სამბისტთა ნაკრები: სოჭისთვის შემადგენლობა გაირკვა

გორში, მსოფლიოს ჩემპიონატისთვის მოსამზადებელ შეკრებაზე მყოფმა საქართველოს სამბისტთა ეროვნულმა ნაკრებმა ოთხშაბათს და ხუთშაბათს სპარინგ-შეხვედრები გამართა, რომლის შემდეგაც გუნდის მთავარმა მწვრთნელმა ჯონდო მუზაშვილმა დაასახელა 10-12 ნოემბერს სოჭში გასამართავ მსოფლიოს პირველობაზე წასაყვანი შემადგენლობა. 

მწვრთნელს რუსეთში სრულად დაკომპლექტებული, თუმცა კი გადახალისებული ვაჟთა ნაკრები მიჰყავს. ადრინდელთან შედარებით, გუნდში რამდენიმე ცვლილებაა, მაგრამ მთავარი სიურპრიზი ყველა დროის ყველაზე ტიტულოვანი ქართველი სამბისტის, მსოფლიოს 4-გზის ჩემპიონ ვახტანგ ჩიდრაშვილის (57) არყოფნაა, რისი მიზეზიც ჯანმრთელობის პრობლემებია - სპორტსმენი ადრინდელ ტრავმას იშუშებს, რათა გაზაფხულზე ჩასატარებელ ევროპის ჩემპიონატს სრულ ფორმაში შეხვდეს.

გუნდში დებიუტანტიცაა - ზაურ გაგნიძე (82), ვინც ნაკრების სტაჟიანი წევრი ნიკო კუცია (თუმცა იქ სხვევბიც იყვნენ კონკურენტები) ჩაანაცვლა. ამ ორს დიდი კონკურენცია ჰქონდათ ერთმანეთში, ყველაფერი კი არჩილ ჩოხელის საერთაშორისო მემორიალზე გაგნიძის გამარჯვებამ გადაწყვიტა.

ასევე ახალი კადრია თორნიკე ჭოველიძე 62 კილოგრამში, ვინც მსოფლიოსა და ევროპის მოქმედი ბრინჯაოს მედალოსანი ზვიად ოდოშაშვილი ჩაანაცვლა. გუნდში ისევ არიან ბოლო წლების უცვლელი მძიმე წონების ლიდერები: პაატა ღვინიაშვილი (90), დავით ლორიაშვილი (100) და ბექა ბერძენიშვილი (+100).

რაც შეეხება გოგოების ნაკრებს, იქ ამჯერად ოთხი მონაწილე გვეყოლება.

აქვე შეგახსენებთ, რომ ბულგარეთში გამართულ მსოფლიოს შარშანდელ პირველობაზე ჩვენმა ვაჟთა ნაკრებმა 7 მედალი მოიპოვა: 2-2 ოქრო-ვერცხლი და 3 - ბრინჯაო, რასაც გოგოებმა კიდევ ორი ბრინჯაო დაუმატეს.

ვაჟებიდან მსოფლიოს ჩემპიონები ჩიდრაშვილი და ღვინიაშვილი გახდნენ, ნახუცრიშვილი და კუცია მეორეზე გავიდნენ, მესამენი კი ლორიაშვილი, ბერძენიშვილი და ზურაბ ოდოშაშვილი (62) იყვნენ. გოგოებში პრიზიორები ოძელაშვილი და ქებაძე გახდნენ. ჩვენმა ნაკრებმა რაოდენობრივად ევროპის წლევანდელ პირველობაზეც 9 მედალი დაისაკუთრა, აქედან ვაჟებმა ისევ 7, ხოლო ქალებმა 2 ჯილდო მოინადავლეს, მაგრამ განსხვავება ხარისხშია. ვაჟებმა 1 ოქრო, 2 ვერცხლი და 4 ბრინჯაო ირგუნეს, ქალებმა კი - თითო ოქრო და ვერცხლი.

ევროპის ჩემპიონი ვაჟებში ნახუცრიშვილი გახდა, ოძელაშვილმა კი ზედიზედ მეორედ მოიპოვა ეს ტიტული. ვერცხლის მედლებს ღვინიაშვილი, ჩიდრაშვილი და ქებაძე დაეუფლნენ, ბრინჯაოსას - გუნდში ბოლო წამებზე ჩართული თიანეთელი ლევან ბერბერაშვილი (52), ოდოშაშვილი, კუცია და ბერძენიშვილი.

ნაკრები შეკრებას გორში 7 ნოემბერს დაამთავრებს, 8-ში ღამე კი სოჭში გაფრინდება.

საქართველოს ნაკრები
ვაჟები
52 კგ. გივი ნადარეიშვილი (ფოთი)
57 კგ. გენადი ჩირგაძე (ქუთაისი)
62 კგ. თორნიკე ჭოველიძე (ბათუმი)
68 კგ. შმაგი ლაგაზაური (ახმეტა)
74 კგ. ლევან ნახუცრიშვილი (მცხეთა)
82 კგ. ზაურ გაგნიძე (რუსთავი)
90 კგ. პაატა ღვინიაშვილი (ქარელი)
100 კგ. დავით ლორიაშვილი (მარტყოფი)
+100 კგ. ბექა ბერძენიშვილი (კასპი)

გოგოები
56 კგ. სალომე აბაშიძე (ბათუმი)
68 კგ. თეონა სუხიტაშვილი (ყვარელი)
72 კგ. ნინო ოძელაშვილი (წყნეთი)
+80 კგ. ელენე ქებაძე (ლაგოდეხი)

ყოველდღიური სპორტული გაზეთი "ლელო"
1181
მკითხველის კომენტარები / 0 /
მსგავსი ამბები
რუბრიკის სხვა სიახლეები
;