სარი, პოჩეტინო და ინგლისი ვიდეორეფერის აუმხედრდნენ

ინგლისი ტრადიციების ქვეყანაა, არა მხოლოდ ფეხბურთში, მაგრამ ჩვენ ფეხბურთზე ვწერთ და ჩვენს საქმეს მივხედოთ.

ინგლისში ძალიან ბევრს მიაჩნია, რომ ვიდეორეფერის გამოყენება მინიმუმამდე დაიყვანს მატჩის მიმდინარეობისას საეჭვო ეპიზოდებს...

ინგლისის ლიგის თასის ნახევარფინალში „ტოტენჰემი“ „ჩელსის“ დაუპირისპირდა და 1:0 გაიმარჯვა. ამ შეხვედრაში ვიდეორეფერი სატესტო რეჟიმში გამოიყენეს. ყველას ჰქონდა იმის განცდა, რომ სად-სად და ლონდონურ დერბიში იქნებოდა საეჭვო ეპიზოდები...

პარადოქსია, მაგრამ ფაქტი - მიუხედავად იმისა, რომ საქმეში ვიდეორეფერი ჩაერთო, თავიდან ვერ იქნა არიდებული სერიოზული შეცდომა. ვიდეორეფერის მოწინააღმდეგეები კი ძალიან გახარებულები არიან. დაახლოებით ისეთი პოზა უჭირავთ, თავის თავში დარწმუნებული კაცი ხელს რომ ჩაიქნევს და იტყვის, ხომ ვამბობდიო...

თამაშის ანგარიში უკვე იცით. ერთადერთი გოლი „დეზებმა“ 11-მეტრიანით შეაგდეს. არბიტრი მაიკლ ოლივერი არ იყო დარწმუნებული, რომ მეკარე კეპა არისაბალაგამ დასცა მასთან პირისპირ გასული ჰარი კეინი. ვიდეოგამეორების ნახვის შემდეგ ოლივერმა ხელი პენალტის ნიშნულისკენ გაიშვირა - წესების დარღვევა იყო. მაშ, რაში მდგომარეობდა შეცდომა და რატომ დარჩა ბევრისმნახველი ხალხი უკმაყოფილო?

ხსენებულ ეპიზოდამდე რამდენიმე წამით ადრე ლაინსმენმა კეინს თამაშგარე მდგომარეობა დაუფიქსირა, მაგრამ მსაჯმა ალამი ვერ შენიშნა და ეპიზოდი გაატარა. თავის მხრივ, მნიშვნელოვანი შეცდომა დაუშვეს „ჩელსის“ ფეხბურთელებმაც - ნახეს თუ არა გვერდითის მიერ აღმართული ალამი, წამიერად გაჩერდნენ და ეპიზოდს გამოეთიშნენ, რამაც საშუალება მისცა კეინს, მეკარესთან პირისპირ გასულიყო...

მერე რაც მოხდა, უკვე ვთქვით. ოლივერმა ეკრანზე თვითონ როდი შეამოწმა ეს ეპიზოდი. ის დაეყრდნო დამხმარეების აზრს, რომლებმაც გაარჩიეს ეს მომენტი და ჩათვალეს, რომ 11-მეტრიანი იყო, სამაგიეროდ, მათ მხედველობიდან გამორჩათ თამაშგარეს ეპიზოდი.

საბოლოო ჯამში ასე გამოვიდა - გვერდითმა მსაჯმა სწორად დაინახა თამაშგარე, მთავარმა ამას ყურადღება არ მიაქცია, ხოლო დამხმარეებმა საერთოდ არაფერი უთხრეს ოლივერს ამის თაობაზე.

განსაკუთრებული პასუხისმგებლობა აქ იმ ხალხს უნდა დაეკისროს, ვინც მშვიდად არჩევდა ეპიზოდს ტელეეკრანებთან.

შეხვედრის დასრულების შემდეგ მაურიციო სარიმ ცეცხლზე ნავთი დაასხა. ის პრესკონფერენციაზე დიდი ლეპტოპით გამოცხადდა და დეტალურად აუხსნა ჟურნალისტებს, თუ რა შეცდომა დაუშვა არბიტრმა. ვნახოთ, რას ფიქრობს ამის თაობაზე „ჩელსის“ მთავარი მწვრთნელი:

„მიმაჩნია, რომ ამ ეტაპზე ინგლისელი არბიტრები არ არიან მზად ვიდეორეფერის გამოყენებისთვის. ეს არის ჩვენი კამერა და ჩვენ გვაქვს ამ მატჩის ჩანაწერი, რომელშიც  კარგად ჩანს, რომ ჰარი კეინი იმყოფება თამაშგარე მდგომარეობაში. ჩვენმა მცველებმა ამ ეპიზოდში ჩათვალეს, რომ საქმე გვქონდა კლასიკურ ოფსაიდთან. თანაც, არბიტრმა აღმართა ალამი და ეს ფაქტია.

ეს იყო მომენტი, რომელმაც მნიშვნელოვნად განსაზღვრა თამაშის საბოლოო შედეგი. საჭიროა, მსაჯებმა კარგად ისწავლონ მუშაობა ამ სისტემასთან. ძალიან უცნაურია, რომ ტესტირება შედგა ლიგის თასზე და VAR-ი არ გამოიყენება პრემიერლიგის შეხვედრებში. ეს სასწრაფოდაა გამოსასწორებელი“, - თქვა სარიმ.

ახლა მოვუსმინოთ „ტოტენჰემის“ დამრიგებელ მაურისიო პოჩეტინოს: „არ დავმალავ, მე არ მიყვარს ვიდეორეფერი. ჩვენ შეიძლება „ჩელსისთან“ შეხვედრაში ვიხეირეთ ამით, მაგრამ ეს არაფერს ცვლის. ვიდეორეფერი არ არის პრემიერლიგაში, მაგრამ ვუყურე მსოფლიოს ჩემპიონატს, თვალს ვადევნებ ესპანურ ლა ლიგას და შევამჩნიე, რომ VAR-თან ამგვარ დამოკიდებულებაში მარტო სულაც არ ვარ. ის კი არა, ვიდეორეფერი საერთოდ არავის არ მოსწონს.

რა თქმა უნდა, მე არ ვეწინააღმდეგები ტექნიკურ პროგრესს. ამის ფიქრიც კი უაზრობაა, მაგრამ ვიდეორეფერის სჭირდება დახვეწა. ალბათ სულაც არ ვარ ერთადერთი, ვინც ასე ფიქრობს. კი, ჩვენ ვიღებთ VAR-ის ვერდიქტს, მაგრამ არავინ იცის, რა წესები მოქმედებს ასეთ შემთხვევებში. ჩვენ მეტი სიცხადე და გამჭვირვალობა უნდა მოვითხოვოთ. ეს აუცილებელია! გვაქვს უფლება, ვიკითხოთ, „რატომ“ და ეს უნდა გავაკეთოთ კიდეც“.

ყოველდღიური სპორტული გაზეთი "ლელო"
646
მკითხველის კომენტარები / 0 /
მსგავსი ამბები
რუბრიკის სხვა სიახლეები
;