სარის იუვე რემზის გარშემო აშენდება? სარი რომ რემზის განსაკუთრებულ ფუნქციას აკისრებს

მაურიციო სარის სურს, ახალი “იუვენტუსი” აარონ რემზის გარშემო ააშენოს. დიდი ალბათობით, სწორედ უელსელი ვარსკვლავი იქნება მთავარი კაცი “ბებერი ქალბატონის” შუა ხაზში. საქმე ისაა, რომ უელსელი ძალიან მაგრად ერგება სარის ტაქტიკურ სქემას. 

4-3-3 ან 4-3-2-1 - აი, ეს ორი სქემა აქვს მომავალი სეზონისთვის სარის. ხანგრძლივი განხილვის შემდეგ სწორედ ამაზე შეუთანხმდა ის კლუბის სპორტულ დირექტორს, ფაბიო პარატიჩის. სარი ჭკვიანი კაცია და მან ძალიან კარგად იცის, რომ ეს შეთანხმება არ უნდა დაირღვეს. რომელი სქემაც არ უნდა გამოიყენოს სარიმ, მთავარი მაინც უელსელის მარიფათი იქნება.

რემზის გარდა, “იუვენტუსმა” აიყვანა ადრიენ რაბიოც. მის გარდა კლუბს არ აკლია კვალიფიციური ნახევარმცველები. წესით, ძირითადში უნდა მოხვდნენ ემრე ჯანი და მირალემ პიანიჩი. რა თქმა უნდა, ძირითადში თამაშის ამბიცია ექნება რაბიოსაც.

რემზი განიხილება, როგორც გამოკვეთილი ცენტრალური ნახევარმცველი. ტურინულ კლუბში ძალიან უნდათ, რომ უდიდესი მონაცემების მქონე ფეხბურთელი ბოლომდე გაიხსნას და ის სარგებლობა მოუტანოს კლუბს, რასაც მისგან ელიან.

რატომ მოსწონს ასე 60 წლის მწვრთნელს რემზი? მას ძალიან უნდა, რომ ჰყავდეს ფეხბურთელი, რომელიც შეტევის ბოლოსწინა ფაზაში მეტ დინამიკურობას შეიტანს გუნდის თამაშში. სწორედ ამ მიზნით ასწია “ჩელსიში” მან ზემოთ ნგოლო კანტე, საყრდენი ნახევარმცველის ფუნქციების შესრულება კი ჟორჟინიოს მიანდო.

რა თქმა უნდა, რემზის ნიჭს ეჭვქვეშ არავინ აყენებს, მაგრამ საკითხავი ისაა, რამდენად სტაბილურად შეძლებს თამაშს უელსელი. ყველამ ვიცით, რომ მას მთელი კარიერის განმავლობაში აწუხებს ტრავმები. ახლა ბევრი რამ “იუვენტუსის” სამედიცინო შტაბზე იქნება დამოკიდებული, სადაც ნამდვილი პროფესიონალები მუშაობენ.

სარი რომ რემზის განსაკუთრებულ ფუნქციას აკისრებს, ეს აქედანაც ჩანს: იტალიელმა სპეციალისტმა ვოიცეხ შჩესნისა და ჯანლუიჯი ბუფონს პირადად სთხოვა, რომ დაეხმარონ ადაპტაციაში გუნდის უელსელ ახალწვეულს...

რემზიმ უკვე გაიარა “იუვენტუსში” სამედიცინო შემოწმება. ამ ეტაპზე ყველაფერი კარგადაა და, იმედია, ასე იქნება მომავალშიც.

ყოველდღიური სპორტული გაზეთი "ლელო"
856
მკითხველის კომენტარები / 0 /
მსგავსი ამბები
რუბრიკის სხვა სიახლეები
;