სამტრედიამ და დილამ 2017 წლის ეროვნული ლიგა ყაიმით დაასრულეს

25 ნოემბერს, საქართველოს ეროვნული საფეხბურთო ჩემპიონატის ბოლო, 36-ე ტურის სასტარტო შეხვედრა გაიმართა, რომელშიც "სამტრედიამ" გორის "დილას" უმასპინძლა და ფრეს დასჯერდა - 2:2.

ეროსი მანჯგალაძის სახელობის სტადიონზე ანგარიში სტუმრებმა გახსნეს. 31-ე წუთზე, გიორგი ფანცულაიას წაქცევისთვის დანიშნული 11-მეტრიანი ირაკლი ძარიამ უნაკლოდ შეასრულა - 0:1.

მასპინძლებმა ანგარიშის გათანაბრება 50-ე წუთზე, კუთხურის გათამაშების შემდეგ, მაიკლ ოლაიტანის გოლით შეძლეს. გორელთა კარში მეორე გოლიც სტანდარტს მოჰყვა - 76-ე წუთზე გათამაშებული კუთხურის შემდეგ უკვე ანტე გიიმ შეძლო გატანა.

საბოლოო ანგარიში მსაჯის მიერ კომპენსირებულ მესამე წუთზე გიორგი ფანცულაიამ დააფიქსირა.

"სამტრედიამ" 2017 წლის ეროვნული ლიგის გათამაშება 68 ქულით, მესამე ადგილზე დაასრულა და გაისად ევროტურნირზე იასპარეზებს. გორის "დილამ" 41 ქულით საბოლოოდ მე-7 ადგილი დაიკავა.

ბოლო ტურის კიდევ ოთხი შეხვედრა კვირას, 26 ნოემბერს გაიმართება, ჩემპიონის ვინაობა კი თბილისის "დინამოსა" და ქუთაისის "ტორპედოს" დაპირისპირებაში გაირკვევა.

- ეროვნული ლიგა. ბოლო ტურის წინათქმა: ოქროს კლასიკო!

1575
მკითხველის კომენტარები / 0 /
მსგავსი ამბები
რუბრიკის სხვა სიახლეები
;