სამეფო კარის ინტრიგები - სად გადის პერესის მოთმინების ზღვარი?

ცოტა ხნის წინ ზინედინ ზიდანმა "რეალთან" კონტრაქტი 2020 წლის ივლისამდე გააგრძელა და იქვე, პრესკონფერენციაზე, საგულისხმო რამ თქვა - კონტრაქტი არაფრის გარანტია არ არისო. მართალიცაა, თუ გავითვალისწინებთ ახლო წარსულის გამოცდილებას...

"სანტიაგო ბერნაბეუზე" ამ ბოლო დროს სულ უფრო ხშირად ისმის სტვენა, ვიდრე აპლოდისმენტები. არც არის გასაკვირი, რადგან მიმდინარე სეზონში "რეალის" საშინაო თამაშების ნახევარი ქულების დაკარგვით მთავრდება.

16 მატჩი (ყველა ტურნირის ჩათვლით) და მხოლოდ 8 გამარჯვება - სტატისტიკა ამ შემთხვევაში ყველაზე მეტყველი არგუმენტია.

ზიდანი დიდხანს არ აღიარებდა კრიზისს, რაც კიდევ უფრო ნათლად გამოჩნდა "ვილიარეალთან" ბოლო უქმეებზე განცდილი საშინაო მარცხით. უცნაური ფაქტია - "რეალს" ახლა 16 ქულა აშორებს გასავარდნ ზონას და მთელი 19 - პირველ ადგილს, სადაც მისი მოსისხლე მტერი "ბარსელონა", ფაქტობრივად, უკონკურენტოდ არის გამოჭიმული.

და ეს მაშინ, როცა ზიდანის წინამორბედ რაფა ბენიტესს არ აპატიეს იმავე "ბარსასთან" საშინაო 0:4 და 5-ქულიანი ჩამორჩენა.

გამომდინარე იქიდან, რომ "რეალის" ბოსი ფლორენტინო პერესი არ გამოირჩევა დიდი მოთმინების უნარით (რაც ზიდანმაც მშვენივრად იცის), ნუ გამოვრიცხავთ, რომ "სამეფო კლუბის" ცხელ სამწვრთნელო სკამზე მალე მორიგი ცვლილების მოწმენი გავხდეთ.

ვერ ვიტყვით, რომ ზიდანს დღეს ან ხვალ შეცვლიან, მაგრამ ევროპელი ანალიტიკოსები უკვე განიხილავენ მის სავარაუდო შემცვლელთა კანდიდატურებს, რომელთა შორის გერმანელები აშკარა უმრავლესობაში არიან...

იოახიმ ლიოვი

2006 წლიდან მოყოლებული, იოახიმ ლიოვის "მანშაფტი" უმტკივნეულოდ იტანს თაობების ცვლას და თან ახერხებს, მუდმივად იყოს მსოფლიოს საუკეთესო გუნდების პირველ ოთხეულში. სამი ბრინჯაო, ვერცხლი და ბოლოს მუნდიალის ოქრო - ასეთია ლიოვის მონაგარი ამ დროისთვის.

საყოველთაოდ ცნობილია თავად ფლორენტინო პერესის სიმპათიებიც გერმანიის ნაკრების თავკაცის მიმართ და აქ უადგილო არ იქნება, ლიოვის სიტყვების გახსენებაც: "ძალიან მომწონს ესპანური ლა ლიგა და იქაური გუნდების საფეხბურთო ფილოსოფია".

58 წლის ლიოვს აქვს სერიოზული შანსი, იუპ ჰაინკესისა და ბერნდ შუსტერის შემდეგ "სამეფო კლუბის" ისტორიაში მესამე გერმანელი მწვრთნელი გახდეს.
პლუსი: სტაბილურობა, პროფესიონალიზმი, ავტორიტეტი, გამარჯვებულის მენტალიტეტი.

მინუსი: კონტრაქტი გერმანიის საფეხბურთო კავშირთან, რომელიც 2020 წლის ზაფხულში იწურება. მაგრამ პერესმა კარგად იცის, რომ თუ პრობლემის მოგვარება შეიძლება ფულით, ეს უკვე აღარ არის პრობლემა, ეს ჩვეულებრივი ხარჯია.

იურგენ კლოპი

"ლივერპულის" მწვრთნელს გერმანიაში ყოფნისას ჰქონდა ტიტულები, მაგრამ ევროპული მასშტაბით ჯერ ხელშესახები წარმატებისთვის არ მიუღწევია, თუმცა მადრიდში მას ამის შანსი ექნება.

50 წლის კლოპის "დორტმუნდმა" 2013 წელს ითამაშა ჩემპიონთა ლიგის ფინალში, სადაც სწორედ "რეალის" ძლევის (4:3 ორი მატჩის ჯამში) შედეგად მოხვდა, 2016 წლის გაზაფხულზე გემო გაუსინჯა ევროპალიგის ფინალსაც... მისი დიდი დამსახურებაა, რომ "ლივერპული" დაბრუნდა პრემიერლიგის ელიტაში და, შესაბამისად, ჩემპიონთა ლიგაშიც.

პლუსი: ქარიზმა, ემოცია. კლოპის გუნდების თამაშის ყურებისას, უბრალოდ, ვერ მოიწყენ.
მინუსი: ამბობენ, რომ არ უყვარს მუშაობა იმ კლუბებში, სადაც პრეზიდენტები უცერემონიოდ ერევიან გუნდის "სამზარეულოში".

თომას ტუხელი

ამ 44 წლის კაცს, რომლის ყულაბაში ბუნდესლიგის ვერცხლი, ბრინჯაო და გერმანიის თასია, ჯერ კიდევ მაშინ განიხილავდნენ "რეალის" მწვრთნელობის კანდიდატად, როცა "დორტმუნდიდან" წავიდა.

იყო ვარიანტი, 2017 წლის ოქტომბერში "ბაიერნის" თავკაციც გამხდარიყო, როცა "რეკორდმაისტერმა" კარლო ანჩელოტი დაითხოვა. თუმცა, როგორც ამბობენ, ბავარიული გრანდის მესვეურებს (სხვათა შორის, ტუხელიც ბავარიელია) კითხვები გაუჩნდათ არა მის პროფესიონალიზმთან, არამედ, პიროვნულ თვისებებთან დაკავშირებით...

პლუსი: ასაკი, აქცენტი შემტევ ფეხბურთზე, ეფექტურობა, ახალგაზრდებთან მუშაობის უნარი.
მინუსი: საბოლოოდ, პერესი, ალბათ, უარს იტყვის "ბუზღუნა" (როგორც მისი ქვეშევრდომები ჰყვებიან) გერმანელზე, რომელსაც ხანდახან კლუბის მმართველთა საქმეებში ჩარევაც "ეხერხება".

ანტონიო კონტე

48 წლის იტალიელს ახლა საუკეთესო დროება არ უდგას "ჩელსიში". აშკარაა, რომ "არისტოკრატები" ვერ მოახერხებენ ტიტულის (რაც პირველ რიგში სწორედ კონტეს დამსახურებაა) დაცვას.

ამას გარდა, ჩემპიონთა ლიგის პლეი ოფში ლონდონელებს "ბარსელონასთან" მოუწევთ საქმის დაჭერა და ეს კიდევ უფრო ამცირებს იმის შანსს, რომ ამ სეზონში "ჩელსი" რაღაც ღირებულს მოიგებს.

პლუსი: ჟინი, გამარჯვებულის მენტალიტეტი, ვარსკვლავურ შემადგენლობასთან მუშაობის უნარი და გამოცდილება.
მინუსი: როგორც ჩვენში იტყვიან, შარიანი კაცია. მიდრეკილია უხეში დიქტატისკენ.

მაურისიო პოჩეტინო

ლიოვის შემდეგ ყველაზე კარგად შეიძლება მოერგოს "რეალს". არგენტინელს აქვს თითქმის ყველაფერი საიმისოდ, რომ "სანტიაგო ბერნაბეუზე" შინაური კაცი გახდეს.

"ესპანიოლის" ლეგენდა, რომელსაც სძულს "ბარსელონა" - მარტო ამის გამო შეიძლება გახდეს უპირველესი ფავორიტი პერესის სიაში.

45 წლის პოჩეტინო, შედარებით მოკრძალებული შემადგენლობით, რამდენიმე სეზონია, ეჭიდავება პრემიერლიგის ტიტანებს, რომელთა შორისაც, სწორედ მისი წყალობით, უკვე "ტოტენჰემიც" ფიგურირებს.

მის ხელში იქცნენ მსოფლიო ფეხბურთის ვარსკვლავებად დელე ალი და ჰარი კეინი (ბოლო დროს ორივე მათგანს უკავშირებენ "რეალს"). საფუძველს არ არის მოკლებული მოსაზრება, რომ პოჩეტინო უკვე მომწიფდა გაცილებით დიდი გამოწვევისთვის.

პლუსი: მაღალი კვალიფიკაცია, რაც უკვე დაამტკიცა. ამას გარდა, ჩინებულად ეხერხება გუნდში ჯანსაღი კლიმატის უზრუნველყოფა.
მინუსი: არანაირი ტიტული. არ აქვს მზა ვარსკვლავებთან მუშაობის დიდი გამოცდილება.

ყოველდღიური სპორტული გაზეთი "ლელო"
1363
მკითხველის კომენტარები / 0 /
მსგავსი ამბები
რუბრიკის სხვა სიახლეები
;