ქართველმა ახალგაზრდებმა მალტელები გაანადგურეს

საქართველოს ახალგაზრდულმა ნაკრებმა გასვლითი ამხანაგური მატჩი ჩაატარა მალტის "ტა ქალზე" და მასპინძლები 5:2 გაანადგურა. საქართველოს რანგით მეორე გუნდს 2018 წელს არ წაუგია - ეს ფაქტია. ჩვენებმა თავიდანვე ყოჩაღად დაიწყეს თამაში და მე-15 წუთზე ირაკლი ბუღრიძემ დაბალი, ზუსტი დარტყმით გახსნა ანგარიში.

მალტელებმა ყურები არ ჩამოყარეს და 27-ე წუთზე ნვოკომ ანგარიში გაათანაბრა. მალევე, ლუკა ზარანდიამ წინ გაიყვანა ახალგაზრდა ქართველები, მანამდე კი შესანიშნავად ითამაშა ჩვენმა მეკარე ლუკა გუგეშაშვილმა.

მეორე ტაიმის დასაწყისში (50-ე და 53-ე წუთებზე) მალტელ მცველთა ორი შეცდომით ისარგებლა ვატო არველაძემ და ანგარიში 4:1 გახადა.

დარჩენილ დროში მალტელებმა პენალტით (გრეჩი) შეამცირეს სხვაობა, ხოლო უკვე კომპენსირებულ წუთებზე, ასევე პენალტით, საბოლოო ანგარიში ზარანდიამ დააფიქსირა - 5:2.

საქართველო: გუგეშაშვილი (46. გოშაძე), ლოჩოშვილი, ნოზაძე (70. ბერიძე), მარგველაშვილი, ჩაჩუა (77. შულაია), ბუღრიძე (55. კოხრეიძე), არველაძე (70. ქანთარია), ზარანდია, ხარაიშვილი, გიორბელიძე, ნინუა (85. მაჭარაშვილი).

1306
მკითხველის კომენტარები / 0 /
მსგავსი ამბები
რუბრიკის სხვა სიახლეები
;