სამბო. ქართველები ბელარუსთა წინააღმდეგ - ბერძენიშვილმა ისევ რიბაკი მოინადავლა

ბოლო უქმეებზე შოთა ჩოჩიშვილის სახელობის ძიუდოს აკადემიამ სამსახურებრივი მოვალეობისას ტრაგიკულად დაღუპული სახელოვანი ქართველი სამბისტის, მსოფლიოს ჩემპიონ არჩილ ჩოხელის ხსოვნის IV საერთაშორისო ტურნირს უმასპინძლა სამბოში, რომელიც 2016 წლიდან სამბოს საერთაშორისო ფედერაციის - ფიას-ის კალენდარშია შეტანილი.

მასში მონაწილეობდნენ საქართველოს, სომხეთის, აზერბაიჯანის, ბელარუსის, საბერძნეთის გუნდები და რუსეთიდან ჩამოსული ცალკეული სპორტსმენები. 

სამწუხაროდ, ყველა დარეგისტრირებული ნაკრები არ გვესტუმრა. მაგალითად, გერმანია და ყაზახეთი, რომლებიც იყვნენ წინასწარ განაცხადში, რუსეთიდან კი საკუთარი ინიციატივით რამდენიმე სპორტსმენი გვესტუმრა.

ერთი მათგანის ირგვლივ საინტერესო ვითარებაც შეიქმნა: თურმე ანტონ სუროვცევი (90) მამასთან ერთად მანქანით ტულადან წამოსულა თბილისში და შაბათ დილით, როცა შეჯიბრება იწყებოდა და როცა მას უნდა ეჭიდავა, საქართველოს საზღვარს მოსდგომია.

ეტყობა, ასე ეულად და არაოფიციალურად, გუნდის გარეშე მოსიარულე სპორტსმენი ჩვენს მებაჟეებსაც გაუკვირდათ და სამბოს ფედერაციაში გადაუმოწმებიათ, ნამდვილად იყო თუ არა დარეგისტრირებული ის ტურნირში. ბუნებრივია, აქედან დადებითი პასუხი მიიღეს და მხოლოდ მერე შემოუშვეს საზღვარზე, სუროვცევი კი თბილისში ჩამოსვლისთანავე შეჯიბრებაში ჩაება და 90 კილოგრამში გაიმარჯვა კიდეც...

არჩილ ჩოხელის ხსოვნის ტურნირი ჩვენი ნაკრების უპირატესობით წარიმართა და ჯონდო მუზაშვილის შეგირდებმა გამოსვლა 16 მედლით დაასრულეს: 4 ოქრო, 2 ვერცხლი და 10 ბრინჯაო მოიპოვა.

ჩემპიონები დიმიტრი მულაძე (52), ბესარიონ ბერულავა (82), დავით ლორიაშვილი (100) და ბექა ბერძენიშვილი (+100) გახდნენ. გიგა ვარდოსანიძე (52) და მინდია ლილუაშვილი (68) ვერცხლს დასჯერდნენ, ხოლო მესამეზე გივი ნადარეიშვილი (57), დავით კოპაძე (68), ლევან ნახუცრიშვილი (74), ზაურ გაგნიძე, ზვიად თევდორაშვილი (ორივე - 82), თორნიკე ჯუღელი, ნიკა სიდამონიძე (ორივე - 90 კგ), პაატა ღვინიაშვილი, პაატა შარიქაძე (100) და დავით რაზმაძე (+100) გავიდნენ. 

ისიც აღსანიშნავია, რომ 9 წონიდან 5-ის ფინალში ვიჭიდავეთ, ხოლო ერთ წონაში - 52-ში სულაც ქართული ფინალი გაიმართა, სადაც დიმიტრი მულაძემ გიგა ვარდოსანიძე დაამარცხა. სტუმართაგან მხოლოდ სომხეთის ნაკრები დაგვეჩაგრა, რომელიც ოქროს გარეშე დარჩა, თუმცა არც სხვა სინჯის მედლები მოუპოვებიათ ხვავრიელად, დანარჩენი ოქროებიდან კი ორი რუსეთმა, ხოლო საბერძნეთმა და აზერბაიჯანმა თითო-თითო გაინაწილეს.

ჩვენებურთა მონაწილეობით გამართული ფინალებიდან შედარებით გამონაკლისია ქართული ფინალი, რადგან თანაგუნდელები კარგად იცნობენ ერთმანეთს (თუმცა ორივე მათგანმა მთელი ტურნირი ძალიან კარგად ჩაატარა), დანარჩენი ჩემპიონებიდან კი ძნელია, ვინმეს გამოყოფა, ყველამ იმდენად ძლიერად გაიმარჯვა ფინალურ პაექრობებში. თანაც, უკლებლივ ყველამ წმინდად გაიმარჯვა და მთელი თავით აღემატებოდნენ კონკრეტულ მეტოქეებს. 

მძიმე წონაში მეორე ევროპული თამაშების ფინალი განმეორდა: ერთმანეთის წინაშე კვლავაც ბერძენიშვილი და ბელარუსთა მსოფლიოს ოთხგზის ჩემპიონი სამბოში და მსოფლიოს მედალოსანი ძიუდოში იური რიბაკი წარდგნენ. აქ მხოლოდ მასპინძელი ქალაქი შეიცვალა - მინსკის შემდეგ ამ დაპირისპირებას ამჯერად თბილისმა უმასპინძლა, თუმცა შედეგი უცვლელი დარჩა:

ბერძენიშვილი ამჯერადაც წარმატებული „რიბაკი“ გამოდგა და ტიტულოვანი ვეტერანი კვლავაც დამაჯერებლად, უშანსოდ და წმინდად დაამარცხა: 11:0 ანგარიში უკვე თავისთავად მიუთითებს, თუ რაოდენ დიდ უპირატესობას ფლობდა ჩვენი ფალავანი. აღსანიშნავია, რომ ბერძენიშვილმა ევროპული თამაშების შემდეგ, უკვე მეორე ტურნირი მოიგო ისე, რომ ერთი ქულაც არ დაუკარგავს!

ლორიაშვილმაც კოლოსალური უპირატესობით გაიმარჯვა ფინალში და მანაც ბელარუსი დაამარცხა - სერგეი ლესიაკი ორჯერ დააგდო 4-ქულიანზე და ჯამში 10:0 მოუგო.

მოგეხსენებათ, საჭიდაო სახეობებში ილეთები რაოდენ გაძვირდა და გაიშვიათდა, ასეთ დროს კი ორჯერ 4-ქულიანის გაკეთება გამორჩეული ამბავია. განსაკუთრებით შთამბეჭდავი მეორე გდება იყო, როცა მეტოქე ორივე ხელით ლამის თავზევით ასწია და ისე დაახეთქა ლეიბს. მან ყველა გდება ფეხში შესვლებით გააკეთა. 

ფინალში ბერულავამაც ბელარუსი კონკურენტი დაამარცხა. მან თავიდანვე მძლავრად შეუტია ტიმოფეი ემელიანოვს და 4:0 დაწინაურდა. მისი უპირატესობა იმდენად დიდი იყო, რომ გამარჯვება დროის ამბავი გახლდათ, თუმცა ჩვენმა ფალავანმა სასტვენს არ დაუცადა და ფეხიდან აყვანილი მეტოქე 4-ქულიანზე გადააგდო. 

ჩვენს ნაკრებს მეხუთე ოქროს მოპოვებაც შეეძლო, მაგრამ მინდია ლილუაშვილი ფინალში ტაქტიკურად შეცდა... ამ წონაშიც - 68 კილოგრამში ევროპის წლევანდელი ჩემპიონატის ფინალი განმეორდა: ლილუაშვილი რუსი მიხაილ ვორობიოვის წინააღმდეგ. მაშინ თუ ქართველმა მოიგო, სამწუხაროდ, ამჯერად რუსმა რევანში აიღო.

არადა, ლილუაშვილი ახლაც ახლოს იყო გამარჯვებასთან, რადგან ვორობიოვს აქტიურად შეუტია და პირველივე წუთზე ქულაც დაიმსახურა მისი გაფრთხილებისთვის. ამ მომენტამდე ჩვენი ფალავანი დიდ უპირატესობას ფლობდა, მაგრამ ქულის მოპოვების შემდეგ შეტევის ნაცვლად ანგარიშის შენარჩუნებაზე დაიწყო ჭიდაობა და ბოლო წუთზე თავადაც გააფრთხილეს. შეხვედრაც ასე მორჩა - 1:1, თუმცა მოგება რუსს დარჩა. 

ეს ტურნირი ჩვენი ნაკრებისთვის ერთ-ერთი მთავარი შესარჩევი შეჯიბრება იყო მსოფლიოს ჩემპიონატისთვის ნაკრების დასაკომპლექტებლად, რომელიც 8-10 ნოემბერს სეულში ჩატარდება. ბუნებრივია, ძირითადი ბირთვი გამოიკვეთა, თუმცა ამ შეჯიბრებაზე გამარჯვება ნაკრებში ადგილის დაბევებას არ ნიშნავს. მით უფრო, რომ მთელი მოსამზადებელი ციკლი ჯერ კიდევ წინაა. მუზაშვილს სურს, სეულში წასვლამდე სამი შეკრება გაიაროს, ოღონდ ეს ფინანსებზეა დამოკიდებული. თანხის გამოყოფაზეც შეთანხმება მიღწეულია და, იმედია, ამ ჩანაფიქრის ასრულებას ხელს არაფერი შეუშლის. მით უფრო, რომ შეკრებების გავლას მწვრთნელი საქართველოში გეგმავს და არა უცხოეთში. 

52 კგ.
1. დიმიტრი მულაძე; 2. გიგა ვარდოსანიძე (ორივე - საქართველო); 3. სამად ალიევი, ნასიმ უმზატევი (ორივე - აზერბაიჯანი).

57 კგ.
1. ეივაზ ბახშაევი (აზერბაიჯანი); 2. ულადისლაუ ბურძი (ბელარუსი); 3. გივი ნადარეიშვილი (საქართველო), პოღოს ბადალიანი (სომხეთი).

62 კგ. 
1. სავა კარაკიზიდი (საბერძნეთი); 2. ივან ანისკევიჩი (ბელარუსი); 3. ფუად მამადოვი, ტურალ ალაჰვერდიევი (ორივე - აზერბაიჯანი).

68 კგ.
1. მიხაილ ვორობიოვი (რუსეთი); 2. მინდია ლილუაშვილი; 3. დავით კოპაძე (ორივე - საქართველო), ვლადისლავ საიაპინი (ბელარუსი).

74 კგ.
1. ალექსანდრ კოკშა (ბელარუსი); 2. მაქსიმ იუდინი (რუსეთი); 3. ლევან ნახუცრიშვილი (საქართველო), რაფიკ მანუკიანი (სომხეთი).

82 კგ.
1. ბესარიონ ბერულავა (საქართველო); 2. ტიმოფეი ემილიანოვი (ბელარუსი); 3. ზაურ გაგნიძე, ზვიად თევდორაშვილი (ორივე - საქართველო).

90 კგ. 
1. ანტონ სუროვცევი (რუსეთი); 2. ალექსანდრ სტეპანკოვი (ბელარუსი); 3. თორნიკე ჯუღელი, ნიკა სიდამონიძე (ორივე - საქართველო).

100 კგ.
1. დავით ლორიაშვილი (საქართველო); 2. სერგეი ლესიაკი (ბელარუსი); 3. პაატა ღვინიაშვილი, პაატა შარიქაძე (ორივე - საქართველო). 

+100 კგ.
1. ბექა ბერძენიშვილი (საქართველო); 2. იური რიბაკი; 3. დიმიტრი ხოხლოვი (ორივე - ბელარუსი), დავით რაზმაძე (საქართველო). 

ყოველდღიური სპორტული გაზეთი "ლელო"
220
მკითხველის კომენტარები / 0 /
მსგავსი ამბები
რუბრიკის სხვა სიახლეები
;