სამეფო კლუბის ლიდერად შეგულებული ვარსკვლავი, რომელიც თაროზე შემოდეს

25 წლის ისკო ალარკონი "რეალის" ახალი სეზონის ლიდერად მოიაზრებოდა, მაგრამ "სამეფო კლუბს" დიდი ჩავარდნა ჰქონდა, ვერც ტექნიკური ნახევარმცველი გამოირჩეოდა დიდად.

აი, ზინედინ ზიდანის კრებული, როგორც იქნა, ათამაშდა და ოქტომბრის შემდეგ პირველად, მოგებას მოგება დაურთო, მაგრამ... ახლა ისკო აღარ თამაშობს. ის "რეალის" სასტარტო შემადგენლობიდან გაქრა.

არ თამაშობს ისკო, მაგრამ შესანიშნავია "რეალი". ბუნებრივია, ჩნდება კითხვა: იქნებ, სწორედ ისკოზე აქცენტის გაკეთება იყო ზიდანის შეცდომა. იქნებ, სწორედ ეს იყო კრიზისის პირველი ხელის შემწყობი პირობა?

შესაძლოა, ვაბუქებთ და ზიდანი ისკოს დიდი მატჩისთვის ინახავს - შესაძლოა, ის უნდა გახდეს პსჟ-სთან დუელის მომგები გმირი, მაგრამ ფაქტია - რაც გარეთ ბეილი "რეალის" სასტარტო შემადგენლობას დაუბრუნდა, ისკოს საქმე ცუდად წავიდა.

გადავავლოთ თვალი განვლილ მატჩებს. არ შეიძლება უარყოფა, რომ ისკო ხანდახან უბრალოდ კარგად კი არა, ძალიან კარგად თამაშობდა, მაგრამ იმ მატჩებში, როცა "რეალს" ყველაზე მეტად ესაჭიროებოდა ლიდერი შუაში, ისკო ყველაზე მეტად "იკარგებოდა". სწორედ ამ მატჩებში წააგო "რეალმა" ლა ლიგა.

ისკოს დიდი ტალანტის დაუნახაობა შეუძლებელია, მაგრამ ისიც კარგად ჩანს, რომ ეს ტალანტი "რეალის" საჭიროებებს სათანადოდ ვერ ხმარდება.

"რეალის" კრიზისს სხვადასხვა მიზეზი ჰქონდა - თავდამსხმელთა სუსტი თამაში, არასტაბილურობა დაცვაში, გუნდის მიერ მებრძოლი სულის დაკარგვა, თუნდაც, ხანდახან, ცუდი მსაჯობაც...

მაგრამ ვერც უცნაურ რეალობას გავექცევით - როცა ისკო კარგად თამაშობს, როგორც წესი, "რეალი" ვერ იგებს. სიტყვაზე, როცა ლუკა მოდრიჩს ან ტონი კროოსს ვარსკვლავური თამაშები გამოსდით - "რეალი" თითქმის ყოველთვის გამარჯვებული რჩება.

ბოლო ორ მატჩში "დეპორტივოსა" და "ვალენსიას" წინააღმდეგ ისკო არ გამოჩენილა და "რეალმა" 11 გოლი გაიტანა. თუ გავიხსენებთ, ისკო არც "სევილიასთან" 5:0 მოგებულ შეხვედრაში ყოფილა.

დიახ, ის არც 0:3-ზე წაგებულ კლასიკოში გამოჩენილა, მაგრამ იმ თამაშების დიდ უმრავლესობაში, როცა "სამეფო კლუბი" ქულებს კარგავდა, ისკო მოედანზე იყო.

"მალაგას" ყოფილი პლეიმეიქერი გაღიზიანებულიც ჩანს - როცა იგი კოპა დელ რეის მატჩზე გამოცვალეს, ისკოს არც კი შეუმჩნევია თავისი შემცვლელი ბორხა მაიორალი, არც ზიდანი...

შეიძლება, თამაშის სტილშია საქმე? ისკოს სტილი და ბურთის ფლობა ბოლო დროის "რეალს" ნაკლებად შეეფერება, რომელიც ყველაზე ეფექტური სწრაფი კონტრშეტევებისას არის.

როცა ისკო ნაკრებში თამაშობს, ის ბრწყინვალე მომენტებს გვჩუქნის, როგორც ეს იტალიასთან საკვალიფიკაციო მატჩში იყო. მაგრამ მისთვის საუბედუროდ, ნაკრები სულ სხვა სტილით თამაშობს და ზიდანის "რეალი" - სულ სხვანაირად.

"ლოს ბლანკოსი" ისკოს გარეშე უკეთ თამაშობს და ეს უკვე შეამჩნია ფრანგმა მწვრთნელმა, რომელიც აქცენტის გაკეთებას მასზე აპირებდა. ფაქტია, ისკოს თავს რაღაც ვერ არის ისე...

"რეალმა" თითქმის 300-დღიანი პაუზის მერე პირველად ითამაშა შეტევაში BBჩ-ით და ამან შედეგი გამოიღო. ტრიოს ანგარიშზე უკვე 400 გოლია, 400! აქედან კრიშტიანო რონალდოზე 225 მოდის, ქარიმ ბენზემაზე - 99, გარეთ ბეილზე - 76 2013/14 წლების სეზონიდან მოყოლებული. შეტევის ტრიოში ისკოს ადგილი აღარ რჩება, ის აგებს ბრძოლას შუახაზის სამეულთანაც (მოდრიჩი, კაზემირო, კროოსი) და რჩება მშრალზე.

რუსეთში გასამართავი მუნდიალი უკვე კარს არის მომდგარი, ხულიენ ლოპეტეგი შიშობს, რომ პრობლემა სერიოზულია, როგორც ისკოს, ასევე მარკო ასენსიოს შემთხვევაში:

"დარწმუნებული ვარ, რომ ისინი კიდევ ითამაშებენ, მაგრამ ვშიშობ, რომ მარკო და ისკო არასათანადო სათამაშო პრაქტიკას იღებენ. სხვა საქმეა დიეგო კოშტა, გამოჩნდა და ეგრევე დაამტკიცა, ის აუცილებლად იქნება ჩემს მომდევნო სიაში", - როგორც ხედავთ, ისკოს ეს სიტუაცია, შესაძლოა, ნაკრებში ადგილის დაკარგვად და მუნდიალის გამოტოვებადაც დაუჯდეს.

არადა, ყველაფერი რა საოცნებოდ იწყებოდა...

ყოველდღიური სპორტული გაზეთი "ლელო"
1328
მკითხველის კომენტარები / 0 /
მსგავსი ამბები
რუბრიკის სხვა სიახლეები
;