სარი და ბევრი დილემა: მოთამაშეებს თვალი წასვლაზე უჭირავთ,- იტალიელი საფიქრალშია

ინგლისის სუპერთასზე "ჩელსი" უშანსოდ დამარცხდა "მანჩესტერ სიტისთან". ამან ერთხელაც აჩვენა, რომ "არისტოკრატთა" ახალ ბოსს, მაურიციო სარის, გარკვეული დრო დასჭირდება იმისთვის, რომ გუნდი თავის თარგზე მოჭრას.

ზოგადად, "ჩელსი" ახლა ლამის ყველაზე "ცხელი" თემაა ინგლისურ სპორტულ მედიაში...

...ედენ აზარი, ვილიანი და ტიბო კურტუა - ეს სამი ფეხბურთელი "სტემფორდ ბრიჯიდან" წასვლას აპირებს. მათი შესაძლო აბარგება გუნდს კიდევ უფრო დაასუსტებს. ცხადია, "ჩელსის" იტალიელი გურუ ამაზეც ფიქრობს.

მაურიციო სარის თავად უდგას ადაპტაციის პერიოდი "ჩელსიში". თანდათან ბოლომდე უნდა გამოიკვეთოს ის სათამაშო სისტემა, რომელსაც 59 წლის სპეციალისტი უერთგულებს გუნდში მუშაობის დროს.

სარის აიმედებს ის გარემოება, რომ სატრანსფერო ფანჯრის დახურვამდე მცირე დროა დარჩენილი და გასაკვირი არ იქნება, გრანდებმა ვერ მოასწრონ ვილიანის, აზარისა და კურტუას გადაბირება, მაგრამ ეს მხოლოდ ინგლისში. მოთამაშეებს კი თვალი წასვლაზე იმად უჭირავთ, რომ გასული სეზონის შედეგების მიხედვით ლონდონელებმა ჩემპიონთა ლიგის საგზური ვერ მოიპოვეს და ახლა ისინი სხვა კლუბებში ეძებენ ევროასპარეზს.

აზარი "რეალის" სამიზნეა. ბელგიელს ორშაბათს ჯერ კიდევ არ ჰქონდა დაწყებული გუნდთან ერთად ვარჯიში და მზადება ახალი სეზონისთვის. ვილიანს კი, ვინც "სიტისთან" სუპერთასის მატჩში შეცვლაზე შევიდა, "ბარსელონა" ეკურკურება.

თუ ეს ორი ვარსკვლავი გუნდში დარჩება, მათ იდეალური როლი მიენიჭებათ სარის 4-3-3 ტაქტიკურ სქემაში, რომელიც დიდწილად სწორედ ფლანგელი ფეხბურთელების ყოჩაღობაზეა აგებული.

კალუმ ჰადსონ-ოდოიმ წინასასეზონო პერიოდში და თუნდაც სუპერთასზე გვიჩვენა, რომ დიდი პოტენციალი აქვს, მაგრამ მას მაინც ვერ განვიხილავთ მარცხენა ფლანგზე აზარის სრულფასოვან შემცვლელად, რადგან ის ჯერ მხოლოდ 17 წლისაა. იტალიურ, ესპანურ, გერმანულ და ფრანგულ კლუბებს ფეხბურთელების გადაბირება 31 აგვისტომდე შეუძლიათ. ასე რომ, სამეულის წასვლის შანსი დიდია და ეს "ჩელსისთვის" აშკარად გამანადგურებელი დარტყმა იქნება.

ჟირუ ჯერ უკეთესია, მაგრამ...

თუნდაც სუპერთასის მატჩმა აჩვენა, რომ ალვარო მორატა ნამდვილად ვერ არის ოპტიმალურ ფორმაში. ის "სიტისთან" ყველანაირად ცდილობდა, ახალ სამწვრთნელო შტაბზე შთაბეჭდილება მოეხდინა, მაგრამ არაფერი გამოუვიდა. ისე ჩანს, რომ ესპანელი ლონდონურ კლუბში ბედნიერი აღარ არის.

აქ არის ოლივიე ჟირუც, ვინც ძალიან სასარგებლო იყო საფრანგეთის ნაკრების მიერ მოგებულ მსოფლიოს თასზე, მაგრამ ნუ დავივიწყებთ იმასაც, რომ 31 წლის ფორვარდს რუსეთში ერთი გოლიც არ გაუტანია. ის გუნდზე მუშაობდა და ეს საფრანგეთის ნაკრებს ძალიან მოუხდა, მაგრამ "ჩელსის", დიდიე დეშამის გუნდისგან განსხვავებით, მორატასთან ერთად მთავარ გამტანად სწორედ ჟირუ ჰყავს.

გავრისკავთ და ვიტყვით, რომ გუნდში ვილიანისა და აზარის დარჩენის შემთხვევაში ფრანგი თავდამსხმელის შედეგიანობა გაცილებით დიდი იქნება, ვიდრე მაშინ, თუ ეს ორი ვარსკვლავი დატოვებს გუნდს.

დავიდ ლუიზის ადგილი

დავიდ ლუიზმა "სიტისთან" შეხვედრაში ცენტრალური დაცვა გაამაგრა ანტონიო რიუდიგერთან ერთად. საკითხავია, რამდენად მოიძებნება არასტაბილური ბრაზილიელის ადგილი სარისეულ ოთხკაციან დაცვაში?

როცა დავიდი ხელმეორედ დაბრუნდა "ჩელსიში", კარგად ჩაჯდა გუნდის მონახაზში და შემთხვევითი არ არის, რომ ლონდონელებმა პრემიერლიგა მოიგეს, მაგრამ მას მერე, რაც ანტონიო კონტემ 3 მცველით დაიწყო თამაში, დავიდ ლუიზი შემადგენლობაში ვეღარ ხვდებოდა და, შესაბამისად, მწვრთნელთანაც დაეძაბა ურთიერთობა.

გუნდში სარის მოსვლა მისთვის ახალი შანსია. ოთხკაციან დაცვაში, წესით, უნდა გამოიძებნოს მყარი ადგილი 31 წლის ბრაზილიელი მცველისათვის.

საჭიროა ახალი მეკარე

დიდი ალბათობით, "ჩელსის" ახალი მეკარე დასჭირდება. ტიბო კურტუა ძალიან ახლოს არის "რეალთან" და თავად ბელგიელ ვარსკვლავსაც სურს "სტემფორდ ბრიჯიდან" აბარგება.

გუნდი ვერ იქნება ახლახან მოყვანილი რობერტ გრინის იმედზე. მას აქვს დიდი გამოცდილება და თავის დროზე ინგლისის ნაკრების კარიც დაუცავს, მაგრამ უკვე ასაკშია. ვილი კაბალიერო კი რასაც წარმოადგენს, ეს ერთად ვნახეთ რუსეთში გამართულ მსოფლიოს ჩემპიონატზე...

ასეა თუ ისე, ფაქტია - კურტუას შემდეგ ლონდონურ გრანდს აუცილებლად დასჭირდება ახალგაზრდა, საიმედო და მზარდი მეკარე. ეს საკითხი თუ არ მოგვარდა, სარის გუნდს ძალიან გაუჭირდება მაღალი ადგილებისთვის ბრძოლა.

ყოველდღიური სპორტული გაზეთი "ლელო"
1164
მკითხველის კომენტარები / 0 /
მსგავსი ამბები
რუბრიკის სხვა სიახლეები
;