ბორჯღალოსნები. ვისი აჯობებს?!

საქართველოს ნაკრები ხვალ "ავჭალის სარაგბო სტადიონზე" სამოას ეროვნულ გუნდს დაუპირისპირდება. ეს "ბორჯღალოსნების" მეორე მატჩია ნოემბრის ტესტებზე.

საქართველოს ნაკრების ახალზელანდიელმა მწვრთნელმა მილტონ ჰეიგმა საბრძოლო რაზმი დაასახელა, რომელშიც სამი დებიუტანტი მოხვდა. ძირითად შემადგენლობაში ითამაშებს მგეზავი თედო აბჟანდაძე.

ფულბეკად ლაშა ხმალაძე გადაინაცვლებს, რომელიც ამპლუით მგეზავია. ის ტრავმირებულ სოსო მათიაშვილს შეცვლის. ცენტრში კვლავ თამაზ მჭედლიძისა და მერაბ შარიქაძის დუეტს ვიხილავთ, ფრთაზე თავის მესამე კეპს მოიხვეჭს ზურაბ ძნელაძე, ხოლო მეორე ფრთაზე გიორგი კოშაძის ნაცვლად გიორგი კვესელაძე დადგება, რომელმაც ფლორენციაში შეცვლაზე ითამაშა.

სამი ახალი სახეა მარაქფაში და ორი მათგანი დებიუტანტია. ორივე ბურჯია: 26 წლის ბექა გიგაშვილი "გრენობლთან" ერთად ელიტურ, პირველ დივიზიონში წლეულს აღზევდა, პირველსავე სეზონში 6 მატჩში მიიღო მონაწილეობა, ერთი ლელო გაიტანა და ორჯერ მოხვდა სიმბოლურ ნაკრებში.

პირველ დივიზიონში პირველ სეზონს ატარებს 20 წლის გურამ გოგიჩაშვილი, რომელმაც აბჟანდაძის დარად თავი უმცროს "ბორჯღალოსნებში" თამაშით გამოიჩინა. ის პარიზულ კლუბში თბილისის "ლოკომოტივიდან" წლეულს გადავიდა. ახალ გუნდში სწრაფადვე დამკვიდრდა და საფრანგეთის ჩემპიონატის 7 მატჩის გარდა, ორჯერ ჩემპიონთა თასზეც ითამაშა.

კვაჭის პოზიციაზე თადარიგში ამჯერადაც შალვა მამუკაშვილია, მეორე ხაზში შალვა სუთიაშვილი, ხოლო მესამეში ბექა ბიწაძე შევა. 9 ნომრის შეცვლა გელა აფრასიძეა, ცენტრში ლაშა მალაღურაძე გამოჩნდება, ხოლო კიდევ ერთი უკანახაზელი ანზორ სიჭინავაა, რომელსაც იტალიასთან არ უთამაშია.

დებიუტანტების გარდა, სამოასთან მატჩი ღირსშესანიშნავი კიდევ ოთხი ბორჯღალოსნისთვისაა: თამაზ მჭედლიძე სამოასთან 50-ე კეპს მოიხვეჭს, შალვა მამუკაშვილი მე-60, ხოლო სიჭინავასა და აფრასიძისთვის ეს მე-10 სანაკრებო თამაში იქნება.

აქამდე საქართველოსა და სამოას ნაკრებებს ოთხჯერ უთამაშიათ. "ბორჯღალოსნებმა" ორჯერ მოიგეს, ერთხელ ფრეს დასჯერდნენ და ერთიც 15 წლის წინათ, 2003 წლის მსოფლიოს თასზე წააგეს.

შეგახსენებთ, რომ საქართველოსა და სამოას ნაკრებების მატჩი 18 საათზე დაიწყება.

საქართველო-სამოა

საქართველო: 15. ლაშა ხმალაძე, 14. გიორგი კვესელაძე, 13. თამაზ მჭედლიძე, 12. მერაბ შარიქაძე, 11. ზურაბ ძნელაძე, 10. თედო აბჟანდაძე, 9. ვასილ ლობჟანიძე. 1. მიხეილ ნარიაშვილი, 2. ჯაბა ბრეგვაძე, 3. დავით ქუბრიაშვილი, 4. ნოდარ ჭეიშვილი, 5. ლაშა ლომიძე, 6. ოთარ გიორგაძე, 7. გიორგი ცუცქირიძე, 8. ბექა გორგაძე.
16. შალვა მამუკაშვილი, 17. გურამ გოგიჩაშვილი, 18. ბექა გიგაშვილი, 19. შალვა სუთიაშვილი, 20. ბექა ბიწაძე, 21. გელა აფრასიძე, 22. ჯაბა მალაღურაძე, 23. ანზორ სიჭინავა

სამოა: 15. აუსი ტუალა, 14. ედ ფიდოუ, 13. რეი ლილო, 12. ალაპატი ლეიუა, 11. ჯეი ჯეი ტუალანგი, 10. ტუსი პისი, 9. დევიდ პოლატაივაო. 1. ლონგოვიჰი მულიპოლა, 2. მოტუ მატუჰუ, 3. პოლ ალოემილე, 4. ქეინ ლუაუპეპე, 5. ფილო პაულო, 6. პიულა ფაჰასალელე, 7. ჯეკ ლემი, 8. ჯოშ ტაირელი
16. მანუ ლეიატუა, 17. ჯორდან ლეი, 18. ჯეიმზ ლუი, 19. მეთ ლუამანუ, 20. ფაიფილი ლევავე, 21. პელე კაული, 22. დანჯელო ლაუილა, 23. ალოფა ალოფა
მსაჯი: კარლ დიქსონი (ინგლისი)

ნოემბრის ტესტები

რუმინეთი-აშშ
ჰონგკონგი-კენია
ფიჯი-ურუგვაი
იტალია-ავსტრალია
უელსი-ტონგა
ინგლისი-იაპონია
კანადა-გერმანია
ესპანეთი-ნამიბია
შოტლანდია-სამ.აფრიკა
ირლანდია-ახ.ზელანდია
საფრანგეთი-არგენტინა
ჩილე-მაორები

ყოველდღიური სპორტული გაზეთი "ლელო"
1629
მკითხველის კომენტარები / 1 /
სოსო
0
ეეჰ,ძალიან ცუდი მინდორი იქნება ალბათ,მაგრამ უკან დასახევი გზა აღარ გვაქვს,თუ ეგ თამაშიც ვერ მოვიგეთ და თან დამაჯერებლად,უკვე თვითონ ნაკრებიც დაჰკარგავს თავდაჯერებას.ასე რომ წინ ბიჭებო,გადაუარეთ სამოას.სასწორზე თქვენი პრესტიჟია.
მსგავსი ამბები
რუბრიკის სხვა სიახლეები
;