სანდრო ბაზაძე: ყველაფერს ვიღონებთ, რომ საქართველოს  ნაკრები 2020 წლის ოლიმპიადაზე მოხვდეს

შენობიდან სახეგაბადრული გამოვიდა.

- რა ქენი, ჩააბარე? - ჰკითხა მერაბმა.

- მე კი ჩავაბარე, გამომცდელებმა თუ ჩაიბარეს! - ღიმილით უპასუხა მამას ევროპის ჩემპიონატების სამგზის ბრინჯაოს პრიზიორმა სანდრო ბაზაძემ, რომელმაც ის-ის იყო, პირველი ეროვნული გამოცდა მოილია. 
რაც სკოლა დაამთავრა, ისე წაეწყო, რომ ყოველწლიურად ეროვნულ გამოცდებს მნიშვნელოვანი შეჯიბრებები ემთხვეოდა და ჩასაბარებლად ვერ იცლიდა - ბიჭებს ვერ ღალატობდა. წლეულს, როგორც იქნა, ევროპისა და მსოფლიოს ჩემპიონატებს შორის ოსქროს შუალედი აღმოჩნდა ოცნების ასასრულებლად. 

- თქვენც გამოცდაზე არ მკითხოთ, - მთხოვა სანდრომ, გულშემატკივარ ახლობლებთან სალამ-ქალამს რომ მორჩა.

- მართალია, დაღლილი იქნები, მაგრამ ევროპის ჩემპიონატზე ხომ არ გვესაუბრა?

- სიამოვნებით, კარგი ფიზიკური მომზადება მაქვს გავლილი და დაღლილობას ვერც ვგრძნობ.

- დიუსელდორფით კმაყოფილი ხარ?

- როცა ფარიკაობაში საქართველომ ისეთი კორიფეები აღზარდა, როგორებიც არიან ოლიმპიური და მსოფლიოს ჩემპიონები - ნუგზარ ასათიანი, ვლადიმერ აფციაური, გურამ კოსტავა, იური ოსიპოვი და სხვები, ოქროს მედლის მეტი სხვა ჯილდო როგორ უნდა გაკმაყოფილებდეს, მაგრამ ზედიზედ მესამედ მოპოვებული სამი ბრინჯაოც არ უნდა იყოს ურიგო. მართალია, მესამე ადგილი ცოტა უსიამოვნო ტრადიციად მექცა, თუმცა გერმანული ბრინჯაო ჩემთვის მეტად ღირებულია, რადგან ტოკიოს ოლიმპიადისთვის 30-მდე ქულა შემძინა და რეიტინგი გავიმყარე. არადა, უკეთეს შედეგს ველოდი. 

- ჯგუფში ექვსივე შეხვედრა მოიგე... 

- თანაც საკმაოდ ტიტულოვან მეტოქეებთან. გულდასაწყვეტი ის იყო, რომ პლეი ოფის პირველ წრეში მიშა მარდალეიშვილს შევხვდი, რომელსაც კარგი ტემპი ჰქონდა აკრეფილი და საპრიზო ადგილებზე გასვლაც შეეძლო. შემდეგ უნგრელი ტამაშ დეჩი დავამარცხე, რომელიც გუნდურში მსოფლიოს ჩემპიონატების ერთი ოქროს, 2 ვერცხლისა და 4 ბრინჯაოს, ხოლო ევროპის თითო ოქრო-ვერცხლისა და 3 ბრინჯაოს მფლობელია. მერვედფინალში ვაჯობე მის თანამემამულეს, ასევე, ტიტულოვან ანდრაშ სატმარს - ინდივიდუალურში მსოფლიოს 2017 წლის ჩემპიონს, რომელმაც გუნდურში 2-2 ვერცხლი და ბრინჯაო, ევროპის ჩემპიონატზე კი ერთხელ ოქროს და ორჯერ ბრინჯაოს ჯილდო აქვს დამსახურებული. 

ნახევარფინალში რუს კამილ იბრაგიმოვს შევხვდი - მსოფლიოს ჩემპიონატების 2 ოქროს, ერთი ვერცხლისა და 2 ბრინჯაოს, ევროპის 2-2 ოქროს, ვერცხლისა და ბრინჯაოს მედალოსანს. არაერთხელ მომიგია მისთვის. ჯერ კიდევ შვიდი წლის წინათ 18-წლამდელთა ევროპის ჩემპიონატის ფინალში ვაჯობე. ამჯერად ევროპის ნახევარფინალში, ეტყობა, სათანადოდ ვერ შევაფასე მეტოქე. როცა ანგარიში გახდა 11:11, მოვდუნდი და ეს საკმარისი აღმოჩნდა, ოთხი უპასუხო ჩხვლეტა მოეყენებინა ჩემთვის, რაც მწარე გაკვეთილად გამომადგება. 

- იტალიასთან გუნდურ შეხვედრაზეც მინდა გკითხო...

- ეს სასწაული იყო - რუმინელი არბიტრის მიკერძოებას საზღვარი არ ჰქონდა. იტალიელებს, რომლებიც რეიტინგში მეორე ადგილზე არიან, თავიდან ვუგებდით, მაგრამ მსაჯმა გასაქანი არ მოგვცა. ბოლო ორთაბრძოლაში ლუკა კურატოლისთან ოთხი ჩხვლეტა არ ჩამითვალა - 44:45 წაგვაგებინა. იტალია რომ დაგვემარცხებინა, სოლიდურ ქულებს ავიღებდით და რუმინელებს საგრძნობლად გავუსწრებდით რეიტინგში. არა უშავს, მსოფლიოზე გავუსწორდებით - რუმინელები ერთი ადგილით ჩვენზე წინ არიან და 11 ქულით გვჯობნიან.

- შარშან მსოფლიოს ჩემპიონატზე მოხმალავე ვაჟებმა გუნდური მეოთხე ადგილი დაიკავეთ.

- წლეულს შედეგის გაუმჯობესება გვაქვს დაგეგმილი, სულ მცირე - სამეულში უნდა მოვხვდეთ, საოლიმპიადედ გუნდური სარეიტინგო ქულები გვჭირდება. არბიტრებმა თუ არ გვიმუხთლეს, მიზანს აუცილებლად მივაღწევთ. თანაც მსოფლიოს შემდეგ წინ ოთხი სალიცენზიო ტურნირი გვაქვს. ყველაფერს ვიღონებთ, რომ საქართველოს მოხმალავეთა ნაკრები 2020 წლის ოლიმპიადაზე მოხვდეს. საამისოდ კარგი შანსი გვაქვს - შესანიშნავი გუნდი გვყავს და ხელსაც სათანადოდ გვიწყობენ. რაც შეეხება პირად პირველობას, დღევანდელი პოზიციიდან გამომდინარე, ლიცენზიის მოპოვება არ უნდა გამიჭირდეს. 

- როგორც ვიცი, თქვენი მწვრთნელი ალექსანდრ ტორჩუკი ყაზახეთში გადავიდა სამუშაოდ.

- დიახ, ერთი კვირაა, რაც წავიდა. ახლა უმთავრესად მერაბ ბაზაძე გვავარჯიშებს. 

- მამასთან ურთიერთობა არ გიჭირს?

- მე, ჩემს ძმა ბექას და დეიდაშვილ მიხეილ მარდალეიშვილს პატარაობიდან ის გვავარჯიშებს, ამიტომ ზოგჯერ უსიტყვოდაც გვესმის ერთმანეთის. ვარჯიშებისას მკაცრია, მაგრამ ამას ჩვენდა სასიკეთოდ აკეთებს. ქადილის ძალაც შეგვწევს - მიზანს რეალობად ვაქცევთ. დარწმუნებული ვარ, ქართველი მოხმალავეები ქომაგებს კიდევ არაერთხელ გავახარებთ!

ყოველდღიური სპორტული გაზეთი "ლელო"
375
მკითხველის კომენტარები / 0 /
მსგავსი ამბები
რუბრიკის სხვა სიახლეები
;