'სამტრედია' კომლექტდება - სამნი ქუთაისიდან და პლუს გოგიაშვილი

ეროვნულ საფეხბურთო ლიგაში ჩემპიონატის პირველი ნახევარი დასრულდა, სატრანსფერო "ფანჯარა" გაიხსნა და გუნდებმა სასურველი მოთამაშეები დაიმატეს...

"სამტრედიას" მძიმე დროება უდგას. იმერული გუნდი ეროვნულ ლიგაში ადგილის შენარჩუნებისთვის იბრძვის. გუნდს სასწრაფოდ საკადრო პრობლემების მოგვარება სჭირდება, რადგან ევროპალიგის საკვალიფიკაციო ეტაპზე უნდა ითამაშოს, სადაც ნიკა კვეკვესკირისა და ჯაბა კანკავას "ტობოლს" (ყაზახეთი) შეხვდება.

მაგრამ ამ სისწრაფეში გუნდში ფეხბურთელების აყვანის პროცესს უფრო "დაკომპლექტება" ჰქვია და შეძლებისდაგვარად ძლიერდებიან. "ლელოსთვის" ცნობილი გახდა იმ მოთამაშეთა ვინაობა, რომლებიც "სამტრედიაში" ითამაშებენ.

კლუბთან კონტრაქტები გააფორმეს 24 წლის მცველმა გიორგი ჯგერენაიამ ("ნორჩი დინამო"), 24 წლის მცველმა დმიტრო ულიანოვმა (უკრაინული კრამატოვსკის "ავანგარდი") და 26 წლის თავდამსხმელმა ლაშა კუჭუხიძემ (ქუთაისის "ტორპედო").

ევროპალიგამდე "სამტრედიას" კიდევ ერთი ფეხბურთელი, "რუსთავის" თავდამსხმელი თამაზ მაქაცარია შეუერთდა. ოღონდ, მისი მიწვევა აწ უკვე ყოფილი მთავარი მწვრთნელის, ბადრი კვარაცხელიას იდეა იყო და უცნობია, ახალი ხელმძღვანელობა 22 წლის თავდამსხმელთან დაკავშირებით რა გადაწყვეტილებას მიიღებს.

შეგახსენებთ, რომ "სამტრედიას" დროებით გია ცეცაძე გაწვრთნის. ის ახალი ფეხბურთელების მიწვევას უკვე შეუდგა. "ლელოს" ცნობით, დიდი ალბათობით, ცეცაძის გუნდში ვიხილავთ ქუთაისის "ტორპედოს" სამ ყოფილ მოთამაშეს - მცველ გიორგი გურულს, რომელსაც მცირე ხნის წინ გორის "დილაში" იწვევდნენ, და შემტევ ნახევარმცველ ჯაბა ლიპარტიას.

კიდევ ერთ ტორპედოელ ოლეგ მამასახლისზე უკვე ვწერდით. გადაწყვეტილია, რომ ის "სამტრედიას" ევროპალიგაზე დაეხმარება. ცენტრალური ნახევარმცველი "ტორპედოში" 2012 წელს ჩაირიცხა და მისი მაისურით 115 მატჩი გამართა. მამასახლისი უთამაშებლობას არც მიმდინარე სეზონში უჩიოდა - 14 მატჩი, მათ შორის, 10 - ძირითადში. 2017 წელს ვლადიმირ ვაისმა გურული საქართველოს ნაკრების ორ ამხანაგურ მატჩში ათამაშა. ნაკრებში ასევე ორჯერ უთამაშია ლიპარტიას.

ცნობილია, რომ მანამდე ქუთაისიდან დაიმატეს თავდამსხმელი კუჭუხიძე, რომელმაც "სამტრედიაში" უკვე ითამაშა. ასე რომ, ქუთაისის "ტორპედოდან" ცეცაძემ სულ 4 მოთამაშე დაიმატა. მოლაპარაკება მიმდინარეობდა მერაბ გიგაურთანაც, მაგრამ მისი შედეგები ჯერჯერობით უცნობია.

ცეცაძის გუნდის კიდევ ერთი ახალწვეული ჯემალ გოგიაშვილი იქნება, რომელიც "სამტრედიაში" 2015-17 წლებში თამაშობდა და ცეცაძის წასვლის შემდეგ გაუშვეს. გოგიაშვილი ბოლოს გორის "დილაში" ჩაირიცხა, მაგრამ სულ 6-ჯერ ითამაშა და წამოსვლა გადაწყვიტა.

ყოველდღიური სპორტული გაზეთი "ლელო"
1558
მკითხველის კომენტარები / 0 /
მსგავსი ამბები
რუბრიკის სხვა სიახლეები
;