სარის პრინციპები ანუ, რა ეშველება ჰადსონ-ოდოის? - 'ის დიდებული ფეხბურთელია, მაგრამ'...

ინგლისის ნაკრებმა შესანიშნავად დაიწყო ევროპის ჩემპიონატის შესარჩევი ციკლი. “სამი ლომი” ეთამაშა ჩეხეთისა და ჩერნოგორიის ეროვნულ გუნდებს, ორივეს 5-5 გოლი გაუტანა და მხოლოდ ერთი გაუშვა (სტუმრად ჩერნოგორიაში).

10:1 - ბურთების ასეთი შეფარდება ინგლისის ნაკრების ფანების აღტაცებას იწვევს. ამ შეხვედრებში იყო კაპიტნისა და მთავარი ვარსკვლავის მიერ გატანილი 2 გოლი. ასევე, ჰეთ-თრიკი უსწრაფესი ფერადკანიანისა, ვინც გამუდმებით ებრძვის რასიზმს საფეხბურთო მინდვრებზე.

ინგლისის ნაკრები ინარჩუნებს იმ სულისკვეთებას, რომელიც გუნდმა 2018 წლის მუნდიალზე მიიღო, თუმცა ეს არ ნიშნავს იმას, რომ ინგლისურ კლუბებს არ აქვთ პრობლემები. მაგალითად, “ჩელსიში”, რომლის შემტევ კალუმ ჰადსონ-ოდოიზე დღეს მთელი ინგლისი ლაპარაკობს.

ჩეხეთთან შეხვედრაში ის სათადარიგოთა სკამიდან ჩაერთო შეხვედრაში და ისე გამოიყურებოდა, როგორც... პატარა ძვირფასი ქვა. რაც შეეხება ჩერნოგორიასთან თამაშს, სწორედ ჰადსონ-ოდოიმ შექმნა ინგლისელთა მეორე გოლი.

საერთოდ, გამოუცდელი მოთამაშისთვის ყოველთვის ძალიან რთულია პირველი სანაკრებო მატჩები. როგორც ჩანს, ჰადსონ-ოდოის ეს საერთოდ არ აწუხებს. ის მინდორზე გამოჩნდება ხოლმე და... ეგრევე რაღაც ფასეულს აკეთებს.

18 წლის კალუმმა ყველას დაუმტკიცა, რომ უმაღლეს დონეზე შეუძლია ფეხბურთის თამაში. სამწუხაროდ, დაამტკიცა ჯერ მხოლოდ ეროვნულ ნაკრებში, რადგან მას არ ეძლევა საშუალება, “ჩელსიშიც” გამოავლინოს საკუთარი შესაძლებლობები. აღსანიშნავია, რომ ამ დროისთვის ჰადსონ-ოდოის “არისტოკრატთა” სასტარტო შემადგენლობაში პრემიერლიგის ერთი მატჩიც კი არ დაუწყია.

ამ დროისთვის, მან მიმდინარე სეზონში “ჩელსის” შემადგენლობაში მხოლოდ 403 წუთი ითამაშა. დაიწყო თასის რამდენიმე შეხვედრა, მაგრამ თუნდაც მნიშვნელოვან სათასო შეხვედრებში არ იყო ძირითადში. მაურიციო სარი მასზე ყოველთვის ძალიან თბილად ლაპარაკობს, მაგრამ ამის მიუხედავად, კალუმს არ აქვს დიდი ნდობა.

“ის დიდებული ფეხბურთელია, მაგრამ 18 წლის ასაკში არ შეიძლება, მოთამაშემ სრულყოფას მიაღწიოს. ჩემი აზრით, ამას ფეხბურთელი აკეთებს 22-23 წლის ასაკში”, - ამბობს სარი ჰადსონ-ოდოიზე.

22 წლისა კალუმი რომ უკვე დიდი ფეხბურთელი იქნება, ამაზე ორი აზრი არ არსებობს, მაგრამ ის ახლაც მზად არის ამისთვის. ამაში დაგვეთანხმება ყველა, ვისაც ამ ბოლო დროს მისი თამაში უნახავს.

რა თქმა უნდა, ჯერ ჰადსონ-ოდოი ვერ არის ისეთი კარგი, როგორიც ედენ აზარი, მაგრამ რა ვუყოთ იმას, რომ ვილიანი 30 წლისაა, ხოლო პედრო - 33-ის. თუ ისინი თამაშს ჩააგდებენ, ვითომ დიდი არაფერი ხდება. ახალგაზრდა ჰადსონ-ოდოი კი ყოველთვის წნეხში ექცევა.

თუ ასე გაგრძელდა, გამორიცხული სულაც არ არის, ზაფხულში ის “ჩელსიდან” წავიდეს. მისი შეძენით “ბაიერნია” დაინტერესებული. ფაქტი ისაა, რომ “რეკორდმაისტერი” სულაც არ არის ერთადერთი გუნდი, რომელიც მოხიბლულია ახალგაზრდა შემტევით

ზოგადად, “ჩელსის” საკმარისად არ ჰყავს ინგლისელი ვარსკვლავები. მაგალითად, გუნდს ჰყავს როს ბარკლი. კი, ბარკლი უდავოდ ძალიან ნიჭიერი მოთამაშეა, მაგრამ ჰადსონ-ოდოი მასზე პატარაცაა და ნიჭიერიც.

სარი კი ყველანაირად ცდილობს, ბარკლის ბოლომდე ენდოს. და რა ეშველება ჰადსონ-ოდოის?

ყოველდღიური სპორტული გაზეთი "ლელო"
573
მკითხველის კომენტარები / 0 /
მსგავსი ამბები
რუბრიკის სხვა სიახლეები
;