სანდრო მამუკელაშვილის პირველი დუბლი და MVP-ის ტიტული

სანდრო მამუკელაშვილის "სეტონ ჰოლმა" 5 დეკემბერს ლიგის მორიგი მატჩი "ნიუ ჰემპშირთან" გამართა, რომელშიც საქართველოს ეროვნული ნაკრების წევრმა 14 ქულა და 11 მოხსნა მოაგროვა.

ეს გახლდათ მამუკელაშვილის პირველი ორმაგი დუბლი ამერიკის სტუდენტურ ლიგაში. პირველად მოხდა ასევე, რომ სანდრო მატჩის საუკეთესო მოთამაშედ დასახელდა.

მიუხედავად იმისა, რომ მამუკელაშვილი 19 წლისაა და 4-წლიანი სტუდენტური პროგრამის მხოლოდ მეორე საფეხურზეა (სოფმორი), ქართველი ფორვარდი გუნდის ძირითადი ხუთეულის უცვლელი წევრია და მიმდინარე სეზონში საკმაოდ ბევრ სათამაშო დროს უთმობენ. სანდრო ნაბიჯ-ნაბიჯ ყალიბდება NჩAA-ის ერთ-ერთი უმძლავრესი კონფერენციის (დიდი აღმოსავლეთი) წევრის, "სეტონ ჰოლის" ლიდერად.

ქართველმა ფორვარდმა 30 წუთი ითამაშა, 8-დან 5 ორქულიანი, 1-დან 1 სამიანი და 3-დან 1 საჯარიმო ჩააგდო. 14 ქულასთან ერთად სანდრომ მატჩში უმეტესი - 11 მოხსნა, 3 პასი, 2 ჩაჭრა და 2 დაფარება მოაგროვა. სეტონჰოლელი "მეკობრეების" ბომბარდირი 18 ქულით ქუინსი მაკნაითი გახდა, თუმცა მამუკელაშვილის დარი სარგებლიანობით ის ვერ გამოირჩა.

"სეტონ ჰოლმა" "ნიუ ჰემპშირთან" მატჩი 77:57 მოიგო და მიუხედავად იმისა, რომ 5 გამარჯვების წილ 3 მარცხი გააჩნია, "ბიგ ისთის" კონფერენციაში მაინც ბოლოსწინა, მე-9 ადგილზე იმყოფება.

სანდრო მამუკელაშვილი: "გასული სეზონი ჩემთვის სწავლისა და გამოცდილების მიღების წელი იყო, რადგან გუნდში ვიყავი ქვეყნის ერთ-ერთი საუკეთესო მძიმე ფორვარდის, ანხელ დელგადოს შემცვლელი. მისგან ვარჯიშებზე ბევრი ვისწავლე, ყველაფერი გამომადგა წლეულს, მისი წყალობით ფარიდან ბურთს უკეთესად ვხსნი. ეს გამოცდილება ძალიან წამადგა. გასულ სეზონში ასეთი თვითრწმენაც არ მქონდა, რადგან დრო მცირე მეძლეოდა. ახლა მწვრთნელს ჩემი სჯერა, მე კი მინდა, რომ ყოველთვის დავუმტკიცო მას, რომ ტყუილად არ აქვს ჩემი იმედი ".

კევინ უილიარდი ("სეტონ ჰოლის" მწვრთნელი): "რაც მეტ წუთს ვაძლევ სანდროს, ის თავს უფრო კომფორტულად გრძნობს და ეს განსაკუთრებით მის შეტევაში გაუმჯობესებულ თამაშში აისახება. ის მართლაც ძლიერია მოხსნებში. მეორე ნახევარში ეს კარგად გამოვიყენეთ. ვფიქრობ, რომ სანდრო მოედანზე ცოტ-ცოტას ყველაფერს აკეთებს. სანდრო ძირითადად კარგად თამაშობს დაცვაში, არ ვამბობ, რომ ის შესანიშნავია - უბრალოდ, ბევრ ელემენტს საკმაოდ მაღალ დონეზე აკეთებს".

მამუკელაშვილს ამ სეზონში საშუალოდ 10.8 ქულა, 9.0 მოხსნა აქვს 31 წუთში. სანდრო საშუალოდ 50.0%-იანი სიზუსტით ისვრის და ის გუნდის ლიდერია დაფარებების რაოდენობით.

შეგახსენებთ, რომ ახლა მიმდინარეობს სტუდენტური ლიგის არასაკონფერენციო, თუმცა ოფიციალური მატჩები, რომლის შედეგებიც გუნდებს ცხრილში ჩვეულებრივად ეთვლებათ.

დეკემბერში დაიწყება უშუალოდ შიდა მატჩები და გუნდები თავიანთი კონფერენციის ყველა წევრს 2 წრედ, გასვლა-სახლის პრინციპით შეხვდებიან. ამას მოჰყვება პლეი ოფი და გამოვლინდებიან კონფერენციის ჩემპიონები. ბოლო აკორდი კი NჩAA-ის ფინალური ჩემპიონატია, რომელშიც 32-ივე კონფერენციის გამარჯვებულს საუკეთესო რეიტინგის მქონე იმდენი გუნდი დაემატება, რომ 64 შეივსოს და დაიწყება ტურნირი, რომელსაც ეძახიან "მარტის სიგიჟეს".

იქ სტუდენტური ლიგის რჩეული გუნდები პლეი ოფის სისტემით, ერთმატჩიანი რაუნდებით, 1/32 ფინალიდან დაიწყებენ ამერიკაში NBA-ის შემდეგ ყველაზე პრესტიჟული საკალათბურთო ტიტულის NჩAA-ის ჩემპიონობისთვის ბრძოლას.

ყოველდღიური სპორტული გაზეთი "ლელო"
410
მკითხველის კომენტარები / 0 /
მსგავსი ამბები
რუბრიკის სხვა სიახლეები