქაისარს" შეხვდნენ და დამაჯერებლად დაამარცხეს. სიდეს "სუენოს" სტადიონზე გამართულ ამ მატჩში გიორგი გაბედავამ ანგარიში მე-11 წუთზე გახსნა - მას მეკარემ პენალტი აუღო, მაგრამ დამატებაზე მაინც გაიტანა.

საჩხერელთა უპირატესობა გიორგი ბუხაიძემ გაზარდა, რომელმაც საჯარიმოდან ჩაწოდებულ ბურთს თავი დაუხვედრა. მეორე ნახევარში კი, სოსო ფრუიძის შეგირდებმა სწრაფი კონტრშეტევა წამოიწყეს და კახა კახაბრიშვილმა საჯარიმოს სიახლოვიდან მეტოქის კარი კიდევ ერთხელ აიღო. მატჩის მიწურულს, ყაზახთა ფეხბურთელმა იოანე არკინმა პრესტიჟის გოლი გაიტანა და "ჩიხურამ" 3:1 მოიგო.

ჩიხურა: ჰამზიჩი (მწყერაშვილი), ჩიტეიშვილი (ცერცვაძე), მირცხულავა, მაისაშვილი (კაშია), ჩიკვაიძე (მეგრელიშვილი), კაკუბავა (ჩიხლაძე), დობროვოლსკი (პრინცი), მარკოზაშვილი (კახაბრიშვილი), ლექვთაძე (ბუღრიძე), გაბედავა (პედრო გუგა), ბუხაიძე (ალექსანდრო).

საბურთალომ ორი მოგებით
დაასრულა...

თურქეთში შეკრებაზე ორი ამხანაგური მატჩი გამართა თბილისის "საბურთალომ", რომელმაც ახალი სეზონისთვის მზადების ეს ეტაპიც დაასრულა. ქართული კლუბი ჯერ თურქმენეთის ჩემპიონ "ალტინ ასირს" დაუპირისპირდა.

პირველი ნახევარი გოლების გარეშე დასრულდა, მეორე ტაიმში კი გიორგი ჭიაბრიშვილის გაწვრთნილებმა 6 გოლი გაიტანეს.

ანგარიში ბექა გვარაძემ გახსნა. მალევე მას მხარი დავით ვოლკოვმა აუბა. 65-ე წუთზე მეტოქემ შეამცირა სხვაობა - გოლი ანადურდიევმა გაიტანა. ორბურთიანი ჰანდიკაპი ცვლილებაზე შესულმა გურამ გოშთელიანმა აღადგინა, რომელმაც ნიკოლოზ მალისგან გადაცემა გოლად აქცია.

შემდეგ თავი "საბურთალოს" ახალწვეულმა გეგა დიასამიძემ მორიგი ტექნიკური გოლით გამოიჩინა. 75-ე წუთზე ბეგმარატ ბაიოვმა კიდევ ერთხელ შეძლო "საბურთალოს" კარის აღება.

მატჩის დასრულებამდე 8 წუთით ადრე, ცოტნე ნადარაიას ფლანგური გადაცემის შემდეგ, გოშთელიანმა თავურით დუბლი გაიფორმა, ხოლო ნიკა მალის წაქცევისთვის დანიშნული პენალტი ბექა გვარაძემ ოსტატურად შეასრულა და საბოლოოდ - 6:2.

საბურთალო: სომხიშვილი, მალი, ცნობილაძე, რეხვიაშვილი, ნადარაია, მამუჩაშვილი, ალთუნაშვილი, თარხნიშვილი, დიასამიძე, გვარაძე, ვოლკოვი; შეცვლაზე: ქურდაძე, ჯინჯოლავა, გოშთელიანი.

ბოლო ამხანაგური შეხვედრა ჭიაბრიშვილის გუნდმა შაბათს გამართა. "საბურთალოს" მეტოქე რუსეთის მეორე ლიგის კლუბი "ნეფტეხიმიკი" იყო, რომელმაც მანამდე თბილისის "დინამოსთან" 0:1 წააგო.

პირველი ნახევარი თბილისელთა სრული უპირატესობით წარიმართა. მატჩის დებიუტში გატანილი გოლით თავი გიორგი კოხრეიძემ გამოიჩინა, რომელსაც ასისტენტობა ვაგნერ გონსალვესმა გაუწია. ცოტა ხანში ანგარიშის გაზრდის შესაძლებლობა ნოდარ იაშვილს მიეცა, მაგრამ ბურთი ძელს მოხვდა.

მეორე ნახევრის დასაწყისში მეტოქემ წონასწორობა აღადგინა - ლაზარე კუპატაძის მიერ მოგერიებულ ბურთზე ყველას ვიაჩესლავ სტეშნიმ დაასწრო - 1:1. 59-ე წუთზე ვაგნერმა კიდევ ერთი საგოლე გადაცემა მიითვალა - ამჯერად, კუთხურიდან ჩაწოდების შემდეგ დიმიტრი ტატანაშვილმა თავური დარტყმით "საბურთალოში" მორიგი გოლი მიითვალა და თბილისელებმა 2:1 გაიმარჯვეს.

საბურთალო: კუპატაძე, იაშვილი, მარგველაშვილი, გრიგალაშვილი, ჩაბრაძე, ტერა, გორგიაშვილი, ვაგნერი, ხარაიშვილი, კოხრეიძე, ტატანაშვილი; შეცვლაზე: გოშთელიანი, ჯინჯოლავა.

"საბურთალო" დღეს სამშობლოში დაბრუნდება და 5 მარტს დანიშნული ეროვნული ლიგის პირველი მატჩისთვის მზადებას თბილისში გააგრძელებს. საინტერესოა, რომ საბურთალოელებს თურქეთში არც ერთი ამხანაგური მატჩი არ წაუგიათ - 8 თამაშიდან 4-ში გაიმარჯვა და ამდენივე ფრედ დაასრულეს: კონკორდია (რუმინეთი) 2:1; სეპსი (რუმინეთი) 0:0; ბოტევი (ბულგარეთი) 2:0; სტალი (უკრაინა) 3:3; მარიუპოლი (უკრაინა) 2:2; დინამო (სერბეთი) 2:2; ალტინ ასირი (თურქმენეთი) 6:2; ნეფტეხიმიკი (რუსეთი) 2:1.

ფრე თურქმენებთან

"სამტრედიამ" თურქულ მოსამზადებელ ეტაპზე მორიგი ამხანაგური მატჩი გამართა. ეროვნული საფეხბურთო ლიგის მესამეადგილოსანი თურქმენულ "შაგადამს" დაუპირისპირდა.

44-ე წუთზე ანგარიში "სამტრედიას" ლეგიონერმა მაიკლ ოლაიტანმა გახსნა და პირველი ნახევარი ქართული გუნდის გამარჯვებით, 1:0 დასრულდა. მაგრამ თურქმენებმა 85-ე წუთზე ანგარიშის გათანაბრება შეძლეს და უჩა სოსიაშვილის გუნდი ფრეს დასჯერდა.

სამტრედია: მიგინეიშვილი, ნდონგი, ახალაძე, ფატიჩი, განუგრავა, დაუშვილი, ჩაჩუა, გიი, ბაჩიაშვილი, ერისთავი, ოლაიტანი; შეცვლაზე: მესიაჩენკო, ოლხოვი, კერძევაძე, ხაჩიძე, კირკიტაძე.

ყოველდღიური სპორტული გაზეთი "ლელო"
1266
მკითხველის კომენტარები / 0 /
მსგავსი ამბები
რუბრიკის სხვა სიახლეები
;