სამბო. ბერძენიშვილმა რიბაკი ისევ დააგდო

შოთა ჩოჩიშვილის სახელობის ძიუდოს აკადემიაში დაიწყო სახელოვანი ქართველი სამბისტის, მსოფლიოს ჩემპიონ არჩილ ჩოხელის ხსოვნის საერთაშორისო ტურნირი, რომელშიც საქართველოს ნაკრების გარდა, გამოდიან აზერბაიჯანის, სომხეთის, ბელარუსის, რუსეთისა და საბერძნეთის გუნდები.

პირველ დღეს შეჯიბრებაში 5 წონის - 52, 62, 74, 90 და +100 წარმომადგენლები ჩაებნენ. ჩვენმა ნაკრებმა 2 ოქრო მოიპოვა, ხოლო 52 კილოგრამში სულაც ქართული ფინალი გაიმართა: დიმიტრი მულაძემ გიგა ვარდოსანიძე დაამარცხა.

ძნელი გამოსაცნობი არაა, რომ ჩვენგან მეორე ოქროს მძიმეწონოსანი ბექა ბერძენიშვილი დაეუფლა. ამ წონაში მეორე ევროპული თამაშების ფინალი განმეორდა - ბერძენიშვილი გადამწყვეტ პაექრობაში კვლოავაც ბელარუსთა მსოფლიოს ოთხგზის ჩემპიონ იური რიბაკს შეხვდა და ამჯერადაც ისევე იოლად მოუგო, როგორც ივნისში მინსკში დაამარცხა: 11:0. საყურადღებოა, რომ მინსკის თამაშების მსგავსად, ბერძენიშვილმა აგერ უკვე მეორე ტურნირი მოიგო ისე, რომ ქულაც არ დაუკარგავს.

სამწუხაროდ, სხვა წონების ფინალში მონაწოილენი არ გვყოლია, თუმცა ჩვენი ნაკრების მონაგარი კიდევ 4 ბრინჯაოს მედალია. ტურნირის მესამე პრიზიორები ლევან ნახუცრიშვილი (74), თორნიკე ჯუღელი, ნიკა სიდამონიძე (ორივე - 90 კგ) და დავით რაზმაძე (+100) გახდნენ.
დანარჩენი 3 ოქრო საბერძნეთის, ბელარუსისა და რუსეთის წარმომადგენლებმა გაინაწილეს.

ტურნირი 8 სექტემბერს დასრულდება, როცა დარჩენილი 4 წონების ფალავნებიც იასპარეზებენ.

52 კგ.
1. დიმიტრი მულაძე; 2. გიგა ვარდოსანიძე (ორივე - საქართველო); 3. სამად ალიევი, ნასიმ უმზატევი (ორივე - აზერბაიჯანი).
62 კგ.
1. სავა კარაკიზიდი (საბერძნეთი); 2. ივან ანისკევიჩი (ბელარუსი); 3. ფუად მამადოვი, ტურალ ალაჰვერდიევი (ორივე - აზერბაიჯანი);
74 კგ.
1. ალექსანდრ კოკშა (ბელარუსი); 2. მაქსიმ იუდინი (რუსეთი); 3. ლევან ნახუცრიშვილი (საქართველო), რაფიკ მანუკიანი (სომხეთი).
90 კგ.
1. ანტონ სუროვცევი (რუსეთი); 2. ალექსანდრ სტეპანკოვი (ბელარუსი); 3. თორნიკე ჯუღელი, ნიკა სიდამონიძე (ორივე - საქართველო).
+100 კგ.
1. ბექა ბერძენიშვილი (საქართველო); 2. იური რიბაკი; 3. დიმიტრი ხოხლოვი (ორივე - ბელარუსი), დავით რაზმაძე (საქართველო).

287
მკითხველის კომენტარები / 0 /
მსგავსი ამბები
რუბრიკის სხვა სიახლეები
;