საფიქრალი. ვინ შეიძლება დაგვაკლდეს აზერბაიჯანთან?

საქართველოს ეროვნული ნაკრები 2 თებერვალს ანთალიაში აზერბაიჯანს ხვდება.

ამ ეტაპზე ჩვენ არ ვიცით, როგორი შემადგენლობით ვითამაშებთ ამხანაგურ მატჩს მეზობელი ქვეყნის უპირველეს გუნდთან. სავარაუდოდ, არაერთ ფეხბურთელს არ შეექმნება კლუბიდან გათავისუფლების პრობლემა...

მეკარეები

ვფიქრობთ, მახაჩყალის "ანჟის" გაუჭირდება გიორგი ლორიასთან შელევა. იმ დროისთვის, დიდი ალბათობით, დაღესტნელები შეკრებაზე იქნებიან. ასეთ შემთხვევაში კი კლუბებს უჭირთ იმ ფეხბურთელების ნაკრებში გაშვება, რომლებიც ძირითადი შემადგენლობის წევრებად ითვლებიან.

მცველები

ძალიან რთულად სავარაუდოა, რომ არნემის "ვიტესი" მის კაპიტანსა და ლიდერს, გურამ კაშიას შეელიოს 2 თებერვლისთვის. ვნახოთ, იქნებ კაშიას სიტყვა აღმოჩნდეს გადამწყვეტი და ის მაინც წამოვიდეს ნაკრებში, მაგრამ ამის წინასწარმეტყველება ძალიან რთულია. მით უმეტეს, "ვიტესში" კაშიაზე ძალიან ბევრი რამაა დამოკიდებული.

დიდი ალბათობით, დავით ხოჭოლავასთან შელევა გაუჭირდება დონეცკის "შახტარს" და ეს არცაა გასაკვირი, რადგან დონეცკური კლუბი ჩემპიონთა ლიგის პლეი ოფშია გასული.

ხოჭოლავა კი თანდათან უშინაურდება უკრაინულ კლუბს და ამ მატჩებისთვის ისიც ისევე მაღალ დონეზე უნდა იყოს მომზადებული, როგორც "შახტარის" ძირითადი შემადგენლობის სხვა ფეხბურთელები.

რა თქმა უნდა, რუსეთის ჩემპიონატის ლიდერი მოსკოვის "ლოკომოტივი", დიდი ალბათობით, არ გამოუშვებს თავის ერთ-ერთ ლიდერს, საბა კვირკველიას, რომელიც "რკინიგზელთა" შეუცვლელ მოთამაშედ იქცა.

საქართველოს ნაკრების ცენტრალური მცველის გარეშე იური სიომინის გუნდის დაცვის ხაზის წარმოდგენა შეუძლებელია.

ნახევარმცველები

საქართველოს ნაკრების წამყვანი და ყველაზე კონკურენტუნარიანი სათამაშო რგოლი ნახევარდაცვაა. ამის გათვალისწინებით, ჩვენ ახლავე უნდა შევეგუოთ იმას, რომ აზერბაიჯანთან შეხვედრაში ძალიან მნიშვნელოვანი დანაკლისი გვექნება.

ახლა მხოლოდ ვარაუდი შეიძლება იმაზე, მნიშვნელოვან ფეხბურთელთაგან ვინ შეიძლება დაგვაკლდეს გურბან გურბანოვის გუნდთან შეხვედრაში და ვინ - არა, მაგრამ აქედანვე შეიძლება იმის ვარაუდი, რომ თუ სასწაული არ მოხდა, დანაკლისი მართლაც სოლიდური იქნება

- თორნიკე ოქრიაშვილი, ჯანო ანანიძე, ვაკო ყაზაიშვილი, ნიკა კვეკვესკირი, გიორგი მერებაშვილი, ჯაბა ჯიღაური, გიორგი აბურჯანია, გიორგი პაპუნაშვილი...

"ტობოლში" გადადის ჯაბა კანკავა და, დიდი ალბათობით, დაგვაკლდება კაპიტანიც. თუ ამ დროისთვის ახალი გუნდი მოძებნა ვაკო გვილიამ, შეიძლება, ვერც ის წამოვიდეს ნაკრებში...

ასეთ შემთხვევაში, ძალიან მნიშვნელოვანია ახალი ფეხბურთელების გამოცდა. ამ მნიშვნელოვან თემას ადრე უკვე შევეხეთ, მაგრამ ერთსაც დავამატებთ. სანდრო კობახიძე ისეთ ფორმაში შევიდა, ისეთი გოლებით შეეწია უკრაინის ჩემპიონატში თავის გუნდს, ის ალბათ იმსახურებს შანსს აზერბაიჯანის ნაკრებთან შეხვედრაში.

თავდამსხმელები

რაც შეეხება თავდასხმის ხაზს. ვეჭვობთ, საქართველოს ნაკრების შემადგენლობაში ვიხილოთ გიორგი ქვილითაია და ნიკა კაჭარავა. მათი გუნდები იმ დროისთვის გაცხარებულ მოსამზადებელ პერიოდში იქნებიან. თან ორივე მათგანი ძირითადი შემადგენლობის წევრია.

რა თქმა უნდა, "ემპოლი" ძნელად თუ შეელევა ლევან მჭედლიძეს, რომელსაც დიდი ხნის განმავლობაში ტრავმა აწუხებდა და იანვარში განაახლებს თამაშს. ამდენად, გასაკვირი არ იქნება, რომ ტოსკანურმა კლუბმა ქართველის ჯანმრთელობა რისკის ქვეშ არ დააყენოს.

არ ვიცით ზუსტად, რა და როგორ იქნება ბაჩანა არაბულთან დაკავშირებით, მაგრამ ძალიან კარგი იქნებოდა, უნგრეთის ჩემპიონატში თავგამოჩენილ ფორვარდს ეროვნულ გუნდშიც მისცემოდა შანსი. ვფიქრობთ, ის ამას იმსახურებს.

* * *

ასე რომ, ვლადიმირ ვაისს დიდი თავსატეხი ექნება შემადგენლობის შერჩევისას. სიტუაციიდან გამომდინარე, რეალურია, რომ ნაკრები საქართველოს ჩემპიონატში მოთამაშე ფეხბურთელებით დაკომპლექტდეს.

იმ დროისთვის ჩვენი კლუბებიც სამზადისში იქნებიან და ჩანს, მსხვერპლის გაღება სწორედ მათ მოუწევთ.

ერთი მხრივ კი კარგია, თუ აქაური კადრები საერთაშორისო დონეზე გამოიცდებიან, მაგრამ რა ვუყოთ, რომ აზერბაიჯანთან სპარინგს ერთა ლიგისთვის მზადების დანიშნულება აქვს და ვაისს ის ფეხბურთელები სჭირდება, რომელთაც უკვე კარგად იცნობს...
რა გაეწყობა...

ყოველდღიური სპორტული გაზეთი "ლელო"
3994
მკითხველის კომენტარები / 5 /
ალეკო
0
ვინღა დარჩა? რა თქმა უნდა - დვალიშვილი! :)
მახა
0
დედა რა გვეშველება,ეს რა საფიქრალი გაგვიჩინა საახალწლოდ!
მსგავსი ამბები
რუბრიკის სხვა სიახლეები
;