სამბისტების 4 მედალი მსოფლიოს ჩემპიონატის სტარტზე

სამხრეთკორეულ ჩეონგჯუში დღეს დაიწყო სამბისტთა მსოფლიოს ჩემპიონატი, რომელშიც 74 ქვეყნის 509 სპორტსმენი ჩაება. დღეს მოასპარეზეთა შორის ოთხი ქართველიც იყო და ოთხივემ მედალი მოიპოვა. სამმა სულაც ფინალი იჭიდავა, თუმცა დღეს მაინც ოქროს გარეშე დავრჩით. ჯონდო მუზაშვილის გუნდის დღევანდელი მონაგარი 3 ვერცხლი და 1 ბრინჯაოა. მსოფლიოს ვიცე-ჩემპიონები ნინო ოძელაშვილი (72), მინდია ლილუაშვილი (68) და პაატა ღვინიაშვილი (90) გახდნენ, ბრინჯაოს კი გივი ნადარეიშვილი (52) დაეუფლა.

ოძელაშვილი კორეაში მსოფლიოს მოქმედი ჩემპიონის რანგში ჩავიდა და ტიტულის დაცვასთან ძალზე ახლოსაც იყო. სამწუხაროდ, ზედიზედ მეორედ მსოფლიოს ჩემპიონობის მოპოვებაში მას ხელი რუსმა ანასტასია ხომიაჩკოვამ შეუშალა და ჩვენებური ვერცხლს დასჯერდა. პირველ შეხვედრაში ჩვენმა მონაწილემ მონღოლი სარანცეცეგი დაამარცხა, მეოთხედფინალში კი იმ ბელარუს ანჟელა ჟილინსკაიასაც მოუგო, ვისთანაც ივნისში მინსკში, მეორე ევროპული თამაშების ლამის განაღდებული ფინალი (ბოლო წუთებამდე 2:0 უგებდა) ხელის ტრავმის გამო დათმო.

ფინალში რუსთან - სერგეი რიაბოვთან დამარცხდა ღვინიაშვილიც, ხოლო ლილუაშვილმა დასკვნითი პაექრობა მონღოლ ძიუდოისტ ალტანსუკ დოვდონთან წააგო. ნადარეიშვილმა ჯგუფში უკრაინელი ხრაჩიკ ოსიპიანი და მექსიკელი ალან კამპოსი დაამარცხა, ნახევარფინალში კი თავად წააგო რუსთა მომავალ მსოფლიოს ჩემპიონ იგორ ბეგლეროვთან.

ხვალ, 9 ნოემბერს მსოფლიოს ჩემპიონატში ქალებში მონაწილე არ გვეყოლება, ვაჟებში კი ჩვენგან ვახტანგ ჩიდრაშვილი (57). ლევან ნახუცრიშვილი (74) და დავით ლორიაშვილი (100) იჭიდავებენ. აღსანიშნავია, რომ ჩიდრაშვილი მსოფლიოს ხუთგზის ჩემპიონია და ტიტულის დაცვის შემთხვევაში მეექვსედ მოიპოვებს ამ წოდებას.

1319
მკითხველის კომენტარები / 0 /
მსგავსი ამბები
რუბრიკის სხვა სიახლეები
;