[VIDEO] 6 ერი. იტალია ჯადოსნური ჯოხის ძებნაში... გაწითლებული რომი

თებერვლისთვის უჩვეულო სითბო და რომის ქუჩებს შესეული უელსელი ქომაგობა ჩვეული სარაგბო ზეიმით იტალიის დედაქალაქს მაგიურ სილამაზეს სძენდა.

ესპანეთის მოედნიდან ოლიმპიკოს სტადიონამდე ქუჩებში წითელი ფერი დომინანტობდა. ქალაქი დროებით სტუმართა ჟრიამულს მოეცვა. რომი რომ სარაგბო ქალაქი არაა ყოველთვის ვიცოდით. თუმცა ექვსი ერის პირველ საშინაო შეხვედრაში იტალია თუ შინ უელსის ნაკრებს თითქმის უქომაგოდ ისტუმრებდა არავინ მოელოდა.

არავინ დავობს იმაზეც, რომ სარაგბო კულტურა იტალიის ჩრდილოეთში უფროა განვითარებული, შესაბამისად ქომაგებში თუ მოხვდები მაშინვე იგრძნობ განსხვავებას საუბრის აქცენტის მიხედვით. ქომაგიც უმეტეს შემთხვევაში ჩრდილოეთ იტალიიდან ჩამოდის, რომ ეროვნული ნაკრები გაამხნევოს. ტრადიციული ჰიმნების შესრულების დროსაც კი იგრძნობოდა მასპინძელთა უპირატესობა.

ლოგიკური შედეგი

შეხვედრის მთავარ არბიტრს მათიე რაინალს შეხვედრის დაწყების ჩასტვენილი არ ჰქონდა რომ უელსელებმა მეტოქის 22-ში სწრაფად მოიპოვებს ჯარიმის დარტყმის უფლება. დან ბიგარმაც არ დააყოვნა და სამი ქულით დააწინაურა დრაკონები. მეტოქის მიერ თავის 22-ში მიჯაჭვული იტალია კიდევ სამჯერ დაჯარიმდება ბურთის თამაშგარეში დაფიქსირებისათვის და არც დან ბიგარი დაინდობს ლურჯების უსახურ თამაშს და 12 ქულით მალევე დაწინაურდება. შეხვედრის 34 წუთზე მასპინძლებიდან ღირსების პირველ ლელოს სტეინი იკისრებს, გარდასახვას ალანი ზუსტად შეასრულებს და პირველი ნახევარი სტუმართა სასარგებლოდ დასრულდება - 7:12.

მეორე ნახევრის საწყისი წუთები. იტალია თითქოს დაუბრუნდა თამაშის შემტევ სტილს. ალანმა კიდევ ერთი ჯარიმით სამი ქულაც მოუპოვა ლურჯებს 10:12, თუმცა უელსელთაგან იტალიური ოცნება ადამსმა დაასამარა, რომელმაც ლურჯებს ლელო, ხოლო გულშემატკივარს ოცნება დაუმიწა. ბიგარი კვლავ მოწოდების სიმაღლეზეა და გარდასახვით სხვაობა ამჯერად უკვე 10:19 დააფიქსირა. ვოლკის ლელო, ბიგარის ზუსტი გარდასახვა სხვაობას უკვე 10-16 ზრდის.

ამის ფონზე მეორე ლელოს გამომუშავება იტალიას მაინც ვერ იხსნის მარცხისგან. შეხვედრის 76 წუთზე მეტოქის ნახევარში მყოფი პარიზე ალანს ცარიელ ზონაში გაუშვებს, ხოლო საბოლოოდ ლელოს დამიწებას ედოარდო პადოვანი შეძლებს. ამჯერად ალანი გარდასახვას ვერ შეასრულებს და შედეგიც საბოლოო 15:26 დაფიქსირდება. მატჩის საუკეთესო მორაგბედ კი ჯოშ ნევიდა დასახელდა. ორი არჩათვლილი ლელოს მიუხედავად დრაკონებმა ოლიმპიკო ღირსეული გამარჯვებით დატოვეს.

ნამატჩევს

იტალიამ კიდევ ერთხელ გაუცრუა თავის გულშემატკივარს იმედები. ლურჯების თავკაცი კონორ ოში მატჩის შემდგომ პრესკონფერენციაზე გულწფელად გამოგვიტყდა რომ: "ჩვენი პრობლემა არაა მოედანზე დისციპლინის არ ქონა. ამ შეხვედრაში მეტოქემ კარგად ითამაშა. პირველი ნახევრის ბოლოს ბურთს ჩვენ ვფლობდით, მაგრამ მასზე კონტროლს და მის წინ გაგზავნას ვეღარ ვახერხებდით. ამ ეტაპზე არ მიმაჩნია, რომ ჩვენი პრობლემა ბურთით ნაკლებად თამაშია.

არის პრობლემები რომელთა გადაჭრა აუცილებელია, შესაბამისად ახლა ამაზე არ მინდა საუბარი, რადგან პირველ რიგში უნდა განვიხილო გუნდთან ერთად. სამწუხაროდ არ გვაქვს ჯადოსნური ჯოხი, რომ უფრო მეტი შევძლოთ. გავაგრძელებთ შრომას და კიდევ უფრო მეტს მოვინდომებთ, რომ უკეთესი შედეგი დავდოთ. არ ვაპირებთ რომ დავნებდეთ. ვისაც მიაჩნია, რომ ჩვენთვის მოგება შეუძლებელია, მათ ვეტყოდი რომ არაფერია შეუძლებელი და დიდი შრომით შევძლებთ უკეთეს შედეგსაც მივაღწიოთ".

უელსის მთავარმა მწვრთნელმა შეხვედრის შეფასებისას გაგვიმხილა: "ბედნიერი ვარ მიღწეული შედეგით. შესანიშნავად ვითამაშეთ. ჩვენთვის ეს იყო შესაძლებლობა მოგვეპოვებინა გამარჯვება". მწვრთნელის შემდეგ თავისი ჯონათან დევისმაც გვითხრა:

"ნამდვილად არ იყო მარტივი, მაგრამ ყოველთვის სასიამოვნოა როცა შეხვედრას იგებ".

მატჩის შემდეგ მესამე ტაიმი, როგორც ყოველ ჯერზე ხდება ოლიმპიკოს შიდა ეზოში გაიმართა. ნაწილი გულშემატკივრებისა სპეციალურად ამ საღამოსთვის დამონტაჟებული სცენის წინ ზეიმობდნენ, ნაწილმა კი გამარჯვების აღსანიშნავად ვიტორიო ემანუელეს მოედანზე ირლანდიურ პაბში გადაინაცვლა.

ჯადოსნური ჯოხი ვერა, მაგრამ ხის კოვზი ნამდვილად დიდი შანსია იტალიამ კიდევ ერთხელ დაიმსახუროს. 0 ქულა და ბოლო ადგილი ჯგუფში. მიუხედავად თავდაუზოგავი შრომისა კონორ ოშის ლურჯები ვერა და ვერ ახერხებენ წაუგებელი სერიების პოზიტიური შედეგით დასრულებას. დრაკონებმა ამ გამარჯვებით ჯგუფში 8 ქულა დააგროვეს და ცხრილის სათავეში მოექცნენ.

კონცენტრირება მომავალზე

მატჩის შემდეგ მიქსზონაში იტალიელებიდან ანჯელო ესპოზიტოს გავესაუბრე. ესპოზიტო მომავალს პოზიტიურად უყურებს და მიაჩნია, რომ გუნდს აქვს შესაძლებლობა უკეთ ითამაშოს.

- კვლავ დათმეთ შეხვედრა, ელოდით ამას?

- მოედანზე არ გავდივართ, რომ შეხვედრა წავაგოთ. უფრო მეტს ველოდით, სამწუხაროდ ვერ შევძელით, თან ამ მატჩამდე შოტლანდიასთანაც დავმარცხდით. ვერ შევძელით დავალება ბოლომდე წარმატებით შეგვესრულებინა.

- მომდევნო შეხვედრა ირლანდიასთან კვლავ ოლიმპიკოზე უნდა ითამაშოთ...

- ირლანდიისთვის შესაბამისად მოვემზადებით, რომ უფრო გავძლიერდეთ და უკეთაც ვითამაშოთ. სასურველია პირველი ორი შეხვედრა წარსულს ჩავაბაროთ და მხოლოდ გამარჯვებაზე ვკონცენტრირდეთ.

სალომე ხარატიშვილი რომიდან

ბოლოს გთავაზობთ ფოტოკოლაჟს - უელსელები რომის ქუჩებში...

1320
მკითხველის კომენტარები / 0 /
მსგავსი ამბები
რუბრიკის სხვა სიახლეები