'სამტრედია' ახალ მწვრთნელს ეძებს, - ისევ ცეცაძე?

უკვე ვწერდით, რომ ეროვნული ლიგის XVII ტურის შემდეგ "სამტრედია" მთავარი მწვრთნელის გარეშე დარჩა. გუნდი დატოვა ბადრი კვარაცხელიამ, რომელიც იქ მე-6 ტურის შემდეგ მუშაობდა. კვარაცხელია "სამტრედიას" საკუთარი ინიციატივით დაემშვიდობა...

10 ივლისი კი, როცა "სამტრედია" ევროპალიგაზე ყაზახურ "ტობოლს" უნდა შეხვდეს, ყურის ძირშია...

უღირს თუ არა ცეცაძეს...

იმერული კლუბის ხელმძღვანელობას მიმდინარე სეზონში მეორედ მოუწევს ახალი მთავარ მწვრთნელის მოძებნა. იყო სხვადასხვა სპეციალისტთან მოლაპარაკების მცდელობა. გუშინ კი "ლელომ" მოულოდნელი ამბავი შეიტყო - ამტკიცებენ, რომ "სამტრედია", შესაძლოა, კვლავ გია ცეცაძემ ჩაიბაროს.

სამწუხაროდ, ბოლო დროს კლუბის ხელმძღვანელობასთან კომუნიკაცია გართულებულია. სატელეფონო ზარებს არც თავად ცეცაძე პასუხობდა და ამდენად, ინფორმაციის დაზუსტება და გადამოწმება შეუძლებელი აღმოჩნდა.

მაგრამ "ლელო" ამ ინფორმაციას უსაფუძვლოდ არ აქვეყნებს - მოლაპარაკება მიმდინარეობდა, მაგრამ შედეგები უცნობია. ალბათ, ერთ-ერთი მთავარი არჩევანი ცეცაძისთვის ეს არის - უღირს თუ არა საქართველოს ახალგაზრდული ნაკრებიდან წამოსვლა, რომელიც "სამტრედიადან" წასვლის შემდეგ სამ თვეში ჩააბარეს.

წარმატებული პერიოდი

სამტრედიაში საფეხბურთო გუნდი 1936 წელს ჩამოყალიბდა. დამოუკიდებლობის პერიოდში კლუბი სხვადასხვა სახელით ("სამტრედია", "სანავარდო", "იბერია") არსებობდა და ეროვნულ ჩემპიონატში მეტ-ნაკლები წარმატებით ასპარეზობდა. პირველად მან ქართული საფეხბურთო საზოგადოება 1994-1996 წლებში აალაპარაკა, როცა ქვეყნის ჩემპიონატში მეორე ადგილი დაიკავა და უეფას თასზე იასპარეზა.

"სამტრედიამ" არსებობის ისტორიაში საუკეთესო შედეგებსა და ტიტულებს სწორედ ცეცაძის მწვრთნელობისას მიაღწია: ის გუნდში 2015 წლის 1 ივლისიდან 2017 წლის 27 სექტემბრამდე მუშაობდა და ეს ის პერიოდია, როცა "სამტრედია" საქართველოს ჩემპიონი (2016) და სუპერთასის (2017) მფლობელი გახდა. ამას გარდა, 2015/16 წლების სეზონში ვიცე-ჩემპიონადაც მოგვევლინა.

დრომ და წლევანდელმა ფიასკომ გამოაჩინა, რომ ცეცაძემ "სამტრედიაში" დაუფასებელ შედეგებს მიაღწია - საუკეთესო მწვრთნელად დასახელებულმა 43 წლის სპეციალისტმა გუნდს 88 ოფიციალურ მატჩში უხელმძღვანელა, საიდანაც 53 მოიგო, 15 ფრედ დაასრულა და 20 წააგო. მარტო წელს კი "სამტრედიამ" 17 მატჩიდან 10 დათმო.

ახალგაზრდული ნაკრები

ცეცაძე "სამტრედიას" 2017 წლის სექტემბერში დაშორდა. გორში "დილასთან" წაგების (1:2) შემდეგ ის საკუთარი ინიციატივით წავიდა გუნდიდან, რომელიც ჩემპიონატში მესამე ადგილზე იმყოფებოდა და ლიდერ თბილისის "დინამოს" 7 ქულით ჩამორჩებოდა.

ცეცაძე "სამტრედიამდე" "საბურთალოს" დუბლშემადგენლობაში, გორის "დილაში", თბილისის "ლოკომოტივში", საქართველოს 19-წლამდელთა ნაკრებში (რომელმაც 2013 წელს ევროპის ჩემპიონატის ფინალურ ეტაპზე ითამაშა) და ქვეყნის ეროვნულ გუნდში კახა ცხადაძის ასისტენტად მუშაობდა.

2017 წლის 14 დეკემბერს ცეცაძე ფეხბურთის ფედერაციამ საქართველოს ახალგაზრდული ნაკრების მთავარ მწვრთნელად დანიშნა.

სამტრედიაში ძეგლი უნდა დაუდგათ!..

შემთხვევითი არ იყო, რომ გია ცეცაძის წასვლა სამტრედიელმა გულშემატკივრებმა ძალიან განიცადეს და მაშინ საგანგებო განცხადებაც გაავრცელეს.

"გია ცეცაძე კი არ უნდა ლანძღოთ, სამტრედიაში ძეგლი უნდა დაუდგათ! სად იყო "სამტრედია"? უმეტესად, პირველ ლიგაში და როცა უმაღლესში გადმოვედით, ვარსკვლავები მაშინაც არ მოგვიწყვეტია. მოვიდა ახალი ხელმძღვანელობა, შეიკრა ახალი გუნდი და წარმატებას მაშინაც ვერ მიაღწია. მაგრამ მოვიდა გია ცეცაძე და მოიყვანა ბიჭები, რომლებიც სხვა ქართულ გუნდებში ჩამოწერეს... და ამ კაცმა გუნდი შეკრა"...

მართლია - სწორედაც ყველასგან დაწუნებული თუ ჩრდილში მოქცეული ფეხბურთელებისგან შეკრიბა ისეთი "სამტრედია", რომელმაც გულშემატკივარს ლამაზი ფეხბურთი აჩვენა და გარდამავალი ჩემპიონატის ოქროს მედლები მოიპოვა.

ყოველდღიური სპორტული გაზეთი "ლელო"
889
მკითხველის კომენტარები / 0 /
მსგავსი ამბები
რუბრიკის სხვა სიახლეები
;