[საფიქრალი] როგორ ვუშველოთ საქართველოს ნაკრების ყველაზე დიდ პრობლემას?..

ცოტა ხნის წინ შვეიცარიულ მედიაში ეროვნული ნაკრების შესახებ გამოქვეყნდა სტატია. იქაური მედია არ მალავს, რომ ვლადიმირ პეტკოვიჩის გუნდის მთავარი პრობლემა ზოგიერთი ფეხბურთელის არასახარბიელო კონდიციებია.

გასაგებია, რომ შვეიცარიელებს თავიანთი ტკივათ, მაგრამ ამ მხრივ საქართველოს ნაკრებში გაცილებით მძიმე მდგომარეობაა და ჩვენი წერილიც სწორედ ამ თემას ეძღვნება...

სანამ წერილის დედააზრზე გადავალთ, ერთი პატარა განმარტება გვინდა, გავაკეთოთ. ვლადიმირ ვაისს ნაკრების ძირითად სიაში საბა კვირკველიას არყოფნის გამო ვუსაყვედურეთ. გასაგებია, რომ კვირკველია უთამაშებელია, მაგრამ ის ადრეც ყოფილა ასეთ ვითარებაში და დიდი სარგებლობა მოუტანია საქართველოს ნაკრებისთვის.

გარდა ამისა, ჩემი აზრით, კვირკველიასთან ერთად საქართველოს ნაკრების დაცვა გაცილებით საიმედო რგოლია, ვიდრე მის გარეშე, რადგან სრულფასოვანი ალტერნატივა დღეს ჩვენ უბრალოდ არ გვყავს.

ახლა კი მთავარზე. რატომ არის ის პრობლემა მთავარი საქართველოს ნაკრებისთვის, რაზეც ზემოთ დავწერეთ? რამდენიმე ჩვენს ფეხბურთელს აშკარად აკლია სათამაშო პრაქტიკა და არ შეიძლება, ეს გვახარებდეს. მივყვეთ თანმიმდევრობით.

გურამ კაშიას და ვაკო ყაზაიშვილს ამერიკაში სეზონი დაუსრულდათ. ასე რომ მოხდა, ეს მათი ბრალი ნამდვილად არ არის. ისინი თბილისის "დინამოში" ვარჯიშობენ, სადაც ამისთვის იდეალური პირობებია, მაგრამ მაინც ისმის კითხვა - რამდენად იქნება საკმარისი ეს იმისთვის, რომ ისინი სრულ მზადყოფნაში შეხვდნენ ეროვნული გუნდის მატჩებს?

სეზონი დასრულდა შვედეთშიც. ეს სეზონი აქტივში უნდა ჩავუწეროთ გიორგი ხარაიშვილს. მასთან დაკავშირებითაც დაახლოებით ანალოგიური პრობლემაა. კარგია, რომ ის "საბურთალოში" ვარჯიშობს, მაგრამ სათამაშო პრაქტიკა მაინც სხვაა. თავს მხოლოდ იმით თუ დავიმშვიდებთ, რომ შვედეთში სეზონი ახლახან მორჩა და ხარაიშვილს უთამაშებლობა კატასტროფულად არ დაეტყობა.

ტრავმის მოშუშების შემდეგ დონეცკის "შახტარში" პრაქტიკულად არ ეძლევა სათამაშო დრო დავით ხოჭოლავას. არადა, ისე ჩანს, რომ კაშიას წესითა და რიგით, დაცვის ცენტრში სწორედ ხოჭოლავა უნდა შეუწყვილდეს, თუ გია გრიგალავას სასარგებლოდ არ გაკეთდა არჩევანი.

სათამაშო პრაქტიკა აკლია ნიკა კვეკვესკირს. მან სულ ახლახან მოიშუშა ტრავმა. ამავე პრობლემის წინაშე დგას "ტვენტეს" საყრდენი ნახევარმცველი გიორგი აბურჯანია.

მართალია, ბოლო დროს თითქოს გამოჩნდა შუქი გვირაბის ბოლოს, მაგრამ სათამაშო წუთები თავზე არც ჯანო ანანიძეს გადასდის მოსკოვის "სპარტაკში", უფრო პირიქით. ვახტანგ ჭანტურიშვილი ეს-ესაა დაუბრუნდა ჩეხურ "ზლინს".

"გენტის" შემადგენლობაში ვერა და ვერ იქცა ძირითადის ფორვარდად გიორგი ქვილითაია, რომელიც აგერ, ევროპალიგაზე სტუმრად დამაჯერებლად მოგებულ მატჩშიც კი დამატებულ წუთებზე შეუშვეს მინდორზე.

ასეთი მდგომარეობაა დღეს. კი ბატონო, შვეიცარიასთან მატჩში სატურნირო მოტივაცია აღარ გვაქვს და ხორვატებსაც ამხანაგურად ვეთამაშებით, მაგრამ არ უნდა დაგვავიწყდეს ჩვენი მთავარი ორიენტირი - ახლა თითოეული მატჩი განიხილება ერთა ლიგის ნახევარფინალისთვის მომზადების ჭრილში.

დღესვე შიში გვიპყრობს - როგორ მდგომარეობაში იქნებიან ჩვენი ფეხბურთელები მარტის იმ კონკრეტულ მონაკვეთში, როცა ერთი ლიგის პლეი ოფი უნდა ვითამაშოთ?

1380
მკითხველის კომენტარები / 2 /
G.LA
0
sul utamasheblobis problema gvakvs da ese ikneba martshic. amas vaisis dabali kvalifikaciac emateba
თეიმურაზ რეხვიაშვილი
0
ვაისმა სრულიად ჯანმრთელი კვერკველია შვეიცარიასთან თბილისშიც არ ათამაშა პირველ ტაიმში და განაცხადა რომ
მიზეზი თვითონ საბამ იცოდა და არც არავის მოუთხოვია მისთვის ამისათვის პასუხი დილეტანტობის გამო.მიკვირს ჟურნალისტების ქცევა ისინი რეპორტაჟების დროს პროფესიანულად არჩევენ გრანდე
ბის თამაშებს და მათ მწვრთნელებს აკრიტიკებენ მაგრამ არასოდეს არჩევენ ჩვენი ნაკრებების თამაშებს და კაკაურიძის გარდა არავინ აკრიტიკებს მათ მწვრთნელებს
ამით ისინი დათვურ სამსახურს უწევენ ქართულ ფეხბურთს. რატომ არ შეიძლება რომ როგორც ქეცბაიას უპირისპირდებოდით ტელევიზიით და ზარის საშუალებით აქტიურად ვიყავით ჩართული გულშემატკივრებიც ეხლაც მოიწვიოთ ასეთ გადაცემებში ვაისიც და აგვიხსნას მის მიერ ხშირად მიღებული მცდარი გადაწყვეტილებები. მაგალითად რატომ არასოდეს აკეთებს ტაქტიკურ ცვლილებებს მეორე ტაიმში და რატომ აგებს მოწინააღმდეგე გუნდის უკლებრივ ყველა მწვრთნელთან ამ საკითხებში დროა რომ მას მოვთხოვოთ პასუხი თუ რატომ არ ათამაშებს ზარანდიას,პარუნაშვილს,მჭედლიშვილს,მელქაძეს,ან რატომ არ იწვევდა დიდი ხნის განმავლობაში გრიგალავას მიუხედავად იმისა,რომ სულ მაღალ დონეზე თამაშობდა ტულაში,რატომ არ ათამაშებდა ხარაიშვილს თუ მას გონია რომ კვიპროსი შვედეთზე წინაა,მაშინ ნათელი ხდება რატომ ვერ უგებს ვერასოდეს ევროპის საშულო დონის გუნდებს და იმიზეზებს იმას რომ მათი ფეხბურთელები ინგლისში და გერმანიაში თამასობენო.ვეკითხები მაშ როგორ მოვუგეთ ბულგარეთს სტოიჩკოვით,უელსს,ხორვატიას სწორი–სწორზე ვეთამაშეთ იტალიას,მოვუგეთ რუსეთს და თვით ესპანთსაც კი? გვიპასუხოს. მე დარწმუნებული ვარ რომ არ ყოფილიყო ჩაკვეტაძე ვერც მესამე ხარიხოვანი გუნდების ტურნირსაც ვერ მოიგებდა.რატომ არ დასაჯა ფეხბურთელი რომელის ას პროცენტიან საგოლე მდგომარეობაში მყოფ პართნიორს პასი არ გაუკეთა და არაერთხელ გააკეთა ეს.და სჯის გაურკვეველი მიზეზით კვერკველიას,ხარაიშვილს.საკვირველია რატომ იწვევს მუდმივად ჭანტურიშვილს და არასოდეს ათამაშებს მას? მიპასუხოს.
მსგავსი ამბები
რუბრიკის სხვა სიახლეები
;