სამი ქართველი პოლონურ ფინალში: ხინჩეგაშვილი, ოდიკაძე, კენჭაძე

ვარშავაში მიმდინარე "ციოლკოვსკის მემორიალის" ფინალში დღეს სამი ქართველი იჭიდავებს: ვლადიმერ ხინჩეგაშვილი (65), ავთანდილ კენჭაძე (74) და ელიზბარ ოდიკაძე (97).

ხინჩეგაშვილისთვის დღევანდელი ფინალი სულაც შარშანდელი ევროპირველობის გამეორება იქნება (ოღონდ - 61 კილოგრამისა), რადგან მისი მეტოქე, მაშინდელის დარად, ახლაც რუსთა ჩეჩენი ფალავანი ახმედ ჩაკაევი იქნება. შეგახსენებთ, რომ იმ დრამატულ ფინალში ხინჩეგაშვილმა ჩეჩენს 0:4 ამოუქაჩა.

ხინჩეგაშვილმა ვარშავაში მერვედფინალში 5:3 დაამარცხა ჩინელი ჰასიბაგენა ჰასიბაგენა, მეოთხედფინალში კი საკმაოდ ძლიერი მოლდოველი ანდრეი პერპელიტა 7:2 დაჯაბნა. ნახევარფინალში იოლად, 11:0 გაანადგურა ბულგარელი დიმიტარ ივანოვი.

ამავე წონაში პირველივე პაექრობა დათმო ბექა ლომთაძემ - ამერიკელ იადინ სელსორ ელერმანთან.

კენჭაძემ ფინალამდე სამი შეხვედრა მოიგო და სამივე - ყაზახებთან: დანიარ კაისანოვს 12:5 სძლია, ბოლატ საკაიევს - 10:3, ნურლან ბეკჟანოვს კი - 5:0 მოუგო. ფინალში ის ჩინელ ვეი ვუს შეხვდება.

ოდიკაძე წრიულად მიმდინარე ტურნირის პირველ წრეში ყაზახ ნამედ იბრაგიმოვთან 2:2-ზე დამარცხდა, თუმცა ფინალში მაინც გავიდა. მეორე რაუნდში ამერიკელი კევინ გადსონი მისთვის ცვეულ სტილში წმინდად გაანადგურა - ჩოქბჯენში ჩაიყვანა და იქ წაღმა-უკუღმა ატრიალა, ვიდრე ანგარიში 11:0 არ გახადა, მერე კი იტალიელი ხესუს რუანოც იმავე სტილში და იმავე ანგარიშით დაამარცხა.

ნახევარფინალში ჩვენებურს უნგრეთში გადაბარგებული უკრაინელი ევროპის ჩემპიონი პავლო ოლეინიკი არ გამოუცხადდა, ფინალში კი ისევ ყაზახ იბრაგიმოვს შეხვდება და რევანშის შანსიც აქვს.
დღეს პოლონეთში დანარჩენი წონების წარმომადგენლებიც იასპარეზებენ.

1906
მკითხველის კომენტარები / 0 /
მსგავსი ამბები
რუბრიკის სხვა სიახლეები
;