საფრანგეთი. ლიგა 1. XVII ტური: არ არის ნეიმარი, არ არის პრობლემა... [VIDEO]

"პარი სენ-ჟერმენმა" წაიფორხილა და ისევ მხრებში გაიშალა - ლიდერმა ლიდერის გარეშე მოიგო, ნეიმარი დისკვალიფიკაციის გამო ტოვებდა "ლილთან" მატჩს.

"ლილთან" 3:1 მოგებულ შეხვედრაში ანხელ დი მარიამ და კილიან მბაპემ იყოჩაღეს. ორივემ გოლი და საგოლე პასი მიითვალა.

უნაი ემერი (პსჟ): "სამშაბათის წაგების შემდეგ არ მსურდა ყველას შეცვლა. დანი სულ თამაშს ითხოვს, თუმცა მსურს, რომ მონიემ ის ხანდახან ჩაანაცვლოს. ძლიერი გუნდის წინააღმდეგ კარგად ვითამაშეთ.

"ლილმა" ჩაკეტა სივრცეები და კონტრშეტევებზე ფიქრობდა, მაგრამ ჩვენ სიმშვიდე და მოთმინება გამოვიჩინეთ. დავარტყით ყველაზე სწორ დროს და მოვიგეთ. ორი მარცხის შემდეგ მოგება ძალიან სასიამოვნოა".

ჩემპიონმა საკუთარ გულშემატკივრებს გვარიანი შიში აჭამა - კორეელი სუკის გოლებით "ტრუა" 2:0-ს იგებდა, თუმცა თამაშის შემოტრიალება შეძლო. მატჩის გმირი გუიდო კარილიოა, რომელმაც ბოლო წუთებზე დუბლი შეასრულა.

ლეონარდო ჟარდიმი (მონაკო): "დიდად ემოციური მატჩი იყო, ბევრი გოლი გავიდა და თამაშიც შემოვატრიალეთ. ყოჩაღ, ბიჭებო! გუნდმა მებრძოლი სული გამოავლინა და ეს უმთავრესია".

"ლიონმა" ისეთი თამაში მოიგო, რომელიც, წესით, უნდა წაეგო. 89-ე წუთზე (1:1-ზე) მასპინძელი "ამიენი" პენალტს ურტყამდა, მაგრამ გაელ კაკუტამ ძელს გაარტყა ბურთი. მალე კი 19 წლის ალჟირელმა ჰუსემ აუარმა კონტრშეტევაზე დუბლი შეასრულა და "ლიონს" სამი ქულა მოუტანა.

"ნიცა" კი სამ ქულას მარიო ბალოტელის უნდა უმადლოდეს, რომელმაც სეზონში მეცხრე გოლი გაიტანა. "ნიცამ" კლაუდიო რანიერის "ნანტი" ბრეტონში 2:1 დაამარცხა.

ფაქტები

* "ბორდომ" 2013 წლის შემდეგ ყველაზე დიდი მარცხი განიცადა აღზევებულ გუნდთან.

* სტეფან ბაოკენმა (სტრასბური) ლიგა 1-ის 6 მატჩში სასტარტო შემადგენლობაში 5 გოლი გაიტანა.

* "სტრასბურს" 5-მატჩიანი წაუგებელი სერია აქვს ლიგა 1-ში.

* ჰიუნ-იუნ სუკმა (ტრუა) ლიგა 1-ში 8 ზუსტი დარტყმით 5 გოლი გაიტანა.

* გასული სეზონიდან მოყოლებული კილიან მბაპემ (პსჟ) 21 გოლი გაიტანა და 13 საგოლე პასი გააკეთა. ეს ტოპლიგებში 20-წლამდელთა შორის საუკეთესოა.

* "ლიონმა" "ამიენთან" მატჩის პირველ ტაიმში კარში ერთხელაც ვერ დაარტყა. ასეთი რამ გუნდს აპრილის მერე პირველად დაემართა.

* ალასან პლეამ (ნიცა) მისთვის მე-100 მატჩში ლიგა 1-ში 25-ე გოლი გაიტანა.

* "ლიონმა" ზედიზედ მეხუთე საგარეო მატჩი მოიგო.

ბორდო-სტრასბური 0:3
გოლები: 0:1 ბაოკენი (2), 0:2 ლიენარდი (38), 0:3 ტერიე (64)
პსჟ-ლილი 3:1
გოლები: 1:0 დი მარია (28), 2:0 პასტორე (49), 2:1 ელ-ღაზი (86), 3:1 მბაპე (93)

ანჟერი-მონპელიე 1:1
გოლები: 0:1 მბენზა (51), 1:1 ეკამბი (56)
გენგამი-დიჟონი 4:0

მეცი-რენი 1:1
გოლები: 1:0 მოლე (41), 1:1 მუბელე (86)
მონაკო-ტრუა 3:2
გოლები: 0:1 სუკი (25), სუკი (50), 1:2 დეპლანი (70 ს. კ.), 2:2 კარილიო (85), 3:2 კარილიო (88)

ტულუზი-კაენი 2:0
გოლები: 1:0 და სილვა (61 ს.კ.), 2:0 გრადელი (74-პენ)
ამიენი-ლიონი 1:2
გოლები: 1:0 გაკპე (9), 1:1 აუარი (79), 1:2 აუარი (93)

ნანტი-ნიცა 1:2
გოლები: 1:0 ბამუ (12), 1:1 პლეა (42), 1:2 ბალოტელი (75)
მარსელი-სტ. ეტიენი 3:0
გოლები: 1:0 ჟერმენი (11), 2:0 ჟერმენი (71), 3:0 ოკამპოსი (80)
 გაძევება: პიერ-გაბრიელი (51. სტ. ეტიენი)

ბომბარდირები: 17 - ედინსონ კავანი (პსჟ); 14 - რადამელ ფალკაო (მონაკო); 12 - მარიანო დიასი (ლიონი); 11 - ნაბილ ფეკირი (ლიონი); 9 - მარიო ბალოტელი (ნიცა), ნეიმარი (პსჟ); 8 - მემფის დეპაი (ლიონი), ფლორიან ტოვენი (მარსელი).

ყოველდღიური სპორტული გაზეთი "ლელო"
1049
მკითხველის კომენტარები / 0 /
მსგავსი ამბები
რუბრიკის სხვა სიახლეები
;