სამტრედია კარგი ტრანსფერის მოლოდინში: ძველი ნაცნობი რიკარდინიო, რომელიც ტვენტეში თამაშობდა

უკვე ვწერდით, რომ თურქულ შეკრებაზე "სამტრედიას" შემადგენლობაში 3 ახალი მოთამაშე გამოჩნდა - იაპონელი მარჯვენა ფლანგის შემტევი, 27 წლის კენ კამაცუ, რომელიც ბოლოს ამერიკულ "ნიუ მეხიკოში" თამაშობდა, ბრაზლიელი მარცხენა მცველი რიკარდო ფერეირა და სილვა, ასევე, გამბიელი ცენტრალური მცველი კამბა სამბუ.

ამ სამეულიდან ქართველი გულშემატკივარი ყველაზე უკეთ რიკარდო ფერეირა და სილვას იცნობს, მაგრამ იცნობს როგორც რიკარდინიოს - ფეხბურთელს, რომელიც ქართულ გუნდებს "გაბალას" ფორმით ევროსარბიელზე ორჯერ შეხვდა და ორივეჯერ გამარჯვებული მისი გუნდი დარჩა: 2014 წელს თბილისის "დინამოს" სძლიეს (1:2, 2:0), ხოლო 2016 წელს - "სამტრედიას" (5:1, 1:2).

"გაბალასთან" ერთად რიკარდინიომ ორჯერ ითამაშა ევროპალიგის ჯგუფურ ეტაპზე. რიკარდინიო რომან გრიგორჩუკის გუნდში ერთ-ერთი საუკეთესო მოთამაშე იყო. ვისაც კარგი მეხსიერება აქვს, დაგვეთანხმება, რომ ევროპალიგაზე გასული ამ აზერბაიჯანული გუნდის ერთ-ერთი გამორჩეული სახე სწორედ რიკარდინიო გახლდათ - აქტიური და ძალიან ტექნიკური მცველი, რომელიც შეტევებში მწვავედ ერთვებოდა და ფლანგსაც ძალიან კარგად ითვისებდა.

რიკარდინო
სრული სახელი: რიკარდო ფერეირა და სილვა კუბიცკი
დაიბადა 1984 წლის 9 სექტემბერს კურიტიბაში (ბრაზილია)
სიმაღლე: 168 სმ
სათამაშო პოზიცია: მარცხენა მცველი (ნახევარმცველი)

ახალგაზრდული კარიერა
2003 კურიტიბა
პროფესიული კარიერა
2003-09 კურიტიბა 157 (13)
2007 ატლ. მინეირო (იჯ) 5 (0)
2009-14 მალმიო 159 (3)
2015-17 გაბალა 36 (1)
2017-18 ოქსფორდი 36 (3)
2018-19 ტვენტე 34 (1)

რიკარდო ფერეირა და სილვა კუბიცკი, ან უბრალოდ რიკარდინო კურიტიბაში დაბადებული 35 წლის ფეხბურთელია. კარიერაც იქვე, მშობლიური ქალაქისა და იმავე სახელწოდების კლუბ "კურიტიბაში" დაიწყო, სადაც ახალგაზრდულიდან პირველ გუნდში გადაიყვანეს და იქ ძირითად შემადგენლობაშიც დამკვიდრდა. "კურიტიბაში" ის ორჯერ გახდა პარანაენსეს შტატის ჩემპიონი.

 2009 წელს შვედეთში, კერძოდ "მალმიოში" გადავიდა. 2011 წლის სეზონში იყო ამ კლუბის ერთადერთი მოთამაშე, რომელმაც ლიგის ყველა - 30 მატჩი ჩაატარა. მან ასევე ითამაშა 2011/12 წლების სეზონის ჩემპიონთა ლიგის საკვალიფიკაციო ეტაპზე და იმავე სეზონში ევროპალიგის ჯგუფურ ეტაპზე. 2014 წლის 13 დეკემბერს რიკარდინიომ გამოაცხადა, რომ კლუბთან ხელშეკრულებას აღარ განაახლებდა და აზერბაიჯანში, "გაბალაში" გადავიდა.

2017 წლის 3 აგვისტოს რიკარდინო ინგლისში გადავიდა და ერთწლიანი კონტრაქტით იმ დროისთვის ინგლისის რანგით მესამე ლიგის კლუბ "ოქსფორდ იუნაიტედში" ჩაირიცხა და სეზონის ბოლოს ტურნირის საუკეთესო მოთამაშის ჯილდოც მიიღო პროფესიონალ ფეხბურთელთა ასოციაციისგან.

სეზონის ბოლოს რიკარდინიომ "ოქსფორდთან" კონტრაქტის გახანგრძლივებაზე უარი თქვა და ხელშეკრულება გააფორმა ჰოლანდიურ "ტვენტესთან", სადაც 2018 წლის 27 ივლისს თავისუფალი აგენტის სტატუსით ჩაირიცხა. იმ სეზონში მან ყველა - 34 მატჩში მიიღო მონაწილეობა, თუმცა 2019 წლის ივლისის შემდეგ, მას მერე, რაც "ტვენტე" დატოვა, აქამდე უგუნდოდ იყო.

რიკარდინიო არის როგორც ბრაზილიის, ასევე შვედეთის მოქალაქე (ამის დამადასტურებელი პასპორტი მას 2014 წლის ოქტომბერში გადასცეს), რადგან ამ ქვეყანაში ხუთი წლის განმავლობაში ცხოვრობდა და თამაშობდა.

"ლელოსთან" საუბრისას "სამტრედიას" მთავარმა მწვრთნელმა კახა კაჭარავამ განაცხადა, რომ რიკარდიონიოს საკითხი ჯერ არ გადაწყვეტილი არ არის, ბრაზილიელთან მოლაპარაკება გრძელდება და "სამტრედიაში" მისი დარჩენის იმედი აქვს.

გერმანული სამენეჯრო საგენტო "ტრანსფერმარკტის" შეფასებით, რიკარდინიოს პირობითი ღირებულება 125 ათასი ევროა. საუკეთესო წლებში (2010-2011) კი ის 2 მილიონ ევროდაც ფასობდა.

1310
მკითხველის კომენტარები / 0 /
მსგავსი ამბები
რუბრიკის სხვა სიახლეები
;