სამოასთან დებიუტანტები გამოჩნდებიან

საქართველოს ნაკრები ნოემბრის ტესტების მორიგი მატჩისთვის "შევარდენის სანაკრებო ბაზაზე" ემზადება. "ბორჯღალოსნები" შაბათს, 17 ნოემბერს "ავჭალის სარაგბო სტადიონზე" სამოას ნაკრებს დაუპირისპირდებიან.

საქართველოს ნაკრებმა გუშინ ღია ვარჯიში გამართა. ვარჯიშის მიმდინარეობიდან ჩვენი გუნდის ძირითადის შემადგენლობა გამოიკვეთა. თუმცა, წინასწარ რამის თქმა ძნელია.

გამორიცხული არ არის, მატჩამდე დარჩენილ დროში რამე შეიცვალოს. ერთის თქმა კი შეიძლება - სამოასთან მატჩში, დიდი ალბათობით, დებიუტი ექნება ახალგაზრდა მგეზავ თედო აბჟანდაძეს. ვეტერანი მგეზავი ლაშა ხმალაძე კი ფულბეკის პოზიციაზე დადგება ტრავმირებული სოსო მათიაშვილის ნაცვლად.
თედო აბჟანდაძე, საქართველოს ნაკრების მგეზავი:

"სამოა ფიზიკურად და ტაქტიკურად ძლიერი გუნდია, რომელსაც ჩვენი პლუსები უნდა დავუპირისპიროთ. გვაკლია რამდენიმე წამყვანი მოთამაშე. დებიუტანტები, ასევე შედარებით ახალბედა მოთამაშეები ამ დანაკლისის შევსებას ვეცდებით. ყველაფერს ვიღონებ, რომ ეროვნულ ნაკრებში რაც შეიძლება კარგი დებიუტი მქონდეს. ძალიან დიდი მადლობა გულშემატკივარს, რომელიც გვერდში გვედგა. მაქსიმუმს გავიღებთ, რათა ისინი სამოასთან გამარჯვებით გავახაროთ".
ლევან მაისაშვილი, საქართველოს ნაკრების მთავარი მწვრთნელის ასისტენტი:

"ერთია, რას თამაშობს იტალია და სამოა, მაგრამ ჩვენ ჩვენი სათამაშო სტილი გვაქვს. დიდი ქირურგიული ჩარევები არ იქნება და მხოლოდ მცირე ტაქტიკური ცვლილებებით შემოვიფარგლებით. შევეცდებით, დავხვეწოთ დეტალები და ის, რაც არ გამოგვივიდა იტალიასთან, კარგად შევასრულოთ სამოასთან. სამწუხაროდ, კვლავ გვაკლია ტრავმირებული მოთამაშეები, რომლებსაც სოსო მათიაშვილი დაემატა".

ლაშა ლომიძე, საქართველოს ნაკრების მეორეხაზელი:
"იტალიასთან დასანანი თამაში წავაგეთ. ძალიან ბევრი შეცდომა დავუშვით. დასკვნით 20 წუთში ორი ლელოს გატანა შეგვეძლო, რაც, სამწუხაროდ, ვერ მოვახერხეთ. ეს გამოუცდელობის შედეგი იყო. წინ ძალიან მაგარი თამაში გველოდება. ამიტომ უნდა დავივიწყოთ იტალიასთან მატჩი და გამოვასწოროთ ყველა შეცდომა. სამოა ძალიან კარგი გუნდია, ინდივიდუალურად ბრწყინვალე შემსრულებლები ჰყავს და ამას ჩვენი სათამაშო სისტემა და ერთსულოვნება უნდა დავუპირისპიროთ".

დავით ქუბრიაშვილი, შერკინების პირველხაზელი:
"შერკინება, სტატიკური მდგომარეობები ჩვენი პლუსია და ვეცდებით ამ კომპონენტში უპირატესობა მოვიპოვოთ. სამოას დიდი, ინდივიდუალურად ძლიერი ბიჭები ჰყავს და ამიტომ კვირის განმავლობაში სპეციფიკური ვარჯიშები გვაქვს. მოხარული ვარ, რომ ორწლიანი პაუზის შემდეგ ჯანმრთელობამ ნაკრებში დაბრუნების შესაძლებლობა მომცა. სამწუხაროდ, იტალიასთან თამაში ჩვენ რომ გვინდოდა, ისე ვერ წავიდა და შედეგიც ისეთი ვერ დადგა, როგორიც გვსურდა".
თამაში შაბათს 18 საათზე დაიწყება.

ყოველდღიური სპორტული გაზეთი "ლელო"
901
მკითხველის კომენტარები / 2 /
aburjga
0
სანამ შტანგაზე შეჯიბრებები აღარ არის ტალახაძე რომ ჩავრთოთ რაგბის თამაშში კარგი არ იქნება?!
მთ
0
მოგება-წაგებას თავი გავანებოთ,თამაშის ხარისხი მოგწონთ ვინმეს?
მსგავსი ამბები
რუბრიკის სხვა სიახლეები
;