სასიცოცხლო  აუცილებლობა! ევროტურნირებამდე დარჩა ორი თვე... 

დრო სწრაფად გადის. ორი თვეც და ქართული კლუბები ევროთასებზე ითამაშებენ. საქართველოს ეროვნული ლიგის პირველი წრე კი უკვე დასრულდა და, ალბათ, გარკვეული დასკვნების გამოტანაც შეიძლება...

პირდაპირ უნდა დავწეროთ: მართალია, ჩვენს ჩემპიონატში გამოერია რამდენიმე კარგი თამაში, მაგრამ თავის მოტყუება იქნება, თუ ვიფიქრებთ, რომ ჩვენი გუნდების სათამაშო დონე და კლასი ამაღლდა, თან იმდენად, რომ ევროთასებზე სასწაულს არა და, კარგ შედეგს მაინც უნდა ველოდოთ...

მოგეხსენებათ, საქართველოს ევროთასებზე 4 კლუბი წარადგენს. ჩემპიონთა ლიგის საკვალიფიკაციო ეტაპზე “საბურთალო” იასპარეზებს. გიორგი ჭიაბრიშვილის გუნდი პირველად გადის ევროთასებზე და მწვრთნელისგან განსხვავებით, არ აქვს ევროპის უმთავრეს საკლუბო ტურნირზე თამაშის მცირე გამოცდილებაც კი.

საქართველოს კვალობაზე “საბურთალოს” კარგი შემადგენლობა ჰყავს და როტაციის საშუალებაც აქვს, მაგრამ რამდენად იქნება ეს საკმარისი ჩემპიონთა ლიგისთვის? გავრისკავთ და ვიტყვით, რომ არ იქნება! რა თქმა უნდა, ამას ხედავს “საბურთალოს” ხელმძღვანელობა და იმედია, ჩემპიონთა ლიგის სტარტამდე გუნდი გაძლიერდება.

საქართველოში საკმარისია ის სისწრაფეები, რომელთაც “საბურთალო” თამაშობს, მაგრამ იქნება კი ეს საკმარისი ევროთასებისთვის? ან დაცვაში არსებულ წუნს გვაპატიებს მოწინააღმდეგე? მოკლედ, ევროსტარტამდე გუნდს უთუოდ დასჭირდება გაძლიერება...

ევროპალიგაში საქართველო რომ უნდა წარმოადგინოს, იმ ორი გუნდის თამაშს ორიოდე დღის წინ ვადევნე თვალი და აშკარად უნდა მოუმატონ “ჩიხურამ” და “ტორპედომაც”. კი, ორივეს ჰქონდა კარგი მატჩები საქართველოს ჩემიონატში, მაგრამ მეტი რომაა საჭირო, ამაში, ალბათ, ამ ორი კლუბის წარმომადგენლებიც დაგვეთანხმებიან.

თბილისის “დინამო” ერთხელაც შეუყვა ახალი გუნდის შენების გზას. ჩისკო არ არის ჯადოქარი, ხელის ერთი აქნევით შექმნას მაღალი კლასის გუნდი, მაგრამ ფაქტია, “დინამომაც” უნდა მოუმატოს. გუნდის თამაშში ჩანს მონახაზი, მაგრამ შეცდომა ჯერ კიდევ ბევრია და მთელ რიგ შემთხვევებში სისწრაფეებიც დაბალია.

გასაგებია, ორ თვეში კარდინალურად გუნდები ვერ შეიცვლებიან, მაგრამ იმაზე უკეთ რომ უნდა ვითამაშოთ, ვიდრე ახლა ვთამაშობთ, ეს, უბრალოდ, სასიცოცხლო აუცილებლობაა!

ყოველდღიური სპორტული გაზეთი "ლელო"
1354
მკითხველის კომენტარები / 1 /
ილაპარაკე და იყავი..
0
სულ ცალფეხზე არ კიდიათ გუნდების მეპატრონეებს....
მსგავსი ამბები
რუბრიკის სხვა სიახლეები
;