ვაგნერ გონსალვეშს თავში მხოლოდ ჩემპიონობა უტრიალებს

"საბურთალომ" მორიგი მატჩი მოიგო - გიორგი ჭიაბრიშვილის შეგირდებმა "რუსთავი" 2:1 დაამარცხეს და ჩემპიონატის დასრულებამდე 5 ტურით ადრე თბილისის "დინამოსთან" უპირატესობა 7 ქულამდე გაზარდეს...

ამ შეხვედრაში "რუსთავის" კარში მეორე გოლი ვაგნერ გონსალვეშმა გაიტანა. ფრანგული პასპორტის მქონე ბრაზილიელი გათამაშების ლიდერისთვის საკვანძო მოთამაშე გახდა და მის საჩემპიონო ბრძოლაში ერთ-ერთ საკვანძო როლს ასრულებს - კლუბის ლეგიონერ ვაგნერს კი წლეულს უკვე 10 გოლი (7 საგოლე პასი) დაუგროვდა.

22 წლის შემტევმა ნახევარმცველმა ინტერვიუში ჯერ "რუსთავთან" მოგებული მატჩი შეაფასა.

"დამსახურებულად გავიმარჯვეთ. გუნდმა ძალიან მაღალ დონეზე ჩაატარა თამაში, განსაკუთრებით - პირველი ტაიმი. როგორც ყოველთვის, ამჯერადაც მოედანზე ერთსულოვანნი ვიყავით. პირველი ტაიმის მიწურულიდან 10 კაცით ვთამაშობდით. აქედან გამომდინარე, ფეხბურთელები უფრო მეტად დავიტვირთეთ. მეორე ტაიმში ჩვენი სათამაშო სქემა შეიცვალა - მთავარმა მწვრთნელმა აგვიხსნა, თუ როგორ უნდა გადავწყობილიყავით. ვფიქრობ, შევასრულეთ ამოცანა.

"რუსთავთან" გოლს რაც შეეხება, გოშთელიანისგან პასი რომ მივიღე, იყო საშუალება, ტექნიკურად დამერტყა და ძალიან გახარებული ვარ, ფანტასტიკური გოლი რომ გამოვიდა. მაგრამ ყველაზე მთავარი ისაა, რომ "საბურთალომ" მნიშვნელოვანი 3 ქულა მოიპოვა და ჩემპიონობისკენ კიდევ ერთი ნაბიჯი გადადგა", - ამბობს ვაგნერი და იქვე დასძენს, რომ ჩემპიონობის დიდი იმედი აქვს:

"ძალიან მინდა, რომ ჩემპიონები გავხდეთ. ახლა თავში მხოლოდ ეს მიტრიალებს. ჩვენთვის ყველა თამაში ფინალის ტოლფასია. მართალია, დარჩენილი მატჩები საკმაოდ რთული დაპირისპირებები გველის, მაგრამ "საბურთალოს" სასურველი მიზნის მიღწევა შეუძლია.

გუნდი ძალიან კარგი და გამოცდილი ფეხბურთელებით არის დაკომპლექტებული. სიმართლე გითხრათ, ჩემპიონატის დაწყებამდე ვფიქრობდი, რომ ჩემპიონობაზე ბრძოლა შეგვეძლო. სეზონი კარგად დავიწყეთ, პირველივე ტურებიდან ვლიდერობდით და ახლაც ასე ვაგრძელებთ. ძალიან ცოტა დაგვრჩა, რომ დიდი გამარჯვება ვიზეიმოთ".

ვაგნერმა ილაპარაკა იმ განსხვავებებზე, რასაც შარშანდელ და წლევანდელ "საბურთალოს" შორის ხედავს: "ჩვენი გუნდი ყოველწლიურად პროგრესირებდა, თამაშსაც უმატებდა და შედეგსაც. ასე რომ არ იყოს, ჩემპიონობისთვის ვერ ვიბრძოლებდით. წლებთან ერთად გამოცდილება გვემატება. ლოგიკურია, რომ ცხრილის სათავეში ვართ. დარჩენილ თამაშებში მაქსიმალური მობილიზაცია გვმართებს. ჩვენგან ჩემპიონობასა და დიდ სიხარულს ელოდება ხალხი. ფეხბურთელებიც გულშემატკივრების გახარებასა და ისტორიის დაწერას ვეცდებით".

ვაგნერის მეგობრებმა და ნაცნობებმა იციან, მისი გუნდი ჩემპიონობისთვის იბრძვის: "ძალიან ბევრი მირეკავს და მამხნევებენ ბრაზილიიდან და საფრანგეთიდან, მათი მხარდაჭერა და გვერდში დგომა, ჩემთვის მნიშვნელოვანია. ასევე საქმის კურსში არიან ბელგიაში - "სერკლ ბრიუგეს" ფეხბურთელებთან მაქვს კონტაქტი და იქაც იციან, რომ "საბურთალოს" ჩემპიონობის კარგი შანსი აქვს".

ვოლკოვის 300

"საბურთალომ" თავისი დაარსებიდან მეტოქის კარი 300-ჯერ აიღო, საიუბილეო გოლის ავტორი დავით ვოლკოვი გახდა. ეს მოხდა მე-6 წუთზე და სწორედ ამ გოლით გაიხსნა ანგარიში.

დედაქალაქურმა კლუბმა "რუსთავს" უმასპინძლა, 2:1 დაამარცხა. 300 გოლს როცა ვახსენებთ, უნდა განვმარტოთ - ლაპარაკია მხოლოდ ოფიციალურ მატჩებზე, პირველი ლიგიდან დღემდე.

თბილისურმა კლუბმა პირველ ლიგაში სადებიუტო მატჩი 2013 წლის 31 აგვისტოს ხობის "კოლხეთთან" გამართა და 4:1 დაამარცხა. საბურთალოელთა შემადგენლობაში მაშინ გოლები ზურაბ მენთეშაშვილმა და რევაზ გოცირიძემ გაიტანეს, რომლებიც ახლა "საბურთალო 2-ის" მწვრთნელები არიან. მეტოქის კარი აიღეს რევაზ ბარამიძემ და ლორენცო ლარკმაც. სულ "საბურთალოს" ოფიციალური მატჩების ჩატარების რაოდენობა უკვე 182-ს ითვლის.

ყოველდღიური სპორტული გაზეთი "ლელო"
885
მკითხველის კომენტარები / 0 /
მსგავსი ამბები
რუბრიკის სხვა სიახლეები
;