სამტრედიიდან წამოსული დენის დობროვოლსკი კარიერის დასრულებაზე არ ფიქრობს

  • დენის დობროვოლსკის ჩიხურაში სოსო ფრუიძესთან წლების განმავლობაში უთამაშია

დენის დობროვოლსკიმ "სამტრედია" დატოვა და ახალ კლუბს ეძებს. 34 წლის ფეხბურთელი კარიერის დასრულებაზე არც ფიქრობს და იმედი აქვს, რომ სასურველ გუნდს მალე მოძებნის.

"სეზონი რომ დაიწყო, "სამტრედიაში" ხშირად ვთამაშობდი, სეზონის მეორე ნახევარში კი მოედანზე სულ უფრო იშვიათად ვჩნდებოდი. ახალი სეზონისთვის გუნდმა მზადება დაიწყო და ხელშეკრულების გახანგრძლივებაც არ შემოუთავაზებიათ. ყველაფერი გასაგები გახდა, წამოვედი და ახალი გუნდის ძებნა დავიწყე", - ამბობს დობდოლვოლსკი.

გამოცდილი ფეხბურთელის თქმით, მას კლუბები უკვე დაუკავშირდნენ: "რამდენიმე გუნდი დამიკავშირდა და წინადადებებს კიდევ ველოდები. ჯერ კონკრეტული არაფერია, მაგრამ არა მგონია უგუნდოდ დავრჩე. იმედია, საკითხი მალე გადაწყდება. მანამდე კი ინდივიდუალურად ვემზადები. ამდენი ხანია ფეხბურთს ვთამაშობ და ამის გარეშე ცხოვრება ვერ წარმომიდგენია. ჯანმრთელობა ჯერ ხელს მიწყობს და სულაც არ მაქვს განწყობა, რომ კარიერა დავასრულო. მიყვარს ფეხბურთი. თამაში კი არა, ვარჯიშიც მსიამოვნებს და რატომ უნდა შევეშვა?!".

14-წლიან კარიერაში დობროვოლსკის სულ 4 კლუბის ფორმა მოურგია - "ამერის", რუსთავის "ოლიმპის" (შემდეგში - "მეტალურგის"), საჩხერის "ჩიხურასი" და ბოლოს "სამტრედიასი". ის საკმაოდ ტიტულოვანი ფეხბურთელია: რუსთავის "მეტალურგში"საქართველოს ჩემპიონი (2010) და ვიცე-ჩემპიონი (2012) გახდა, არის საქართველოს სუპერთასის გამარჯვებულიც (2011).

1284
მკითხველის კომენტარები / 0 /
მსგავსი ამბები
რუბრიკის სხვა სიახლეები
;