საფრანგეთი. პირველ დივიზიონი: პლეი ოფისთვის ბრძოლა გამძაფრდა

საფრანგეთის სარაგბო ჩემპიონატის ელიტურ, პირველ დივიზიონში მე-18 ტურის შემდეგ პლეი ოფში მოხვედრისთვის ბრძოლა გამძაფრდა.

მედლებისთვის ბრძოლის გაგრძელების შანსი „ტულონსაც“ კი მიეცა, რომელიც ამჟამად მეათე ადგილზეა. ტულონელთა გარდა კიდევ ხუთ „ქართულ გუნდს“ შეუძლია პლეი ოფში გააღწიოს.

ყველაზე კარგი სატურნირო მდგომარეობა დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონს“ აქვს, რომელმაც შინ მიიღო ბექა გიგაშვილისა და დავით ქუბრიაშვილის „გრენობლი“ და 52:17 დაამარცხა. ზირაქაშვილი და ქუბრიაშვილი ძირითად შემადგენლობაში იყვნენ. კლერმონელი შერკინების ბურჯი 69-ე წუთზე შეცვალეს, გრენობლელმა კი მოედანი 41-ე წუთზე დატოვა. კაკაბაძე თამაშში 51-ე წუთიდან ჩაერთო.

„ვულკანების“ შემდეგ ყველაზე უკეთესი მაჩვენებელი ბექა გორგაძის, ლაშა ტაბიძისა და ლექსო ყაულაშვილის „ბორდოს“ აქვს, რომელმაც სტუმრად წააგო მიხეილ ნარიაშვილის, კონსტანტინე მიქაუტაძის, ლევან ჩილაჩავას, უშანგი ჭეიშვილისა და გელა აფრასიძის „მონპელიესთან“ - 10:37.

ნარიაშვილი ძირითად შემადგენლობაში იყო და 63-ე წუთზე შეცვალეს, იმავდროულად თამაშში ჩაერთო ტაბიძე, მიქაუტაძე კი მოედანზე 41-ე წუთიდან გამოჩნდა.

პლეი ოფში გასვლის რეალური შანსი აქვს ვასილ კაკოვინისა და გურამ გოგიჩაშვილის „რასინგს“, რომელმაც შინ უშუალო კონკურენტი „ლა როშელი“ დიდი ანგარიშით დაამარცხა - 50:14. კაკოვინი თადარიგში იყო და თამაშში 41-ე წუთიდან ჩაერთო.

მამუკა გორგოძის „ტულონმა“ სტუმრად დაამარცხა აუტსაიდერი „პერპინიანი“ 24:11 და პლეი ოფში გასვლის თეორიული შანსი გაუჩნდა. გორგოძე მოედანზე 45-ე წუთიდან გამოჩნდა.

I დივიზიონი

XVIII ტური
რასინგი-ლა როშელი 50:14, კლერმონი-გრენობლი 52:17, მონპელიე-ბორდო 37:10, პო-აჟენი 27:17, ლიონი-კასტრი 15:23, პერპინიანი-ტულონი 11:24, სტად ფრანსე-ტულუზი 9:28

სატურნირო მდგომარეობა
1. ტულუზი - 67 ქულა, 2. კლერმონი - 61, 3. ლიონი - 52, 4. ლა როშელი - 51, 5. კასტრი - 49, 6. ბორდო - 48, 7. რასინგი - 46, 8. სტად ფრანსე - 46, 9. მონპელი - 38, 10. ტულონი - 37, 11. პო - 33, 12. აჟენი - 25, 13. გრენობლი - 20, 14. პერპინიანი - 8

მეორე დივიზიონში ლიდერთა ოთხეულში სამი ქართველ მორაგბეთა გუნდია. ესენია: „ნევერი“, „ოიონაქსი“ და „ბრივი“. „ნევერს“ და ბასკურ „ბაიონს“ 69-69 ქულა დაუგროვდათ და პირველ-მეორე ადგილებს იყოფენ. ბასკებმა 23-ე ტურში სტუმრად წააგეს, მერაბ შარიქაძის, გიორგი ჯავახიას, გიორგი ცუცუქირიძის, ვანო კარკაძის, ბექა საღინაძისა და გიორგი ვეფხვაძის „ორიაკთან“ - 27:41. ქართველ მორაგბეებს არ უთამაშიათ. ვეფხვაძის გარდა ყველა ეროვნულ ნაკრებშია გამოძახებული.

თორნიკე მატარაძისა და გურამ პაპიძის „ნევერმა“ კი შინ დაამარცხა „კოლომიე“ - 38:12. მატარაძე თამაშში 54-ე წუთიდან ჩაერთო, პაპიძეს არ უთამაშია.
ირაკლი მირცხულავას „ოიონაქსი“ ლიდერებს ერთი ქულით ჩამორჩება. ჩვენებურთა ეს გუნდი სტუმრად ფრეს დასჯერდა „მონტობანთან“ - 19:19. მირცხულავა თამაშში 52-ე წუთიდან ჩაერთო.

ელიტაში დაბრუნებისთვის იბრძვის კარლენ ასიეშვილის, სოსო ბეკოშვილის, ვასილ ლობჟანიძის, ოთარ გიორგაძისა და ლუკა გოგინავას „ბრივი“. ჩვენებურთა ეს გუნდი სტუმრად დამარცხდა ვაჟა კაპანაძის „ბურგ ან ბრესთან“ - 27:31. ბეკოშვილი 65-ე წუთზე შეცვალეს, გოგინავამ ასიეშვილი 69-ე წუთზე შეცვალა, კაპანაძე თამაშში 45-ე წუთიდან ჩაერთო.

შალვა სუთიაშვილის, ზაურ თევდორაშვილისა და გიორგი ნეფარიძის „ანგულემმა“ სტუმრად მინიმალური სხვაობით დაამარცხა „პროვანსი“ - 21:20. თევდორაშვილი თამაშში 50-ე წუთიდან ჩაერთო, ნეფარიძე მოედანზე ათი წუთის შემდეგ გამოჩნდა.

II დივიზიონი

XXIII ტური
მონტობანი-ოიონაქსი 19:19, ბურგ ან ბრესი-ბრივი 31:27, კარკასონი-ბიარიცი 21:20, პროვანსი-ანგულემი 20:21, ნევერი-კოლომიე 38:12, ვანი-მასი 26:12, ორიაკი-ბაიონი 41:27, ბეზიე-მონ დე მარსანი 19:16

სატურნირო მდგომარეობა
1. ბაიონი - 69 ქულა, 2. ნევერი - 69, 3. ოიონაქსი - 68, 4. ბრივი - 64, 5. ბეზიე - 60, 6. მონ დე მარსანი - 59, 7. პროვანსი - 55, 8. ვანი - 54, 9. ანგულემი - 54, 10. კარკასონი - 51, 11. ორიაკი - 51, 12. ბიარიცი - 50, 13. მონტობანი - 48, 14. ბურგ ან ბრესი - 42, 15. კოლომიე - 39, 16. მასი - 22.

ყოველდღიური სპორტული გაზეთი "ლელო"
670
მკითხველის კომენტარები / 0 /
მსგავსი ამბები
რუბრიკის სხვა სიახლეები
;