საქართველომ ევროპა დაიპყრო

საქართველოს 18-წლამდელთა ნაკრები ევროპის ჩემპიონია. "უმცროსი ბორჯღალოსნები" პოლონეთის ქალაქ პოზნანში გამართულ შეჯიბრებაში, ფინალში ზედიზედ მეოთხედ დაუპირისპირდნენ საფრანგეთის ნაკრებს და პირველად დაამარცხეს - 8:3.

ქართველმა მორაგბეებმა კოკისპირულ წვიმაში, რომელიც ორივე გუნდის თამაშს დიდ დაღს ასვამდა, საარაკო თავდადებით იბრძოლეს და მაღალი კლასის მეტოქე დაამარცხეს.

აღსანიშნავია ჩვენი გუნდის უპირატესობა შერკინებასა და დერეფანში თამაშისას. განსაკუთრებული სიურპრიზი სწორედ თამაშის ეს უკანასკნელი კომპონენტი იყო.

ფრანგების დერეფნის უმრავლესობა ჩვენმა მორაგბეებმა მოიგეს და საკუთარი მხოლოდ ორჯერ დათმეს. ჩვეულად მაღალი დონის თამაში აჩვენეს მორკინალებმა, როგორც სტატიკაში, ისე დინამიკაში.

დასალაგებელია ფეხით თამაში და გასასწორებელია კარში დარტყმის სიზუსტე, რაც დროთა განმავლობაში, იმედი გვაქვს, გამოსწორდება.

შეხვედრა ქართველმა მორაგბეებმა აქტიურად დაიწყეს და საწყის ათ წუთში მეტოქე საკუთარი ლელოს მისადგომებთან მიიმწყვდიეს. "უმცროსი ბორჯღალოსნების" მიძალებითმა დარტყმებმა შედეგი მე-8 წუთზე გამოიღო, შერკინების კვაჭი ვანო კარკაძე მარცხენა ფრთაზე გარემარბის ადგილას აღმოჩნდა და ბურთიანად ლელოში შეაღწია. ლაშა ლომიძეს გარდასახვა გაუცუდდა - 5:0. ამასთან ერთად, მან პირველ ტაიმში ორი საჯარიმოს გატანა ვერ შეძლო.

ფრანგებმა ანგარიშის შემცირება საჯარიმოდან მე-13 წუთზე შეძლეს. ამ დროს მატჩის არბიტრმა ჩვენი მგეზავი ნიკა ცინცაძე სინბინში გაუშვა და უპირატესობა რიცხობრივად მეტმა ფრანგმა იგდო ხელთ. თუმცა, მონაგარს ვერაფერი შეჰმატეს.

მეორე ტაიმის პირველი ოცი წუთი ისევ ფრანგების იყო, თუმცა ჩვენი გუნდი თავს თავდადებით, უშეცდომოდ იცავდა. ერთ ეპიზოდში ფრანგებს ანგარიშში დაწინაურებაც შეეძლოთ, მაგრამ საჯარიმო ვერ გაიტანეს. სამაგიეროდ, 65-ე წუთზე ლომიძემ ხელსაყრელი პოზიციიდან კარის ძელებს შორის ბურთი ზუსტად გაატარა და 8:3 დავწინაურდით.

ფრანგებს გამარჯვების მისაღწევად გარდასახული ლელო სჭირდებოდათ, მაგრამ ჩვენი გუნდი თამაშის მეტოქის მოედანზე გადატანას და იქ ბრძოლას ახერხებდა.

მატჩის მიწურულს ფრანგებმა ჩვენი მორაგბეების მიერ დაშვებული ელემენტარული შეცდომებით ისარგებლეს და ხანგრძლივი შტურმი მოგვიწყვეს. "უმცროსი ბორჯღალოსნები" თავგანწირვით იბრძოდნენ და მეტოქეს რაკში თამაშის წესი დაარღვევინეს. საჯარიმო აუტში დავარტყით და თამაშიც დასრულდა.

საქართველოს ნაკრები ჩემპიონის მედლებით "რაგბი ევროპის" ყოფილმა პრეზიდენტმა ჟან-კლოდ ბაკემ დააჯილდოვა. თასი კი მოქმედმა პრეზიდენტმა ოქტავიან მორარიუმ გადასცა.

საქართველო-საფრანგეთი 8:3

საქართველო: 15. გიორგი მიქანაძე, 14. ზურაბ ქავთარაძე, 13. დემურ თაფლაძე, 12. ლაშა ლომიძე, 11. თეიმურაზ ჭიჭინაძე, 10. ნიკა ცინცაძე, 9. გიორგი მარგალიტაძე; 1. დავით აბდუშელიშვილი, 2. ვანო კარკაძე, 3. ლუკა ჭელიძე, 4. ტარიელ გვიმრაძე, 5. იოანე იაშაღაშვილი, 6. ნიკოლოზ ღამბაშიძე, 7. ბექა ყორიაული, 8. გიგი ლეშკაშელი.

სათ: 16. ირაკლი მჭედლიძე, 17. საბა კურატიშვილი, 18. ხვიჩა ცოფურაშვილი, 19. ლუკა მაჭარაშვილი, 20. ვლადიმერ ჩაჩანიძე, 21. მიხეილ ალანია, 22. გიორგი თევდორაძე, 23. ირაკლი სიმსივე, 24. ოთარ ლაშხი, 25. ბართლომე კალაძე, 26. საბა კურტანიძე.

ლ: კარკაძე; ს: ლომიძე
სინბინი: ცინცაძე

VII ადგილისთვის
ბელგია-ჰოლანდია 14:10

V ადგილისთვის
რუმინეთი-რუსეთი 7:33

III ადგილისთვის
ესპანეთი-პორტუგალია 17:0

1. საბოლოო მდგომარეობა
საქართველო, 2. საფრანგეთი, 3. ესპანეთი, 4. პორტუგალია, 5. რუსეთი, 6. რუმინეთი, 7. ბელგია, 8. ჰოლანდია

ყოველდღიური სპორტული გაზეთი "ლელო"
1911
მკითხველის კომენტარები / 1 /
ავტორს
0
დასალაგებელია ფეხით თამაში და გასასწორებელია კარში დარტყმის სიზუსტე, რაც დროთა განმავლობაში, იმედი გვაქვს, გამოსწორდება. - an tenndenciuri xar an arafris gartymaSi 15-25 m/wm qarshi urtyamda damrtymelebi
მსგავსი ამბები
რუბრიკის სხვა სიახლეები
;