სანაკრებო პაუზის ჟამს: ორი სპარინგი და ორი  საინტერესო ამბავი 

სანაკრებო პაუზა ლამის ყველა ქართულმა კლუბმა ამხანაგური მატჩებისთვის გამოიყენა. ამავე დროს, ორ ტრადიციულ ქართულ გუნდში - ფოთის „კოლხეთი 1913“-სა და ქუთაისის „ტორპედოში“ არსებული ვითარების გამოსწორებისა და გარკვევის მიზნით საინტერესო ამბები მოხდა...

გუნდში არსებულ არასახარბიელო ვითარებასთან დაკავშირებით ფოთის „კოლხეთი 1913-ის“ ხელმძღვანელებს კლუბის ქომაგები შეხვდნენ. 

„კოლხეთის“ განცხადებაში მითითებული იყო, რომ ფოთელებს ცენტრალურ სტადიონზე გასამართ შეხვედრაზე მისვლას სთხოვდნენ, რათა მათ საკუთარი მოსაზრება დაეფიქსირებინათ „კოლხეთი 1913-ში“ არსებულ ვითარებასთან დაკავშირებით. 

სამწუხაროდ, ამ ტრადიციული კლუბის პრომლემებით ცოტა ვინმე დაინტერესდა - ისინი სულ ერთმა პატარა ოთახმა დაიტია. „კოლხეთის“ დირექტორი ზაზა ინაშვილი გაოცებული იყო, რომ ტრადიციული ქართული კლუბის ბედით უფრო მეტი ადამიანი არ დაინტერესდა.

შეხვედრაზე გუნდში არსებულ არასახარბიელო მდგომარეობაზე და ხმაურის და ურთიერთპრეტენზიის ფონზე მიმდინარეობდა. კლუბის დირექტორის თქმით, „კოლხეთი 1913-დან“ 5 ფეხბურთელი (გიორგი ლემონჯავა, თენგო ჩიკვილაძე, ჭიაბერ ჭეჭელაშვილი, დიმიტრი მარგველაშვილი, გიორგი ჭურღულაშვილი) გათავისუფლდა და გუნდი მთლიანად ახალგაზრდების იმედად დარჩა. ამასთან, „კოლხეთს“ რამდენიმე ახალი ფეხბურთელიც დაემატა. 

განახლებული შემადგენლობით გუნდმა ამხანაგური მატჩი გამართა. სანაკრებო მატჩებით გამოწვეულ პაუზაზე ურეკში ეროვნული ლიგა 2-ის ორმა ბინადარმა ამხანაგური შეხვედრა გამართა - ფოთის „კოლხეთი“ ქობულეთის „შუქურას“ დაუპირისპირდა და მატჩი 1:1 დაასრულა. 32-ე წუთზე ქობულეთელები ლუკა ნემსაძის გოლით დაწინაურდნენ. თუმცა ფოთელებმა მალევე შეძლეს ანგარიშის გათანაბრება: მე-40 წუთზე ლუკა მახარაძემ საპასუხო გოლი გაიტანა. მეტოქეებმა მეორე ტაიმში გოლის გატანა ვეღარ მოახერხეს და ეს სპარინგი 1:1 დასრულდა.

რაც შეეხება მიმდინარე ჩემპიონატს, 24 ტურის შემდეგ ფოთის „კოლხეთმა“ 14 ქულა დააგროვა და 10-გუნდიან ლიგაში მე-9 ადგილზეა. თუმცა რამდენიმე ქულა აქვს მეათეადგილოსან ლანჩხუთის „გურიას“, რომელსაც მეტი მოგების ხარჯზე უსწრებს. ეროვნული ლიგის გათამაშება 12 სექტემბერს განახლდება. XXV ტურში კოლხები „პარკი არენაზე“ „ცხინვალს“ უმასპინძლებენ. 

მერია აქტიურ  პროცესებს იწყებს 

მეორე ტრადიციული ქართული კლუბი, სადაც სანაკრებო პაუზისას მნიშვნელოვანი ამბები მოხდა, ქუთაისის „ტორპედოა“ - ბოლო 3 წლის ერთ-ერთი გამორჩეული გუნდი დაიშალა და ბოლოს მეპატრონის გარეშეც დარჩა.

მანამდე კი წმინდა საფეხბურთო ამბებზე ვთქვათ. კახა ჩხეტიანმა სანაკრებო პაუზა ნაყოფიერად გამოიყენა. ქუთაისელები საღორიას სამწვრთნელ ბაზაზე „სამტრედიას“ ამხანაგურ მატჩში დაუპირისპირდნენ და 2:0 დაამარცხეს. „ტორპედო“ პირველ ტაიმში თორნიკე კაპანაძემ დააწინაურა, მეორეში კი „სამტრედიას“ კარი თემურ ჩოგაძემ აიღო და მატჩის საბოლოო ანგარიში დააფიქსირა.

საინტერესოა, რომ „სამტრედიასთან“ ამხანაგურ შეხვედრაში „ტორპედოს“ გრიგოლ დოლიძემ უკაპიტნა. გიორგი გადრანმა კი ტრავმა მოირჩინა, „სამტრედიას“ წინააღმდეგ ამხანაგურ შეხვედრაში შესანიშნავად ითამაშა და ეროვნული ლიგის მატჩებისთვის სრულ მზადყოფნაშია.

ამასობაში, ცნობილი გახდა, რომ „ტორპედოს“ გამო, ქუთაისის მერიასა და კლუბის ყოფილ მეპატრონე ზაალ ჩაჩავას შორის დავა შეთანხმებით ვერ დასრულდა და მერია კლუბის დაბრუნებას სასამართლოს გზით შეეცდება.

სასამართლო დავა კი იმიტომ იწყება, რომ ჩაჩავა დღემდე დავალიანების აღიარებას არ აპირებს. კლუბის სამართლებრივი გზით დაბრუნებაზე ქუთაისის მერმა გიორგი ჭიღვარიამ ილაპარაკა. მისი თქმით, ქალაქის ხელმძღვანელობას „ტორპედოს“ პრობლემების დროული მოგვარება და მერიისთვის საკუთრებაში დაბრუნება სურთ. 

შეგახსენებთ, რომ მეპატრონის წასვლის შემდეგ, „ტორპედოს“ დროებით მმართველად (აღმასრულებელი დირექტორის მოვალეობის შემსრულებლად) თემურ ჩეჩელაშვილი დაინიშნა, რომელიც კლუბში ამ პოსტზე ჩაჩავას მისვლამდეც მუშაობდა.

მაგრამ ამბიციურ კლუბს არაფერში აწყობს ქუთაისის მერიის საკუთრებაში ყოფნა, რადგან ამით „ტორპედოს“ ბიუჯეტი წელიწადში მხოლოდ იმ 800 ათასი ლარით შეივსება, რომელსაც ქართული ფეხბურთის განვითარების ფონდი დაურიცხავს, ეს კი იმას ნიშნავს, რომ „ტორპედო“ რიგითი კლუბის დონეზე დაეცემა... 

ამიტომ, იმედი დავიტოვოთ, რომ სასამართლო პროცესი მერიასა და ყოფილ მეპატრონეს შორის მალე დასრულდება - სხვაგვარად კლუბის გასხვისება შეუძლებელი იქნება.

635
მკითხველის კომენტარები / 0 /
მსგავსი ამბები
რუბრიკის სხვა სიახლეები
;