სამარცხვინო თუ მამაცი: დიდი 'გაუგებრობის' ბნელი მხარეები, - რა მოხდა რეალურად ფინალში

ინგლისის ლიგის თასის ფინალი გრანდიოზული სკანდალით დასრულდა: “ჩელსის” მეკარემ კეპა არისაბალაგამ უარი თქვა პენალტების სერიის წინ მოედნიდან გასვლაზე, რათა მისი შემცვლელისთვის დაეთმო ადგილი. ერთნი ესპანელის საქციელს სამარცხვინოს უწოდებენ, მეორენი - მხარს უჭერენ მას...

118-ე წუთზე ბასკი მეკარე ტკივილისგან პრაქტიკულად კრუნჩხვებში ჩავარდა და “ჩელსის” დამრიგებელმა მაურიციო სარიმ სათადარიგო მეკარე ვილი კაბალიეროს მიუთითა - მოთელვა დაეწყო. კეპა ძალიან მალე მოეგო გონს, თუმცა, შეცვლის პროცესი უკვე დაწყებული იყო - ტაბლოზე ბასკის სათამაშო ნომერიც კი გამოისახა. მაგრამ ესპანელმა აქტიურად დაიწყო ხელების ქნევა და ყვირილი - არ გავალ მოედნიდან, ყველაფერი წესრიგშიაო.

როგორც ვარაუდობენ, კეპა, უბრალოდ, დროს წელავდა. დამატებითი დროის ბოლო წუთები მიდიოდა, “ჩელსის” ნებისმიერ მომენტში შეეძლო გოლი გაეშვა, კეპა კი გრძნობდა პენალტების სერიის მოახლოებას. ნებისმიერი მეკარისთვის ეს არის შანსი - გახდეს გმირი, პირადად ახალგაზრდა ბასკისთვის - შესაძლებლობა, თავისი სახელი ჩაეწერა ისტორიაში. კეპას უნდოდა ეს სერია, მაგრამ გზად გაუთვალისწინებელი წინაღობა წარმოიშვა.

საინტერესოა, რას ფიქრობდა სარი იმ მომენტში? შესაძლოა, მან იცოდა, რომ კეპა დროს წელავდა. მაგრამ, კაბალიეროს შესაძლებლობებიც უნდა სცოდნოდა.

არგენტინელი - პენალტების ცნობილი სპეციალისტია. მაგალითად, 2016 წელს, ასევე ლიგის თასის ფინალში, მან სამი 11-მეტრიანი მოიგერია და გამარჯვება მოუტანა “მანჩესტერ სიტის” “ლივერპულის” წინააღმდეგ. და კაბალიეროს კიდევ ერთი უპირატესობა - ის “ჩელსის” მეტოქის რიგებში სამი წელი თამაშობდა და იცოდა, როგორ ასრულებენ პენალტებს სერხიო აგუერო და მისი თანაგუნდელები.

ყველაფერი ისე ჩანს, თითქოს სარი გეგმავდა კაბალიეროს გამოყვანას. ძალიან სწრაფად მოხდა ყველაფერი: კეპამ მინდორზე წოლა ვერ მოასწრო, რომ არგენტინელი უკვე მოედნის ხაზთან ხელთათმანებით იდგა. არისაბალაგას ტრავმაც რომ ჰქონოდა, სად ეჩქარებოდათ? სანამ მეკარე კარში არ დადგება, თამაში არ განახლდება.

კეპას მოედნიდან გასვლისკენ მოუწოდებდა ყველა - მწვრთნელები, მსაჯები, პარტნიორები. მაგრამ ის აქტიურად ეწინააღმდეგებოდა, ყვიროდა, ხელებს იქნევდა, ზუსტად ისე, როგორც ამას ჯიუტი ბავშვები აკეთებენ.

როცა ტაბლოზე ფეხბურთელის ნომერი იწერება, ის უნდა წავიდეს. კეპა არცკი ფიქრობდა შედეგებზე: იმაზე, თუ როგორ ივარჯიშებდა კაბალიეროსთან ერთად, როგორ ჩახედავდა თვალებში გულშემატკივრებს წაგების შემთხვევაში, როგორი რეაქცია ექნებოდა სარის.

იტალიელი განრისხდა და ასეთი რეაქცია გასაგებია. გულშემატკივრები მის გადადგომას ითხოვენ და სარი უდიდესი წნეხის ქვეშ იმყოფება. ამ დროს კი მას აღალატებს მეკარე, რომელშიც 80 მილიონი ევრო სწორედ სარის მოთხოვნით გადაიხადეს. ასე რომ, კეპამ არა მხოლოდ დააღალატა მწვრთნელი, არამედ, დაამცირა - ახლა, ყველასთვის გასაგებია, რომ სარის სიტყვები საერთოდ არაფერს ნიშნავს.

ყველაზე საინტერესოა ეპიზოდის გმირების საჯარო რეაქცია. პენალტების სერია ესპანელმა წააგო, თანაც ერთხელ იღლიაში გაუძვრა აგუეროს პენალტი. მატჩის დასრულების შემდეგ კი მეკარემ თავხედურად თვალიც კი ჩაუკრა კამერას.

მოულოდნელად, სარი პრესკონფერენციაზე კეპას მხარეს დადგა: “ეს დიდი გაუგებრობა იყო. მივიჩნიე, რომ მეკარეს კრუნჩხვა ჰქონდა და ის მზად არ იყო პენალტების სერიისთვის. მაგრამ ჩვენმა ექიმმა ყველაფერი ამიხსნა. კეპა მიხვდა, რომ მას ტრავმის გამო ვცვლიდი და გადმომცა, რომ პრობლემები არ ჰქონდა. ის მართალი იყო”.

თავად კეპამ გაიმეორა ინტერვიუში სიტყვა - “გაუგებრობა”. მაგრამ ეს გულშემატკივართა დასამშვიდებლად გააკეთა. სარის ახსნა ნამდვილად არ შეესაბამება მინდორზე მომხდარს. ექიმთან საუბრის შემდეგაც კი, მწვრთნელი ვერ წყნარდებოდა და ერთ მომენტში სტადიონიდან წასვლასაც აპირებდა - ზედ ტრიბუნების ქვეშ გასასვლელ გვირაბთან გადაიფიქრა. და კიდევ, ჩვეულებრივ დაჭიმულობას ექსპრეს-მასაჟით მკურნალობენ, რითაც კლუბის თანამშრომლები არიან დაკავებულნი პენალტების სერიის წინ.

ჯონ ტერიმ მატჩის შემდეგ აღნიშნა, რომ სარი, უბრალოდ, ხელს აფარებს თავის ფეხბურთელს. ასეა, მაგრამ გვერდიდან ეს ძალიან ჰგავს ხასიათის სისუსტეს. და თუ იტალიელის ნათქვამი - სიმართლეა, მაშინ მან, უბრალოდ, ხელი მოაწერა თავის სისულელეს.

რა იქნება შემდეგ? იტალიელის რეპლიკით გასაგებია, რომ ის არ აპირებს კეპას დუბლში გაშვებას. თან ეს რთული გასაკეთებელია, რადგან მეკარეში 80 მილიონი სწორედ მწვრთნელის თხოვნით არის გადახდილი. ასე რომ, ბასკი ვალდებულია სულ ითამაშოს. შესაბამისად, გამოუვალი სიტუაციაა: სარიმ უნდა დასაჯოს ფეხბურთელი, მაგრამ არ შეუძლია ამის გაკეთება.

სამაგიეროდ, “ჩელსის” ბოსებს შეუძლიათ იმოქმედონ...

ყოველდღიური სპორტული გაზეთი "ლელო"
875
მკითხველის კომენტარები / 0 /
მსგავსი ამბები
რუბრიკის სხვა სიახლეები
;