სამტრედია კასრაძემ და რაჟამაშვილმაც დატოვეს, მანჯგალაძე აზერბაიჯანში, ყაზახეთში თუ...

ცნობილია, რომ "სამტრედია" რამდენიმე მოთამაშემ დატოვა. გიორგი დათუნაიშვილის ამბავი ცნობილია - იმერული კლუბის კაპიტანი კარიერას ბოლნისის "სიონში" გააგრძელებს.

გიორგი მჭედლიშვილმა სიახლე "ლელოსთან" ინტერვიუში გაამხილა - ეროვნული ლიგის საუკეთესო მარჯვენა მცველი მალე კონტრაქტს ხორვატიის პირველი ლიგის ლიდერ "გორიცასთან" გააფორმებს.

მანამდე "სამტრედია" ლაშა კასრაძემაც დატოვა. 28 წლის ფეხბურთელი გუნდში გია ცეცაძემ 2017 წლის ზამთარში მიიწვია და მთელი სეზონი ჩაატარა - მას მცველის პოზიციაზეც უწევდა თამაში და საყრდენ ნახევარმცველადაც.

ჩემპიონატის დასრულების შემდეგ კასრაძეს კონტრაქტის გახანგრძლივება აღარ შესთავაზეს და ახალი კლუბის მოძებნა მოუწევს - ინფორმაცია თავად ფეხბურთელმა დაგვიდასტურა.

"დიახ, "სამტრედია" დავტოვე. კონტრაქტი დამიმთავრდა და წამოვედი. ჯერჯერობით უცნობია, კარიერას სად გავაგრძელებ" - ამბობს კასრაძე.

გუშინ შევიტყვეთ, რომ საქართველოს ყოფილი ჩემპიონი ერთ-ერთმა ლიდერმა დატოვა - დავით რაჟამაშვილი კარიერას მშობლიური ქალაქის გუნდში, გორის "დილაში" გააგრძელებს. ინფორმაცია ფეხბურთელმა თავად დაგვიდასტურა:

"ფაქტია, რომ "სამტრედიადან" წამოვედი. გუნდმა კონტრაქტის გახანგრძლივება შემომთავაზა. რატომღაც, მეგონა, რომ დავრჩებოდი და მოვილაპარაკებდით. მაგრამ რაც მოხდა, იმას ვეღარ შევცვლით - პირობებზე ვერ შევთანხმდით და წამოვედი. სწორედ მაშინ გამოჩნდა გორის "დილა", დავილაპარაკეთ, შევთანხმდით და გუნდთან კონტრაქტი ახლახან გავაფორმე".

რაჟამაშვილი არ მალავს, რომ "დილას" გარდა, სხვა შემოთავაზებებიც ჰქონდა: "სეზონის დასრულებისთანავე ირანში გადასვლა შემომთავაზეს. მაგრამ გაურკვევლობას "დილასთან" დალაპარაკება ვამჯობინე და ირანის ვარიანტი გამოირიცხა".

ახალ გუნდში, შეიძლება, ვერ ვიხილოთ გია მანჯგალაძეც. თუ რატომ აპირებს კლუბის გამოცვლას 25 წლის საყრდენი ნახევარმცველი, ამაზე თავად ამბობს: "კლუბმა ახალი კონტრაქტის გაფორმების სურვილი გამოთქვა და ჯერ ვერ ვიტყვი, რომ "სამტრედია" დავტოვე.

მაგრამ აზერბაიჯანისა და ყაზახეთის კლუბებიდან შემოთავაზებები მივიღე და მათგან პასუხებს ველოდები. თუ სად ვითამაშებ, უახლოეს პერიოდში გაირკვევა".

როგორც შევიტყვეთ, გუნდი თავდამსხმელმა ნიკა საბანაძემაც დატოვა. ამგვარად, დღევანდელი მონაცემებით, "სამტრედიაში" აღარ ირიცხებიან მცველები ნიკა სანდოხაძე, ჯემალ გოგიაშვილი, ლაშა კასრაძე, გიორგი მჭედლიშვილი და ბაკარ ბალდე.

ნახევარმცველებიდან გუნდს დაემშვიდობნენ კაპიტანი გიორგი დათუნაიშვილი, რაჟამაშვილი და თეიმურაზ მარკოზაშვილი, თავდამსხმელებიდან დავით ჯიქია და საბანაძე. ჯერაც უცნობია გურამ სამუშიას ამბავი.

შესაძლოა, ახალი გუნდში ვიხილოთ მანჯგალაძეც. კონტრაქტი გაბონის ნაკრების მცველ ანრი ნდონგსაც დაუმთავრდა და უცნობია, დათანხმდება თუ არა ხელშეკრულების გახანგრძლივებას.

დღეისთვის ცნობილია, რომ შარშანდელი ბირთვიდან "სამტრედიაში" დარჩნენ ომარ მიგინეიშვილი, მაიკლ ოლაიტანი და ინტერს გიი, ასევე სამტრედიელი ახალგაზრდები - ილია და ოთარ სტურუები, დავით მანჯგალაძე, გიორგი ახალაძე, ვალერი ოლხოვი, გიგლა ბურკაძე, აკაკი ნინუა და ზაურ ხაბეიშვილი.

ფაქტია, რომ შარშანდელი ბირთვი აღარ არსებობს. ასე რომ, იმერული კლუბის მთავარ მწვრთნელ უჩა სოსიაშვილს ახალი გუნდის "შენება" მოუწევს.

ახალწვეული კი ჯერ მხოლოდ ორია: ლატვიურ "ლიეპაიას" ყოფილ თავდამსხმელ გიორგი ერისთავს (რომელიც გუნდში 2014 წელს თამაშობდა) "სამტრედია" პირობებზე უკვე შეუთანხმდა.

მეორე ნახევარმცველი შოთა კერძევაძეა, რომელიც 6 წელი "სამტრედიაში" თამაშობდა, შარშან კი იჯარით "კოლხეთში" გადავიდა. იმერულ კლუბში ახალი ლეგიონერების დამატებას აპირებენ - როგორც გვითხრეს, ისინი ოლაიტანსა და გიიზე ნაკლები ფეხბურთელები არ არიან.

იმედია, ასეც მოხდება - წლეულს "სამტრედია" ევროპის ლიგაზე ითამაშებს და არა მხოლოდ ქალაქი, ქვეყანაც უნდა წარმოადგინოს. ამის გამო გუნდის საკადრო პოლიტიკა ყველას ყურადღებას იქცევს.

ყოველდღიური სპორტული გაზეთი "ლელო"
1676
მკითხველის კომენტარები / 0 /
მსგავსი ამბები
რუბრიკის სხვა სიახლეები
;