სამბო. მსოფლიოს ჩემპიონატის წინათქმა: საქართველო 9 ვაჟითა და 4 ქალით

დღეს, 10 ნოემბერს, სოჭში მსოფლიოს ჩემპიონატი იწყება სამბოში, რომელშიც 1000-მდე სპორტსმენი იასპარეზებს მსოფლიოს 94 ქვეყნიდან, პირდაპირი რეპორტაჟი კი 15 ქვეყანაში გადაიცემა.

მონაწილეთა შორის საქართველოს 13-კაციანი ნაკრებიცაა - 9 ვაჟი და 4 ქალი.

ვაჟთა გუნდის შემადგენლობა გვარიანადაა გადახალისებული, ამჯერად კი საქართველოს ღირსებას ფოთელი გივი ნადარეიშვილი (52), ქუთაისელი გენადი ჩირგაძე (57), ბათუმელი თორნიკე ჭოველიძე (62), ახმეტელი შმაგი ლაგაზაური (68), მცხეთელი მსოფლიოს შარშანდელი ვიცე-ჩემპიონი ლევან ნახუცრიშვილი (75), რუსთაველი ზაურ გაგნიძე (82), ქარელელი მსოფლიოს მოქმედი ჩემპიონი პაატა ღვინიაშვილი (90) და მსოფლიოს შარშანდელი მესამე პრიზიორები, მარტყოფელი დავით ლორიაშვილი (100) და კასპელი ბექა ბერძენიშვილი (+100) დაიცავენ.

ქალთა ტურნირში ბათუმელი სალომე აბაშიძე (56), ყვარლელი თეონა სუხიტაშვილი (68) და მსოფლიოს ორი შარშანდელი მესამე პრიზიორი, წყნეთელი ნინო ოძელაშვილი (72, თან ეს ევროპის ბოლო ორი პირველობის გამარჯვებულია) და ლაგოდეხელი ელენე ქებაძე (+80) გამოვლენ.

დღეს სოჭის ყინულის სპორტის სასახლე "აისბერგში" სპორტულ სამბოში 52, 68 და 90 კილოგრამების წარმომადგენელი ვაჟები და 48, 60, 72-ის ქალები იჭიდავებენ. ხვალ ასპარეზობაში 57, 74 და 100-კილოგრამიანი ვაჟები და 52, 64 და 80-ის მანდილოსნები ჩაებმებიან, მსოფლიოს ჩემპიონატს კი დაასრულებენ "ძლიერი სქესი" 62, 82 და მძიმე წონებში, "სუსტი სქესი" კი - 56, 68 და +80-ში.

(იბეჭდება მცირე ცვლილებით)
ყოველდღიური სპორტული გაზეთი "ლელო"
1826
მკითხველის კომენტარები / 0 /
მსგავსი ამბები
რუბრიკის სხვა სიახლეები
;